اتالعان وبلىستىڭ كەلەس اۋدانى ءبىلىم بولىمىنە قاراستى №2 ءو.جانىبەكوۆ اتىنداعى مەكتەپ-گيمنازياسىنىڭ 11-سىنىپ وقۋشىسى ابۋباكىر ارمان ۇلى بىرنەشە حالىقارالىق ءبىلىم گرانتىنا يە بولدى, دەپ حابارلايدى Egemen.kz.
بىلىمگە دەگەن تاباندىلىعى ناتيجەسىندە جاس تۇلەك بەدەلدى جوعارى وقۋ ورىندارىنان شاقىرتۋ الدى. اتاپ ايتقاندا, John Cabot University (يتاليا, ريم) 50% وقۋ گرانتىنا, American University of Paris (فرانتسيا) 70% وقۋ گرانتىنا, LCC International University (ليتۆا) وقۋ ورنىنان جارتىلاي وقۋ گرانتىنا, سونداي-اق Xiamen University Malaysia (مالايزيا) ۋنيۆەرسيتەتىنەن 4 جىلدىق تولىق وقۋ گرانتىنا شاقىرتۋ العان.
«جەتىستىككە جەتۋ جولىندا اتا-اناسىنىڭ قولداۋى مەن ۇستازدارىنىڭ ەڭبەگى, ءتالىم-تاربيەسى ۇلكەن ءرول اتقارعانى ءسوزسىز. اسىرەسە, اعىلشىن ءتىلى ءپانىنىڭ مۇعالىمى ءارى سىنىپ جەتەكشىسى ۇلىقبەك بەرداليەۆتىڭ كاسىبي قولداۋى ەرەكشە اتاپ وتۋگە تۇرارلىق. قازىرگى تاڭدا ابۋباكىر ارمان ۇلى تۇركيا ۇكىمەتىنىڭ Türkiye Bursları حالىقارالىق شاكىرتاقى باعدارلاماسى, بولگارياداعى American University in Bulgaria, سونداي-اق وڭتۇستىك كورەيا ۋنيۆەرسيتەتتەرىنەن دە وڭ ناتيجە كۇتىپ وتىر», دەپ حابارلادى تۇركىستان وبلىسى اكىمىنىڭ ءباسپاسوز قىزمەتى.