قارجى ءمينيسترى ءمادي تاكيەۆ ءماجىلىستىڭ جالپى وتىرىسىندا رەسپۋبليكالىق بيۋدجەتتىڭ شىعىستارى 25,5 ترلن تەڭگەنى قۇراعانىن, ونىڭ 9,3 ترلن تەڭگەسى الەۋمەتتىك سالاعا جانە 7,7 ترلن تەڭگەسى وڭىرلەردى قولداۋعا باعىتتالعانىن ايتتى, دەپ حابارلايدى Egemen.kz.
«رەسپۋبليكالىق بيۋدجەت شىعىستارى 99%-عا ورىندالىپ, 25,5 ترلن تەڭگەنى قۇرادى. ۇكىمەت تاراپىنان بارلىق الەۋمەتتىك مىندەتتەمەلەر ورىندالدى. وڭىرلەردى قولداۋعا 7,7 ترلن تەڭگە باعىتتالعان بولسا, الەۋمەتتىك سالاعا 9,3 ترلن تەڭگە جىبەرىلدى», دەدى م. تاكيەۆ.
قارجى ءمينيسترى ۇلتتىق جوبالار شەڭبەرىندە 198 مەكتەپ پەن 655 دەنساۋلىق ساقتاۋ نىسانىنىڭ قۇرىلىسى اياقتالعانىن اتاپ ءوتتى. سونداي-اق ستۋدەنتتەرگە ارنالعان 10 مىڭنان استام ورىنعا 30 جاتاقحانا پايدالانۋعا بەرىلدى.
قارجى مينيسترلىگى: بيۋدجەت كىرىستەرى 21,4 ترلن تەڭگەگە جەتتى
«بارلىق قارجىلاندىرۋ كوزدەرى ەسەبىنەن, 20,1 ملن شارشى مەتر تۇرعىن ءۇي پايدالانۋعا بەرىلدى. حالىقتىڭ الەۋمەتتىك وسال توپتارى ءۇشىن, 5 141 تۇرعىن ءۇي ساتىپ الىندى. ينجەنەرلىك ينفراقۇرىلىمدى دامىتۋ جونىندەگى جۇمىستار جالعاسىپ جاتىر. 980,5 شاقىرىم ينجەنەرلىك – كوممۋنيكاتسيالىق ينفراقۇرىلىم جەلىسى سالىندى. سۋمەن جابدىقتاۋ جانە سۋ بۇرۋ جۇيەلەرىنىڭ 6,3 مىڭ شاقىرىم جەلىسى سالىندى», دەدى مينيستر.
كولىك ينفراقۇرىلىمىنا دا قوماقتى قاراجات جۇمسالدى. 13 مىڭ شاقىرىمعا جۋىق اۆتوجول, ونىڭ ىشىندە 9 مىڭ شاقىرىم رەسپۋبليكالىق ماڭىزى بار جول جانە 4 مىڭ شاقىرىم جەرگىلىكتى ماڭىزى بار اۆتوجول جۇمىستىڭ بارلىق تۇرىمەن قامتىلدى. سونىمەن قاتار الەۋمەتتىك ماڭىزى بار تەمىرجول جانە اۋە باعىتتارىن قولداۋ جۇمىستارى جالعاسىن تاپتى.
مينيستر: مەملەكەتتىك قارىز دەڭگەيى ەكونوميكاعا قاۋىپ توندىرمەيدى