الماتىدا الەۋمەتتىك جەلىدە ءال-فارابي داڭعىلىنداعى جانتۇرشىگەرلىك جول اپاتىنا قاتىستى مالىمدەمەلەرىمەن تانىلعان بلوگەر ادىلەتحان مولداحانعا قاتىستى سوت پروتسەسى باستالدى. وعان «كورىنەۋ جالعان اقپارات تاراتۋ» بابى بويىنشا ايىپ تاعىلىپ وتىر, دەپ حابارلايدى Egemen.kz.
Instagram جەلىسىندە ميلليوننان استام وقىرمانى بار بلوگەر ادىلەتحان مولداحان الماتىداعى ءال-فارابي داڭعىلىندا ءۇش ادامنىڭ ءومىرىن قيعان جول-كولىك وقيعاسىنا قاتىستى جاريالانىمدارىنان كەيىن قۇقىق قورعاۋ ورگاندارىنىڭ نازارىنا ىلىكتى. ول اپاتقا پوليتسيا قىزمەتكەرلەرىنىڭ قاتىسى بولۋى مۇمكىن دەگەن بولجام ايتقان ەدى.
بلوگەر 31 ناۋرىزدا ۇستالدى. كەيىن الماتى قالالىق پوليتسيا دەپارتامەنتى ونىڭ بۇرىن قۇقىق قورعاۋ ورگاندارىندا قىزمەت ەتكەنىن, الايدا ءبىر سەبەپتەرمەن جۇمىستان شىعارىلعانىن حابارلادى. سونداي-اق 2023 جىلى توناۋ فاكتىسى بويىنشا قىلمىستىق جاۋاپكەرشىلىككە تارتىلعانى بەلگىلى بولدى.
قازىر وعان قىلمىستىق كودەكستىڭ 274-بابى 2-بولىگى 3-تارماعى بويىنشا ايىپ تاعىلعان. بۇل باپ بۇقارالىق اقپارات قۇرالدارى نەمەسە تەلەكوممۋنيكاتسيا جەلىلەرى ارقىلى كورىنەۋ جالعان اقپارات تاراتقانى ءۇشىن جاۋاپكەرشىلىكتى قاراستىرادى.
ءىس بويىنشا جابىرلەنۋشى رەتىندە الماتى قالاسى پوليتسيا دەپارتامەنتى باسشىسىنىڭ بۇرىنعى ورىنباسارى ەرجان ۇزاباەۆ پەن اكىمشىلىك پوليتسيا باسقارماسىنىڭ ەكس-باسشىسى سەرىك شۇماەۆ تانىلعان. ولاردىڭ ادۆوكاتتارىنىڭ ايتۋىنشا, مولداحاننىڭ جاريالانىمدارىنان كەيىن قىزمەتتىك تەكسەرىس جۇرگىزىلىپ, اتالعان قىزمەتكەرلەر لاۋازىمدارىنان بوساتىلىپ, ءىىم رەزەرۆىنە جىبەرىلگەن.
جابىرلەنۋشى تاراپ بلوگەردەن ارقايسىسى 11 ميلليون تەڭگە كولەمىندە مورالدىق جانە ماتەريالدىق شىعىن ءوندىرۋدى تالاپ ەتىپ وتىر.
العاشقى سوت وتىرىسىندا ادىلەتحان مولداحان ءوز كىناسىن تولىق مويىندادى. بۇل تۋرالى ونىڭ ادۆوكاتى نۇرتۋعان ومىرزاق مالىمدەدى. قورعاۋشىلار بۇل شەشىمنىڭ بلوگەردىڭ جەكە ۇستانىمى ەكەنىن ايتتى.
سونىمەن قاتار قورعاۋ تاراپى بۇلتارتپاۋ شاراسىن وزگەرتۋ, ءىستى جەڭىلدەتىلگەن تارتىپپەن قاراۋ جانە مەدياتسياعا ۋاقىت بەرۋ تۋرالى ءوتىنىش بىلدىرگەن. الايدا سوت ءوتىنىشتى قاناعاتتاندىرماي, ايىپتالۋشىنى قاماۋدا قالدىردى.
ەسكە سالايىق, 21 ناۋرىزعا قاراعان ءتۇنى الماتىداعى ءال-فارابي داڭعىلى مەن مەڭدىقۇلوۆ كوشەسىنىڭ قيىلىسىندا بولعان جول اپاتىندا Mercedes كولىگىندەگى ءۇش ادام قازا تاپقان. اپاتقا سەبەپكەر بولدى دەگەن كۇدىكپەن Zeekr كولىگىنىڭ جۇرگىزۋشىسى قاماۋعا الىنعان. تەرگەۋ مالىمەتىنشە, ول وقيعا كەزىندە جەڭىل دارەجەدە ماس كۇيدە بولعان.
ادۆوكات جوحار ۋتەبەكوۆ جول-كولىك وقيعاسىنا قاتىستى پىكىر ءبىلدىرىپ, بەلگىلى ءبىر جاعدايلاردا كىنالى دەپ تانىلعان ازامات ۇكىم شىققاننان كەيىن شامامەن 1 جىل 3 ايدان سوڭ جازاسىن جەڭىلدەتۋگە قول جەتكىزۋى مۇمكىن ەكەنىن ايتتى.
قازىرگى تاڭدا قوعام نازارىن اۋدارتقان بۇل ءىس بويىنشا سوت پروتسەسى جالعاسىپ جاتىر.