قىرعىزستاندا بۇرىنعى جوعارى لاۋازىمدى ءۇش شەنەۋنىك – ۇقك-ءنىڭ ەكس-توراعاسى قامشىبەك تاشيەۆ, بۇرىنعى دەپۋتات كۋرمانكۋل زۋلۋشەۆ جانە جوگوركۋ كەنەشتىڭ ەكس-سپيكەرى نۋرلانبەك شاكيەۆ ىشكى ىستەر مينيسترلىگىندە جاۋاپ الۋعا شاقىرىلدى. بۇل تۋرالى ادۆوكات شەردور ابدىكاپاروۆ مالىمدەدى, دەپ جازادى Egemen.kz.
ولارعا جاپپاي تارتىپسىزدىكتەردى ۇيىمداستىرۋ جانە مەملەكەتتىك توڭكەرىس جاساۋعا ارەكەت رەتىندە باعالانىپ وتىرعان اۋىر قىلمىستىق باپتار بويىنشا ايىپ تاعىلعان.
قىرعىزستان قۇقىق قورعاۋ ورگاندارىنىڭ مالىمەتىنشە, كۇدىكتىلەر ءىىم-ءنىڭ باس تەرگەۋ باسقارماسىندا بىرنەشە ساعات بويى جاۋاپ بەرىپ, كەيىن ۆەدومستۆو عيماراتىنان كەتكەن. ال ازىرگە تاعىلعان ايىپتاردىڭ ناقتى مازمۇنى مەن تەرگەۋ بارىسى رەسمي تۇردە جاريالانباعان.
قامشىبەك تاشيەۆ ۇزاق ۋاقىت ۇزىلىستەن كەيىن العاش رەت رەسمي ءىس-شارادا ءسوز سويلەدى
ايتا كەتەيىك, اقپان ايىندا 75 ادامنىڭ قىرعىزستان پرەزيدەنتى سادىر جاپاروۆ پەن جوگوركۋ كەنەش توراعاسىنا مەرزىمىنەن بۇرىن پرەزيدەنت سايلاۋىن وتكىزۋ تۋرالى ۇندەۋ جولداعانى بەلگىلى بولعان. وسىدان كەيىن ەلدە بىرقاتار كادرلىق وزگەرىس جاسالعان. قامشىبەك تاشيەۆ ۇقك توراعاسى جانە مينيسترلەر كابينەتى توراعاسىنىڭ ورىنباسارى قىزمەتتەرىنەن بوساتىلىپ, ۇقك قۇرىلىمىندا قايتا ۇيىمداستىرۋ جۇرگىزىلگەن. سونداي-اق بىرنەشە جوعارى لاۋازىمدى شەنەۋنىك قىزمەتىنەن ايىرىلىپ, نۋرلانبەك شاكيەۆ جوگوركۋ كەنەش توراعاسى قىزمەتىنەن كەتىپ, دەپۋتاتتىق مانداتىن تاپسىرعان. كۋرمانكۋل زۋلۋشەۆ تە دەپۋتاتتىق مانداتىنان باس تارتقان.
قامشىبەك تاشيەۆ: قىزمەتتەن بوساتىلۋ مەن ءۇشىن كۇتپەگەن شەشىم بولدى
كەيىن بۇل وقيعاعا بايلانىستى قىلمىستىق ءىس قوزعالىپ, «75-ءتىڭ حاتىنا» قول قويعانداردىڭ ءبىر بولىگى تەرگەۋ يزولياتورىنا قامالدى. ولارعا جاپپاي تارتىپسىزدىكتەردى ۇيىمداستىردى دەگەن ايىپ تاعىلعان.