ءال-فارابي اتىنداعى قازۇۋ-دىڭ زاڭ فاكۋلتەتىندە تۇلەكتەر كۇنىن اۋقىمدى مەرەكەلەۋ اياسىندا «1981 جىلعى تۇلەكتەر» اتاۋىن يەلەنگەن جاڭارتىلعان №301 اۋديتوريا مەن «1996 جىلعى تۇلەكتەر» اتىنداعى №4 ءدارىس زالىنىڭ سالتاناتتى اشىلۋ ءراسىمى ءوتتى, دەپ حابارلايدى Egemen.kz.
جاڭارتىلعان №301 اۋديتوريا جوباسى ۋنيۆەرسيتەت بىتىرگەندەرىنە 45 جىل تولعان تۇلەكتەردىڭ قولداۋىمەن ىسكە اسىرىلدى. ولاردىڭ قاتارىندا كورنەكتى مەملەكەت جانە قوعام قايراتكەرلەرى: قايرات ءمامي, مۇسابەك الىمبەكوۆ, زاعيپا باليەۆا جانە قازاقستاننىڭ قۇقىقتىق جۇيەسىنىڭ دامۋىنا باعا جەتپەس ۇلەس قوسقان باسقا دا بەلگىلى تۇلعالار بار.
سالتاناتتى راسىمدە ءسوز العان ءال-فارابي اتىنداعى قازۇۋ-دىڭ باسقارما توراعاسى – رەكتور جانسەيىت تۇيمەباەۆ ۋنيۆەرسيتەتتىك داستۇرلەر ساباقتاستىعىنىڭ ەرەكشە ماڭىزدىلىعىن اتاپ ءوتتى. ۋنيۆەرسيتەت باسشىسى جىلدار وتە تەحنولوگيالار مەن وقۋ باعدارلامالارى وزگەرگەنىمەن, تۇلەكتەردىڭ شىنايى ريزاشىلىقپەن ۇشتاسقان تۋعان ۋنيۆەرسيتەتىمەن بايلانىسى ەشقاشان ۇزىلمەيتىنىن ايتتى. ونىڭ سوزىنشە, بۇرىنعى ستۋدەنتتەردىڭ كۇشىمەن زاماناۋي ماتەريالدىق-تەحنيكالىق بازانى قالىپتاستىرۋ – قوعامعا قىزمەت ەتۋدىڭ ەڭ ۇزدىك ۇلگىسى.
«جاڭارتىلعان 301-ءشى اۋديتوريا جاڭا بۋىن ستۋدەنتتەرى ءبىلىم الاتىن ورىنعا اينالادى. مۇندا دارىستەر وقىلىپ, پىكىرتالاستار ءوتىپ, العاشقى عىلىمي يدەيالار تۋىنداپ, قازاقستاننىڭ بولاشاق زاڭگەرلەرى قالىپتاسادى. سوندىقتان تۇلەكتەردىڭ جاستار ءۇشىن بىلىمگە, ماماندىققا جانە ۋنيۆەرسيتەت داستۇرىنە دەگەن قۇرمەتكە تولى كەڭىستىك جاساۋىنىڭ سيمۆولدىق ءمانى زور», دەدى رەكتور.
مەرەكەلىك باعدارلاما 1996 جىلعى تۇلەكتەردىڭ قولداۋىمەن جاڭارتىلعان №4 ءدارىس زالىنىڭ اشىلۋىمەن جالعاستى.
سودان كەيىن ءىس-شارا قوناقتارى №9 جاتاقحانا ماڭىندا بوي كوتەرگەن تۇلەكتەر اللەياسىن ارالاپ, ۇلى ويشىل ءال-فارابي مونۋمەنتىنە قۇرمەت رەتىندە گۇل شوقتارىن قويدى.
سونداي-اق, ءىس-شاراعا قاتىسۋشىلاردى ءتۇرلى جىلدارداعى تۇلەكتەر: ءال-فارابي اتىنداعى قازۇۋ ديرەكتورلار كەڭەسىنىڭ توراعاسى قايرات ءمامي, بانك ومبۋدسمەنى دارحان نۇرپەيىسوۆ, قازۇۋ زاڭ فاكۋلتەتىنىڭ ازاماتتىق قۇقىق, ازاماتتىق پروتسەسس جانە ەڭبەك قۇقىعى كافەدراسى مەڭگەرۋشىسىنىڭ ورىنباسارى, ز.ع. ك., پروفەسسور گۇلميرا نۇراحمەتوۆا جانە باسقالار قۇتتىقتادى.
سالتاناتتى كۇن اۋقىمدى كونتسەرتتىك باعدارلاماعا ۇلاستى. تۇلەكتەر ستۋدەنتتىك شاقتىڭ ىستىق ەستەلىكتەرى قالعان ورىنداردى تاماشالاپ, بۇگىندە الەمدىك دەڭگەيدەگى زەرتتەۋ ۋنيۆەرسيتەتىنە اينالعان قازۇۋ كامپۋسىن ارالادى.