ەلىمىزدە كوكپار ۇلتتىق ويىنىنان جاراقات الىپ, ومىرىنە قاۋىپ توندىرگەندەر سانىنىڭ ارتۋىنا بايلانىستى ءماجىلىس دەپۋتاتى بولات كەرىمبەك كوكپارعا باقىلاۋدى كۇشەيتۋدى تالاپ ەتتى, دەپ حابارلايدى Egemen.kz.
ءماجىلىس دەپۋتاتىنىڭ مالىمدەۋىنشە, بيىلعى ناۋرىز-ءساۋىر ايلارىندا وڭتۇستىك وڭىرلەردە 80-نەن استام رەسمي ويىن تىركەلگەن. الايدا ەلىمىزدە «جاپپاي كوكپار» فەدەراتسياسى قۇرىلعانىمەن, ءىس جۇزىندە ورتاق ەرەجەلەر ءالى دە ساقتالماي كەلەدى.
«قاتىسۋشىنىڭ جاس ەرەكشەلىگى ەسكەرىلمەيدى, ولاردىڭ سانى دا شەكتەلمەيدى. كەي جاعدايدا 400-500 ادامنان باستاپ 1500-2000 كوكپارشىعا دەيىن قاتىساتىن ويىن وتەدى. مۇنداي جاعدايدا سپورتتىق ءتارتىپ پەن قاۋىپسىزدىك تالابىن ساقتاۋ قيىن. كوكپار جىلقىسىن باپتاۋ مەن پايدالانۋ ءتارتىبى دە ناقتى رەتتەلمەگەن. اتقا كۇش قولدانۋ, دوپينگ پايدالانۋ, ادەيى سوقتىعىسۋ دەرەگى ءجيى كەزدەسەدى», دەدى بولات كەرىمبەك.
قىزىلوردادا كوكپار كەزىندە كولىك جىلقىلاردى قاعىپ كەتتى
دەپۋتات رۇقساتسىز وتكىزىلەتىن ويىندارعا باقىلاۋدى كۇشەيتۋ كەرەكتىگىن ايتتى.
«وسىعان بايلانىستى ۇكىمەتتەن جاپپاي كوكپارعا ارنالعان قاۋىپسىزدىك ستاندارتىن زاڭنامالىق دەڭگەيدە بەكىتىپ, قاتىسۋشى سانىنا, مەديتسينالىق جانە ۆەتەرينارلىق باقىلاۋعا مىندەتتى تالاپ ەنگىزۋدى سۇرايمىز. سونداي-اق قۇزىرەتتى ورگانداردىڭ جاۋاپكەرشىلىگىن ناقتىلاپ, رۇقساتسىز كوكپار وتكىزگەن ۇيىمداستىرۋشىنىڭ جاۋاپكەرشىلىگىن كۇشەيتۋدى قاراستىرۋ كەرەك دەپ سانايمىز», دەدى ول.
ەسكە سالا كەتەيىك, جۋىردا اقمولا وبلىسىندا كوكپار كەزىندە ءجاسوسپىرىم قازا تاپتى. سپورتتىق ءىس-شارانى ۇيىمداستىرۋشىلار جەرگىلىكتى اكىمدىكتىڭ كەلىسىمىنسىز وتكىزگەن.