قازاقستاندا تۇتىنۋشىلىق نەسيەلەردىڭ ءوسۋ قارقىنى قارجى رەتتەۋشىلەرىنىڭ ەنگىزگەن شەكتەۋ شارالارىنان كەيىن باياۋلاي باستاعان. ال بيزنەسكە بەرىلەتىن نەسيەلەر كەرىسىنشە جوعارى قارقىنمەن ءوسىپ وتىر. بۇل تۋرالى ۇلتتىق بانك توراعاسى تيمۋر سۇلەيمەنوۆ ءماجىلىس كۋلۋارىندا مالىمدەدى, دەپ حابارلايدى Egemen.kz.
جۋرناليستەر ۇلتتىق بانك باسشىسىنان حالىق پەن بيزنەس اراسىنداعى قارىز جۇكتەمەسىنىڭ ارتۋى جاعدايىندا رەسمي ستاتيستيكانىڭ قانشالىقتى شىنايى ەكەنىن جانە قارجىلىق تۇراقتىلىقتى ساقتاۋ ءۇشىن قانداي شارالار قابىلدانىپ جاتقانىن سۇرادى.
سۇلەيمەنوۆتىڭ ايتۋىنشا, سوڭعى 3-4 جىلدا حالىققا بەرىلەتىن نەسيەلەر جىل سايىن شامامەن 30 پايىزعا ءوسىپ كەلگەن. وسىعان بايلانىستى ۇلتتىق بانك قارجى نارىعىن رەتتەۋ اگەنتتىگىمەن بىرگە تۇتىنۋشىلىق نەسيەلەۋدى شەكتەۋگە باعىتتالعان بىرقاتار شارا قابىلداعان.
اتاپ ايتقاندا, حالىققا بەرىلەتىن نەسيەلەر بويىنشا ارتىق ءوسىمدى تەجەۋ ءۇشىن سەكتورلىق كونترتسيكلدىك كاپيتال بۋفەرى ەنگىزىلگەن.
ماماندار كەڭەسى: نەسيە الاردا نەنى ەسكەرۋ كەرەك؟
سونىمەن قاتار تۇتىنۋشىلىق نەسيەلەردىڭ مەرزىمىنە قويىلاتىن تالاپتار كۇشەيتىلدى. بۇرىن مۇنداي نەسيەلەر 5, 7, ءتىپتى 9 جىلعا دەيىن بەرىلىپ, اي سايىنعى تولەم مولشەرىن ازايتۋ ارقىلى شەكتەۋلەردى اينالىپ وتۋگە مۇمكىندىك بولعان.
بۇدان بولەك سالىقتىق وزگەرىستەر دە ەنگىزىلدى: ەندى بانكتەردىڭ حالىققا بەرگەن نەسيەدەن تۇسەتىن تابىسىنا 25% سالىق سالىنادى, ال بيزنەسكە بەرىلەتىن نەسيەلەر بويىنشا كورپوراتيۆتىك تابىس سالىعى 20% دەڭگەيىندە ساقتالعان.
ۇلتتىق بانك توراعاسىنىڭ ايتۋىنشا, بۇل شارالار بانكتەردى حالىققا قاراعاندا بيزنەسكە كوبىرەك نەسيە بەرۋگە ىنتالاندىرادى.
تابىسىنان 8 ەسە كوپ قارىزى بارلارعا نەسيە بەرىلمەيدى: ۇلتتىق بانك جاڭا شەكتەۋ ەنگىزەدى
قازىرگى دەرەكتەرگە سايكەس, قابىلدانعان شارالاردىڭ ناتيجەسىندە تۇتىنۋشىلىق نەسيەلەردىڭ ءوسۋى شامامەن 10 پايىزعا دەيىن باياۋلاعان, ال بيزنەس نەسيەلەرى شامامەن 18 پايىز قارقىنمەن ءوسىپ كەلەدى.