تسيفرلىق دامۋ مينيسترلىگى ەڭبەك كودەكسىنە تۇزەتۋلەر ازىرلەۋدە. وزگەرىستەرگە سايكەس, بارلىق مەملەكەتتىك جانە جەكەمەنشىك ۇيىمدار جاڭا قىزمەتكەرلەرگە كيبەرساۋاتتىلىق بويىنشا وقىتۋ جۇرگىزۋگە مىندەتتى بولادى, دەپ حابارلايدى Egemen.kz
كەيىن بۇل وقىتۋ جۇمىس بارىسىندا جىل سايىن قايتالانىپ وتىرادى. بۇل تۋرالى قازاقستاننىڭ جاساندى ينتەللەكت جانە تسيفرلىق دامۋ ۆيتسە-ءمينيسترى دوسجان مۇساليەۆ پەتەربۋرگتەگى حالىقارارالىق ەكونوميكالىق فورۋمىندا مالىمدەدى.
ءابۋتالىپ ءمۋتالى: كيبەرالاياقتىقتى زاڭ مەن ءتارتىپ جەڭەدى
ونىڭ ايتۋىنشا, زاڭ جوباسى پارلامەنت ماجىلىسىندە ماقۇلدانعان. قۇجاتتىڭ 2026 جىلدىڭ كۇزىندە كۇشىنە ەنۋى كۇتىلۋدە.
«ەگەر كيبەرشابۋىلدار مەن الاياقتىق ارەكەتتەردى تالدايتىن بولساق, ولاردىڭ شامامەن 80 پايىزى ادام فاكتورىنا بايلانىستى ەكەنىن كورەمىز. جۇيەنى قانشا جەردەن قورعاعانمەن, ەگەر ادامدا بازالىق ءبىلىم بولماسا, حاكەرلەر جۇيەگە وڭاي ەنە الادى. ارينە, بۇل كورسەتكىشتى نولگە دەيىن تومەندەتە المايمىز, بىراق مۇنداي شارالار ازاماتتاردىڭ ءبىلىم دەڭگەيىن ارتتىرۋعا ىقپال ەتەدى», - دەيدى دوسجان مۇساليەۆ .
مەملەكەت قازىردىڭ وزىندە مەكتەپتەردە, جوعارى وقۋ ورىندارىندا, سونداي-اق قارتتار مەن الەۋمەتتىك تۇرعىدان وسال توپتارعا ارنالعان ارنايى باعدارلامالاردى ىسكە قوسقان. ەندى بۇل باستاماعا بيزنەس وكىلدەرى دە تارتىلماق.
كيبەرقاۋىپسىزدىك: ءوز دەرەكتەرىمىزدى قالاي قورعايمىز؟
شەنەۋنىكتىڭ ايتۋىنشا, وقۋ كۋرستارىندا ازاماتتارعا كۇماندى سىلتەمەلەرگە وتپەۋ, فيشينگتىك شابۋىلداردى اجىراتا ءبىلۋ ۇيرەتىلەدى. سونىمەن قاتار, پارولدەردى تۇراقتى تۇردە جاڭارتىپ وتىرۋ جانە سەنىمدى انتيۆيرۋستىق باعدارلامالاردى پايدالانۋ تالاپ ەتىلەدى.