ەلىمىزگە بىلىكتى كادرلاردىڭ كەلۋىنە بايلانىستى سوڭعى جىلدارى ماماندار اراسىنداعى كوشى-قون سالدوسى وڭ باعىتقا اۋىسا باستادى. الايدا سوڭعى بەس جىلدا ەلىمىز تەحنيكالىق مامانداردى, ەكونوميستەردى جانە پەداگوگتەردى قوسا العاندا 4 مىڭنان استام ماماندى جوعالتقان, دەپ حابارلايدى Egemen.kz.
ۇلتتىق ستاتيستيكا بيۋروسىنىڭ مالىمەتىنشە, 2025 جىلدىڭ قورىتىندىسى بويىنشا ەلگە 15 جاستان اسقان, كاسىبي ءبىلىمى بار 7,9 مىڭ ادام كەلگەن, ال 3,6 مىڭ ادام ەلدەن كەتكەن. تازا كوشى-قون ءوسىمى 4,2 مىڭ ادامدى قۇرادى.
دەگەنمەن بىلىكتى ماماندار بويىنشا جاعداي ءالى دە كۇردەلى كۇيىندە قالىپ وتىر. 2021-2025 جىلدار ارالىعىندا 15 جاستان اسقان ماماندار اراسىنداعى سىرتقى كوشى-قوننىڭ جيىنتىق سالدوسى نەبارى 374 ادامدى قۇرادى. ياعني ەل بۇرىنعى شىعىندارىنىڭ تەك ءبىر بولىگىن عانا وتەي العان.
ەكونوميكا ءۇشىن ماڭىزدى سالالاردا قازاقستان سوڭعى بەس جىلدا ماماندار تاپشىلىعىن سەزىنگەن. ەڭ ۇلكەن تاپشىلىق تەحنيكالىق كادرلار اراسىندا تىركەلدى: بەس جىل ىشىندە كەتكەندەر كەلگەندەردەن 2,1 مىڭ ادامعا كوپ بولدى.
سونداي-اق ەكونوميستەر, پەداگوگتەر مەن مەديتسينا قىزمەتكەرلەرى اراسىندا مامان جەتىسپەۋشىلىگى تىركەلگەن. ياعني ەل ادامي كاپيتال ساپاسىنا تىكەلەي اسەر ەتەتىن نەگىزگى سالالاردا كادر جوعالتۋدى جالعاستىرعان.
ەندى مەديتسينا تۇلەكتەرىنە رەزيدەنتۋرانى وتپەي-اق جۇمىس ىستەۋىنە رۇقسات بەرىلەدى
ۇلتتىق ستاتيستيكا بيۋروسىنىڭ دەرەگىنە سۇيەنسەك, بيىل وڭ ديناميكا ساقتالىپ وتىر. 2026 جىلدىڭ قاڭتار-ناۋرىز ايلارىندا ەلگە 1,6 مىڭ ادام كەلگەن. الايدا جاعدايدىڭ تۇبەگەيلى وزگەرگەنى تۋرالى ايتۋ ەرتە دەيدى ماماندار.
نەگىزگى ماسەلە سول كۇيىندە قالىپ وتىر. قازاقستان قازىرگى زامانعى ەكونوميكا ءۇشىن اسا ماڭىزدى سالالارداعى كادرلىق شىعىندى تولىق وتەگەن جوق.
ەسكە سالا كەتەيىك, جاۋاپتى مينيسترلىك بۇعان دەيىن كادر تاپشىلىعىن ازايتۋ ماقساتىندا شەتەلدىك مامانداردى جۇمىسقا ورنالاستىرۋدىڭ جەڭىلدەتىلگەن ءتارتىبىن قاراستىرعان بولاتىن.