مەملەكەت باسشىسى: قازاقستان كيپرلىك كومپانيالاردىڭ ەلىمىزدە كاسىپ اشۋ نيەتىن قۇپتايدى

مەملەكەت باسشىسى ديپلوماتيالىق قارىم-قاتىناستار ورناعان ساتتەن بەرى ەلىمىزگە العاش رەت تاريحي ساپارمەن كەلگەنىن اتاپ ءوتتى.

ء«بىز جاڭا عانا شاعىن قۇرامدا مازمۇندى كەلىسسوز جۇرگىزىپ, ەكىجاقتى ىنتىماقتاستىقتى ودان ءارى دامىتۋعا بەيىل ەكەنىمىزدى راستادىق. قازاقستان ءوزارا ءتيىمدى كەلىسىمدەردى بەكىتۋگە دايىن. ويتكەنى ەلدەرىمىز اراسىندا قالىپتاسقان دوستىقتى قۇرمەت تۇتامىز. ساپارىڭىزدىڭ كيپر ەۋروپا وداعى كەڭەسىنە توراعالىق ەتىپ جاتقان كەزەڭدە ءوتۋى سيمۆولدىق مانگە يە. وسى ورايدا ءسىزدىڭ جەتەكشىلىگىڭىزدى جوعارى باعالايمىز ءارى ماڭىزدى ميسسيانى تابىستى اياقتاۋىڭىزعا تىلەكتەسپىز. ءسىزدىڭ كۇش-جىگەرىڭىزدىڭ ارقاسىندا كيپردىڭ حالىقارالىق ارەناداعى بەدەلى ايتارلىقتاي ارتا ءتۇستى. ءبىز كيپرمەن سان قىرلى سەرىكتەستىكتى دامىتۋعا مۇددەلىمىز. ەكى ەل اراسىنداعى قارىم-قاتىناس ساياسي دەڭگەيدەگى تۇراقتى بايلانىستار جانە ديپلوماتيالىق ۆەدومستۆولار جەلىسى ارقىلى سەنىمدى تۇردە ىلگەرىلەپ كەلەدى. استانا مەن نيكوسيا قالالارىندا ەلشىلىكتەرىمىزدىڭ اشىلۋى جۇيەلى ءارى ناقتى ىقپالداستىقتىڭ بەرىك ينستيتۋتسيونالدىق نەگىزىن قالايدى. ءسىزدىڭ لارناكا – استانا باعىتىنداعى العاشقى اۋە رەيسىمەن ۇشىپ كەلۋىڭىزدىڭ سيمۆوليكالىق سيپاتى ايرىقشا. ويتكەنى بۇل ەكى ەلدى جالعايتىن تىكەلەي اۋە قاتىناسىنىڭ ىسكە قوسىلعانىن كورسەتەدى. قازىرگى ساۋدا كولەمى ەكونوميكالارىمىزدىڭ ناقتى الەۋەتىنە تولىق ساي ەمەس ەكەنىن تۇسىنەمىز. سوندىقتان ورتاق ماقساتىمىز – ساياسي ەرىك-جىگەرىمىزدى ناقتى ەكونوميكالىق ناتيجەگە اينالدىرۋ», دەدى قازاقستان پرەزيدەنتى.

قازاقستان جانە كيپر پرەزيدەنتتەرى شاعىن قۇرامدا كەلىسسوز جۇرگىزدى

قاسىم-جومارت توقاەۆ نيكوس حريستودۋليديسپەن بىرگە اۋقىمدى بيزنەس دەلەگاتسيا كەلگەنىنە توقتالدى. بۇل كيپرلىك كومپانيالاردىڭ ەلىمىزگە قىزىعۋشىلىعى ارتىپ كەلە جاتقانىن بايقاتادى. وسى ورايدا تسيفرلاندىرۋ مەن جاساندى ينتەللەكت, لوگيستيكا, قارجى, تۋريزم جانە ءبىلىم بەرۋ سالالارىنداعى كووپەراتسيانى كەڭەيتۋگە باسا ءمان بەرۋ قاجەت ەكەنى ايتىلدى. قاسىم-جومارت توقاەۆتىڭ پىكىرىنشە, بۇگىنگى بيزنەس-فورۋم مەن ساۋدا پالاتالارى اراسىنداعى ءوزارا تۇسىنىستىك تۋرالى مەموراندۋمعا قول قويۋ ىسكەرلىك توپتاردىڭ تىكەلەي ديالوگىن جولعا قويۋعا سەپتىگىن تيگىزەدى.

«قازاقستان كيپرلىك كومپانيالاردىڭ ينۆەستيتسيا قۇيۋ جانە ەلىمىزدە كاسىپ اشۋ نيەتىن قۇپتايدى. ەل ساياساتىنىڭ نەگىزگى باسىمدىقتارىنىڭ ءبىرى – بيزنەس پەن ينۆەستورلارعا قولايلى جاعداي جاساۋ. كيپر كومپانيالارى ينۆەستيتسيالىق جوبالاردى جۇزەگە اسىرۋدا ۇكىمەتىمىزدىڭ ناقتى قولداۋىنا ارقا سۇيەي الادى. بۇدان بولەك, پارلامەنتارالىق بايلانىستار ەلدەرىمىزدىڭ ىنتىماقتاستىعىنا ورنىقتى ساياسي-قۇقىقتىق نەگىز قالايدى», دەدى پرەزيدەنت.

نيكوس حريستودۋليديس استاناعا ساپارى ەكىجاقتى قارىم-قاتىناستى دامىتۋدىڭ ماڭىزدى كەزەڭى سانالاتىنىن جەتكىزدى.

ء«بىز ورتالىق ازيا مەن قازاقستاننىڭ الەمدە گەوساياسي تۇرعىدان ماڭىزدى ءرول اتقاراتىنىن بىلەمىز. قازاقستان ەۋروپا وداعىنىڭ ستراتەگيالىق سەرىكتەسى سانالادى. كيپر – ەۋروپا وداعىنا مۇشە مەملەكەت رەتىندە قازاقستاندىق ينۆەستورلار مەن كومپانيالار ءۇشىن ەۋروپالىق نارىققا شىعاتىن سەنىمدى قاقپا. ءبىز ەۋروپا وداعى ستاندارتتارىنا تولىعىمەن ساي كەلەتىن ناقتى ىسكەرلىك ورتانى ۇسىنامىز. اقپاراتتىق-كوممۋنيكاتسيالىق تەحنولوگيالار, فينتەح, ينۆەستيتسيالىق قورلار, كەمە قاتىناسى, تۋريزم, ءبىلىم بەرۋ, جاڭارتىلاتىن ەنەرگيا جانە ينفراقۇرىلىم ەكىجاقتى ىنتىماقتاستىقتىڭ نەگىزگى باعىتتارىنا اينالا الادى. بۇگىن «استانا» حالىقارالىق قارجى ورتالىعىنا بارۋدى جوسپارلاپ وتىرمىن. اتالعان ورتالىقپەن ارىپتەستىكتى, اسىرەسە قارجى قىزمەتتەرى مەن «جاسىل» قارجىلاندىرۋ سالالارىنداعى ىنتىماقتاستىقتى كەڭەيتۋدە زور الەۋەت بار», دەدى كيپر پرەزيدەنتى.

مەملەكەت باسشىسى ناتيجەلى ەكونوميكالىق كۇن تارتىبىنە قول جەتكىزۋ ءۇشىن ۇكىمەتتەر كۇشىن ۇيلەستىرۋ ماڭىزدى دەپ سانايدى.

وسى ورايدا قاسىم-جومارت توقاەۆ ەكونوميكالىق ىنتىماقتاستىقتىڭ 2028 جىلعا دەيىنگى جول كارتاسىن ازىرلەۋدى ۇسىندى. پرەزيدەنت ەكونوميكالىق ىنتىماقتاستىق جونىندەگى ۇكىمەتارالىق كوميسسيا مەن ىسكەرلىك كەڭەس قۇرۋ, سونداي-اق ساۋدا دەلەگاتسيالارىمەن تۇراقتى الماسۋ جونىندە باستاما كوتەردى.

تاراپتار ساۋدا, ينۆەستيتسيا, كولىك-لوگيستيكا, تسيفرلىق كوممۋنيكاتسيا, جاساندى ينتەللەكت جانە قارجى سالالارىنداعى ىقپالداستىقتى نىعايتۋ پەرسپەكتيۆاسىن تالقىلادى.

سونىمەن قاتار مادەنيەت, ءبىلىم, سپورت جانە تۋريزم باعىتتارىنداعى بايلانىستى كەڭەيتۋ مۇمكىندىگىنە نازار اۋداردى.

ەسكە سالا كەتەيىك, بۇگىن كيپر رەسپۋبليكاسىنىڭ پرەزيدەنتى نيكوس حريستودۋليديس ەلىمىزگە رەسمي جۇمىس ساپارىمەن كەلدى. پرەزيدەنت مارتەبەلى مەيماندى تاۋەلسىزدىك سارايىندا رەسمي قارسى الدى. ەكى ەل پرەزيدەنتتەرى شاعىن قۇرامدا كەلىسسوز جۇرگىزدى.