ەلىمىزدىڭ ماقتانىشى, حالىقارالىق گروسسمەيستەر ءبيبىسارا اساۋباەۆا جالاقىسىنىڭ 3 ەسەگە قىسقارىپ, جارىستاردىڭ شىعىنىن ءوز قاراجاتى ەسەبىنەن تولەگەنىن ايتىپ مەملەكەت باسشىسىنا ۇندەۋ جولدادى, دەپ حابارلايدى Egemen.kz.
سپورتشى جاقىندا جەڭىمپاز اتانعان Norway Chess ءتۋرينيرىنىڭ وقۋ-جاتتىعۋ جيىندارىنا ءوز قاراجاتىمەن قاتىسقانىن ايتىپ, سەكۋندانتتارىنىڭ ەڭبەكاقىسى ءالى تولىق تولەنبەگەنىن جەتكىزدى.
«ماعان سپورت سالاسىنىڭ باسشىلارىمەن جۇمىس ىستەۋ بارعان سايىن قيىنداپ بارادى. 2023 جىلى الەم چەمپيوناتىنداعى ەكىنشى التىن مەدالىمدى جەڭىپ العاننان كەيىن مينيسترلىك بەكىتكەن 1 ملن تەڭگە كولەمىندە جالاقى الىپ ءجۇردىم. الايدا 2025 جىلدان باستاپ بۇل جالاقى ءۇش ەسە قىسقارتىلدى. قازاقستان شاحمات فەدەراتسياسى تاراپىنان ماعان بۇرىن دا, قازىر دە جالاقى تولەنگەن ەمەس. ال شاحماتتان الەم چەمپيوناتىنداعى جەڭىس ءۇشىن بەرىلەتىن سىياقى نەبارى 2 مىڭ دوللاردى قۇرايدى. بۇل وليمپيادا جۇلدەسى ءۇشىن قاراستىرىلعان 250 مىڭ دوللارلىق سىياقىمەن سالىستىرعاندا الدەقايدا تومەن», دەدى ءبيبىسارا اساۋباەۆا.
شاحماتشى مينيسترمەن كەزدەسۋدە قارجىلاندىرۋ ماسەلەسىن كوتەرىپ, قولداۋ ۋادە ەتىلگەنىن, الايدا بولىنگەن قاراجاتتىڭ تەك ءبىر بولىگى عانا تۇسكەنىن ايتتى.
ءبيبىسارا اساۋباەۆا Norway Chess ءتۋرنيرىنىڭ جەڭىمپازى اتاندى
«قاڭتار ايىندا ءبىز باپكەرىممەن بىرگە مينيسترمەن كەزدەسىپ, فەدەراتسيا بولگەن قاراجاتتىڭ جەتكىلىكسىز ەكەنىن ايتتىق. مينيستر Sport Qory قولداۋ قورى ارقىلى كومەكتەسۋگە ۋادە بەردى. قورعا ءوتىنىم بەرگەنىمىزبەن, تەك قاراجاتتىڭ ءبىر بولىگى عانا ءبولىندى. سونىڭ سالدارىنان سەكۋندانتتار قاشىقتان جۇمىس ىستەۋگە ءماجبۇر بولدى. مەن وسىنداي ماڭىزدى جارىسقا سەكۋندانت ەرتىپ بارا الماعان جالعىز شاحماتشى بولدىم. ناتيجەسىندە تۋرنيردە ەكىنشى ورىن الدىم», دەدى ول.
سونىمەن قاتار سپورتشى II دارەجەلى «بارىس» وردەنىن الۋعا ءتيىس بولسا دا, ماراپاتتاۋ ءراسىمىنىڭ بىرنەشە رەت كەيىنگە شەگەرىلۋىنە بايلانىستى ونى ءالى الا الماعانىن مالىمدەدى.
Norway Chess Women-2026: ءبيبىسارا اساۋباەۆا الەم چەمپيونىن جەڭدى
ايتا كەتەيىك, بۇعان دەيىن مانەرلەپ سىرعاناۋدان وليمپيادا چەمپيونى ميحايل شايدوروۆ اقپان ايىنان بەرى جالاقى الماعانىن مالىمدەگەن بولاتىن. كەيىن بۇل ماسەلەگە قاتىستى تۋريزم جانە سپورت مينيسترلىگى تۇسىنىكتەمە بەرىپ, سپورتشىعا جاڭا كەلىسىمشارت ۇسىنىلعانىن حابارلاعان ەدى. سونداي-اق جاقىندا سپورتشى 30 جاس سپورتشىنىڭ ارقايسىسىنا 200 مىڭ تەڭگەلىك سەرتيفيكات تابىس ەتتى.