قازاقستاندا زاڭسىز سحەمالار ارقىلى دەكرەتتىك تولەم العان ايەلدەر قاراجاتتى قايتارۋعا مىندەتتەلەدى. بۇل تۋرالى ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ۆيكتوريا شەگاي مالىمدەدى, دەپ حابارلايدى Egemen.kz.
مينيسترلىك مالىمەتىنشە, مامىر ايىنىڭ سوڭىندا دەكرەتتىك تولەم الۋ ءۇشىن جالعان جۇمىسقا ورنالاسۋ بويىنشا ەلىمىزدىڭ 13 وڭىرىندە 38 قىلمىستىق ءىس قوزعالعان. مىڭنان استام ايەل ءىس فيگۋرانتى رەتىندە تانىلىپ, توعىز ءىس بويىنشا سوت ۇكىم شىعارعان.
رەسمي مالىمەت بويىنشا, بۇگىنگى تاڭدا مەملەكەتكە كەلتىرىلگەن شىعىن كولەمى شامامەن 3 ملرد تەڭگەنى قۇرايدى.
«ايەلدەردىڭ سەنىمىن پايدالانىپ, زاڭسىز سحەمالارعا تارتقان تۇلعالارعا باسا نازار اۋدارىلىپ وتىر. قازىرگى تاڭدا ءدال وسى ادامدارعا قاتىستى قىلمىستىق ءىس قوزعالىپ, تەرگەۋ امالدارى جۇرگىزىلىپ جاتىر», دەدى ۆيكتوريا شەگاي.
قازاقستاندا دەكرەتتىك تولەمدەرگە باقىلاۋ كۇشەيەدى
سونىمەن قاتار ول زاڭسىز تولەم العان ايەلدەردىڭ مەملەكەتكە قاراجاتتى وتەۋگە مىندەتتى ەكەنىن اتاپ ءوتتى. ۆيتسە-ءمينيستردىڭ سوزىنشە, زاڭنامادا راقىمشىلىق جاساۋ ارقىلى بۇل مىندەتتەمەدەن بوساتۋ مۇمكىندىگى قاراستىرىلماعان.
ەسكە سالا كەتەيىك, ەلىمىزدە جۇمىس ىستەيتىن انالارعا بالا 1,5 جاسقا تولعانعا دەيىن الەۋمەتتىك تولەم تولەنەدى. مامىر ايىنىڭ باسىنداعى دەرەك بويىنشا ورتاشا تولەم كولەمى 86 062 تەڭگەنى قۇراعان.