بالقاش كولىنىڭ جاعالاۋىندا 19-20 ماۋسىم كۇندەرى ءداستۇرلى «Balkhash Tour Fest» فەستيۆالى وتەدى, دەپ حابارلايدى Egemen.kz.
بالقاش ءوڭىرىنىڭ تارتىمدىلىعىن ارتتىرۋعا باعىتتالعان فەستيۆال ءتورتىنشى جىل قاتارىنان وتكىزىلىپ كەلەدى. وتكەن جىلى ءىس-شاراعا 50 مىڭنان استام ادام قاتىسقان.
بيىلعى جىلدىڭ باستى جاڭالىعى – فەستيۆال الاڭى جاز بويى جۇمىس ىستەيتىن بولادى. دەمالىس كۇندەرى مۇندا كونتسەرتتەر, سپورتتىق جارىستار مەن ءتۇرلى ويىن-ساۋىق ءىس-شارالارى ۇيىمداستىرىلادى.
باعدارلاما اياسىندا تانىمال ارتىستەر Miras Zhugunussov, AYAU, Bellucci, Domino, Nurlan & Murat جانە Qazaq Band ونەر كورسەتەدى. سونىمەن قاتار فەستيۆال اۋماعىندا شىعارماشىلىق جانە سپورتتىق ايماقتار, فۋدكورتتار, قولونەرشىلەر جارمەڭكەسى, اشىق اسپان استىنداعى كينوتەاتر جانە وتباسىلىق دەمالىس الاڭدارى جۇمىس ىستەيدى.
ۇيىمداستىرۋشىلاردىڭ ايتۋىنشا, مۇندا جاعاجاي ۆولەيبولى, ارمرەستلينگ, رەگاتا جانە جەلكەندى سپورت بويىنشا شەبەرلىك ساباقتارى وتكىزىلەدى.
«كىرەبەرىستە قوناقتاردى ينتەراكتيۆتى LED-اركا قارسى الادى. باعدارلامادا سونداي-اق كوبىك سۋ شاشۋ كەشتەرى, جاركوكروسس, سۋ تاكسي, PikeMan جارىستارى, جاساندى ينتەللەكت جانە كرافت ويىندارى بار. ەكولوگياعا جانە قالدىقتاردى وڭدەۋگە ەرەكشە نازار اۋدارامىز. ستريتباسكەتبولدان, پاننا-فۋتبولدان جانە بي باتلىنان تۋرنيرلەر جالعاسادى. ولاردىڭ ءبىرىنىڭ جەڭىمپازى كوشە بيلەرىنىڭ حالىقارالىق فەستيۆالىندە قازاقستاندى تانىستىرۋ مۇمكىندىگىنە يە بولادى», دەيدى Balkhash Tour Fest ۇيىمداستىرۋشىسى رەنات المانوۆ.
ەسكە سالا كەتەيىك, جاز ماۋسىمىندا بالقاشقا قوسىمشا پويىزدار قاتىنايدى. سونداي-اق قالادا رەكونسترۋكتسيادان كەيىن قايتا اشىلعان اۋەجاي ءوز جۇمىسىن باستادى.