ءماجىلىس دەپۋتاتى جارقىنبەك امانتاي ۇلى مەكتەپ ءبىتىرۋ كەشتەرىندەگى ورىنسىز ءسان-سالتانات پەن الەۋمەتتىك باسەكەنىڭ كۇشەيۋىنە الاڭداۋشىلىق ءبىلدىردى. ول ۇكىمەتكە جولداعان دەپۋتاتتىق ساۋالىندا سوڭعى قوڭىراۋ مەن مەكتەپ ءبىتىرۋ ءىس-شارالارىن وتكىزۋدىڭ بىرىڭعاي تاربيەلىك ستاندارتىن ازىرلەۋدى ۇسىندى, دەپ حابارلايدى Egemen.kz.
دەپۋتاتتىڭ ايتۋىنشا بيىل ەلىمىز بويىنشا 3,9 ميلليوننان استام وقۋشى وقۋ جىلىن اياقتاسا, ونىڭ ىشىندە 215 مىڭنان استامى مەكتەپپەن قوشتاستى. دەگەنمەن سوڭعى جىلدارى مەكتەپ ءبىتىرۋ راسىمدەرى تاربيەلىك ماڭىزىنان الىستاپ, قىمبات كولىكتەر شەرۋى, ءسان-سالتانات جارىسى جانە الەۋمەتتىك جەلىدەگى داراقىلىق كورىنىستەرىمەن ەرەكشەلەنىپ كەلەدى.
«مەكتەپ ءبىتىرۋ – ءار ازاماتتىڭ ومىرىندەگى ماڭىزدى بەلەس. بۇل كۇن ەڭ الدىمەن بىلىمگە قۇرمەتتىڭ, ۇستاز ەڭبەگىن باعالاۋدىڭ جانە جاڭا ومىرگە قادام باسۋدىڭ سيمۆولى بولۋى ءتيىس ەدى. الايدا سوڭعى جىلدارى مەكتەپ ءبىتىرۋ ءراسىمى تاربيەلىك مازمۇنىنان الىستاپ, الەۋمەتتىك باسەكەنىڭ, داراقىلىقتىڭ جانە ورىنسىز داڭعازالىقتىڭ كورىنىسىنە اينالىپ بارا جاتقانى قوعامدى الاڭداتىپ وتىر», دەدى دەپۋتات.
ونىڭ ايتۋىنشا, بيىلعى سوڭعى قوڭىراۋ كەزىندە ەلىمىزدىڭ بىرنەشە وڭىرىندە قىمبات اۆتوكولىكتەردەن قۇرالعان كورتەجدەر ۇيىمداستىرىلىپ, جول قوزعالىسى ەرەجەلەرى بۇزىلعان. الماتىدا مۇنداي فاكتىلەرگە بايلانىستى 21 كامەلەتكە تولماعان بالانىڭ اتا-اناسى جاۋاپكەرشىلىككە تارتىلعان.
«ماسەلە تەك اۆتوكورتەجدەرمەن شەكتەلمەيدى. بيىل مەكتەپ بىتىرۋشىلەرگە ارنالعان الىپ گۇل شوقتارى, قىمبات سىيلىقتار مەن ءسان-سالتاناتتى راسىمدەر قوعامدا كەڭىنەن تالقىلاندى. كەيبىر اتا-انالار بالاسىنىڭ قاتارىنان قالماۋى ءۇشىن قارىز الۋعا نەمەسە ءبولىپ تولەۋگە ءماجبۇر بولعانىن ايتىپ جاتىر. بۇل الەۋمەتتىك جاعدايى تومەن وتباسىلاردىڭ بالالارىنا پسيحولوگيالىق قىسىم تۇسىرەتىنى انىق», دەدى جارقىنبەك امانتاي ۇلى.
ءبىر ايدان سوڭ مەكتەپ ءبىتىرۋ كەشى وتەدى: قىمبات كەش − مارتەبە مە, ىسىراپ پا؟
دەپۋتات مۇنداي ۇردىستەر جاس ۇرپاق اراسىندا ءبىلىم مەن ەڭبەكتىڭ ەمەس, ماتەريالدىق قۇندىلىقتاردىڭ باسىمدىعىن قالىپتاستىرۋى مۇمكىن ەكەنىن اتاپ ءوتتى.
ء«بىز بالالارعا ءبىلىم مەن ەڭبەكتىڭ قۇندىلىعىن ەمەس, قىمبات كولىك پەن قىمبات گۇل ارقىلى مارتەبە كورسەتۋدى ناسيحاتتاپ جاتقان جوقپىز با؟ مەملەكەت باسشىسى بىرنەشە رەت زاڭ مەن ءتارتىپتى, ادال ەڭبەك پەن قاراپايىمدىلىق مادەنيەتىن قالىپتاستىرۋ قاجەتتىگىن ايتتى. سوندىقتان مەكتەپ قابىرعاسىنداعى مۇنداي كورىنىستەرگە بەيجاي قاراۋعا بولمايدى», دەدى دەپۋتات.
وسىعان بايلانىستى حالىق قالاۋلىسى ۇكىمەتكە مەكتەپ ءبىتىرۋ ءىس-شارالارىن وتكىزۋدىڭ بىرىڭعاي تاربيەلىك ستاندارتىن ازىرلەۋدى, اۆتوكورتەجدەر مەن قوعامدىق قاۋىپسىزدىككە قاتەر توندىرەتىن ارەكەتتەردىڭ الدىن الۋ تەتىكتەرىن ەنگىزۋدى, سونداي-اق ءبىلىم بەرۋ ۇيىمدارىندا رۋحاني قۇندىلىقتاردى دارىپتەۋگە باعىتتالعان ءتۇسىندىرۋ جۇمىستارىن كۇشەيتۋدى ۇسىندى.
سونىمەن قاتار وقۋ-اعارتۋ مينيسترلىگىنە مەكتەپ ءبىتىرۋ مادەنيەتىن قالىپتاستىرۋ جونىندەگى ۇلتتىق تۇجىرىمدامالىق ۇسىنىستار ازىرلەۋ قاجەتتىگىن جەتكىزدى.
بۇعان دەيىن اتالعان ماسەلەگە قاتىستى ءماجىلىس دەپۋتاتى اسحات ايماعامبەتوۆ پىكىر ءبىلدىرىپ, ەلىمىزدەگى كوپتەگەن مەرەكەنىڭ الدەقاشان «داڭعويلىق جارمەڭكەسىنە» اينالىپ كەتكەنىن ايتقان بولاتىن. دەپۋتات كەيبىر وتباسىلاردىڭ ءبىتىرۋ كەشىنە 300 مىڭنان باستاپ, ءبىر ميلليون تەڭگەگە دەيىن سۇرالاتىنىنا شاعىمداناتىنىن ايتتى.
ايتا كەتەيىك, بۇگىن پارلامەنت ءماجىلىسىنىڭ جالپى وتىرىسىندا بىرقاتار ماڭىزدى زاڭ جوبالارى قارالىپ جاتىر.