قازاقستان مەن كيپر پرەزيدەنتتەرى كەلىسسوزدەر قورىتىندىسى بويىنشا باق وكىلدەرىنە ارناپ وتكىزگەن بريفينگ بارىسىندا قاسىم-جومارت توقاەۆ قازاقستان ءوز نارىعىندا جۇمىس ىستەۋگە نيەتتى كيپر كومپانيالارىنا قولايلى جاعداي جاساۋعا ارقاشان دايىن ەكەنىن ايتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
پرەزيدەنتتىڭ ايتۋىنشا, قازىر ەلىمىزدە كيپر كاپيتالىنىڭ قاتىسۋىمەن 400-دەن استام كومپانيا جۇمىس ىستەپ جاتىر. ولاردىڭ 30-عا جۋىعى استانا حالىقارالىق قارجى ورتالىعىندا تىركەلگەن.
«وسىنىڭ ءوزى ەلدەرىمىزدىڭ ىسكەرلىك جانە ينۆەستيتسيالىق بايلانىستارى دايەكتى تۇردە دامىپ جاتقانىن كورسەتەدى. بۇگىن ەلوردامىزدا قازاقستان-كيپر بيزنەس-فورۋمى وتەدى. ماڭىزدى جيىنعا ەكى ەلدىڭ ىسكەر توپتارى قاتىسادى. كيپر كاسىپكەرلەرىنىڭ دەلەگاتسياسى وسى فورۋمعا ارنايى كەلدى. سول ءۇشىن قۇرمەتتى پرەزيدەنت مىرزاعا زور ريزاشىلىعىمدى بىلدىرەمىن. قازاقستان ءوز نارىعىندا جۇمىس ىستەۋگە نيەتتى كيپر كومپانيالارىنا قولايلى جاعداي جاساۋعا ارقاشان دايىن. ءبىز كيپردىڭ ىسكەر ازاماتتارىن ۇزاق مەرزىمگە ارنالعان ينۆەستيتسيالىق جوبالاردى بىرلەسىپ ىسكە اسىرۋعا شاقىرامىز. جاقىندا ەلىمىزدە جاڭا كونستيتۋتسيا قابىلداندى. اتا زاڭعا سايكەس قازاقستاندا مەنشىكتىڭ بارلىق تۇرىنە كەپىلدىك بەرىلەدى. باس قۇجاتىمىز ينۆەستورلاردىڭ قۇقىعىن بارىنشا قورعايدى. بۇعان قوسا, كيپرلىق ارىپتەستەرىمىز قازاقستاننىڭ Altyn Visa باعدارلاماسىن قولدانا الادى. بۇل ۆيزانى العان كاسىپكەرلەر مەن ماماندارعا سالىق جانە كوشى-قون ماسەلەسىنە قاتىستى جەڭىلدىكتەر ۇسىنىلادى», دەدى قاسىم-جومارت توقاەۆ.
قازاقستان مەن كيپر اراسىندا قانداي قۇجاتتارعا قول قويىلدى؟
مەملەكەتتەر باسشىلارى كەلىسسوز بارىسىندا تسيفرلىق تەحنولوگيالار جانە يننوۆاتسيالار سالاسىنداعى ىقپالداستىققا ەرەكشە نازار اۋدارعان.
«كيپر تاراپى قازاقستاننىڭ eGov جۇيەسىنە جانە ەلىمىزدە مەملەكەتتىك قىزمەتتەردى تسيفرلاندىرۋعا قاتىستى جوبالارىنا قىزىعۋشىلىق تانىتىپ وتىر. ءبىز بۇل باعىتتاعى تاجىريبەمىزدى بولىسۋگە دايىنبىز. سونىمەن قاتار كەلىسسوزدەر بارىسىندا مادەني-گۋمانيتارلىق بايلانىستاردى دامىتۋعا ايرىقشا كوڭىل بولدىك. اتاپ ايتقاندا, عالىمدار مەن عىلىمي مەكەمەلەر اراسىنداعى قارىم-قاتىناستى كۇشەيتۋگە, ءبىلىم بەرۋ, سپورت جانە تۋريزم سالاسىنداعى ىنتىماقتاستىقتى نىعايتۋعا كەلىستىك. جالپى, بۇگىنگى كەلىسسوزدەر تابىستى ءوتتى دەۋگە تولىق نەگىز بار. ءبىز ءوزارا ىقپالداستىعىمىزعا تىڭ سەرپىن بەرەتىن بىرقاتار ماڭىزدى قۇجاتقا قول قويدىق. بۇل كەلىسىمدەر ەكى مەملەكەتتىڭ قارىم-قاتىناسىن كۇشەيتە تۇسەدى دەپ سەنەمىن», دەدى مەملەكەت باسشىسى.
ەسكە سالا كەتەيىك, بۇگىن كيپر رەسپۋبليكاسىنىڭ پرەزيدەنتى نيكوس حريستودۋليديس ەلىمىزگە رەسمي جۇمىس ساپارىمەن كەلدى. پرەزيدەنت مارتەبەلى مەيماندى تاۋەلسىزدىك سارايىندا رەسمي قارسى الدى.