جەتىسۋ وبلىسىندا ۇلتتىق جوبا اياسىندا ەلەكتر جەلىلەرى جاڭارتىلىپ جاتىر

ەكسج جوبالىق كەڭسەسىنىڭ مالىمەتىنشە, جەلىدە وتكەن جىلدىڭ باسىنان بەرى 9 رەت اپات بولىپ, جارىق وشكەن. جوبا اياسىندا جەتىسۋ وبلىسىندا 2026 جىلعا ارنالعان تەك ەلەكتر ەنەرگەتيكاسى سالاسىندا 10-عا جۋىق جوبانى ىسكە اسىرۋ جوسپارلانعان. ونىڭ ىشىندەگى 3 جوبا ەسكەلدى اۋدانىنا تيەسىلى. بۇل جوبالاردىڭ جالپى قۇنى شامامەن 1,9 ميلليارد تەڭگەنى قۇرايدى.  

قۇرىلىس-مونتاج جۇمىستارى جۇرگىزىلىپ جاتقان ءبىرىنشى جوبا – اۋدان ورتالىعى – قارابۇلاق كەنتىندەگى 10/0,4 كۆ اۋە جەلىسى. بۇل جەلىنىڭ ۇزىندىعى – 49 شاقىرىم. ونىڭ ىسكە قوسىلعانىنا 53 جىل بولعان, ەندى ول تولىعىمەن جاڭارتىلادى. قازىردىڭ وزىندە جوسپارلانعان 1 104 تەمىربەتون باعانانىڭ 800-ءى ورناتىلىپ قويدى. جوبانى 2026 جىلدىڭ ناۋرىز ايىنان قازان ايىنا دەيىن ىسكە اسىرۋ جوسپارلانعان. 

2035 جىلعا دەيىن قازاقستاندا 7 مىڭ شاقىرىم جاڭا ەلەكتر جەلىسى سالىنادى

«جوبانى ىسكە اسىرۋ مەكتەپتەر, اۋرۋحانالار, بالاباقشالار, مادەنيەت وشاقتارى, اكىمشىلىك عيماراتتار, سونداي-اق قاراپايىم تۇرعىندار مەن ءوندىرىس ورىندارىن قوسقاندا, جالپى 1 076 ابونەنتتى تۇراقتى ءارى ءۇزىلىسسىز جارىقپەن قامتاماسىز ەتەدى. وسى جۇمىستاردىڭ ناتيجەسىندە اپات قاۋپى ازايىپ, جارىقتىڭ ءوشۋى سيرەيدى, سونىمەن قاتار كەرنەۋ ساپاسى ارتىپ, ەلەكتر جەلىلەرى تۇراقتى جۇمىس ىستەيتىن بولادى», دەلىنگەن تابيعي مونوپوليالاردى رەتتەۋ كوميتەتى جەتىسۋ وبلىسى بويىنشا دەپارتامەنتىنىڭ حابارلاماسىندا.

ەلدى مەكەندە ۇلتتىق جوبا اياسىندا تاعى 2 جوبا ىسكە اسىرىلماق: ءبىرىنشىسى – ۇزىندىعى 47,115 شاقىرىم بولاتىن اۋە ەلەكتر جەلىسىن قايتا قۇرۋ جۇمىستارى بولسا, ەكىنشىسى – ترانسفورماتورلىق قوسالقى ستانتسيانى جاڭارتۋ جۇمىستارى بولماق.  

ەسكە سالا كەتەيىك, بيىل ۇلتتىق جوبا بويىنشا جالپى سوماسى 626,8 ملرد تەڭگەگە 130 شاقىرىم جىلۋ جەلىسىن جانە 10 490 شاقىرىم ەلەكتر جەلىسىن جاڭعىرتۋ كوزدەلگەن.