الماتى قالاسىندا جول قوزعالىسى ەرەجەلەرىن ورەسكەل بۇزعان BMW كولىگىنىڭ جۇرگىزۋشىسى جازالاندى, دەپ حابارلايدى Egemen.kz.
وقيعا تۇنگى ۋاقىتتا بولعان. قالالىق پوليتسيا دەپارتامەنتىنىڭ مالىمەتىنشە, شامامەن ساعات 03:00-دە جۇرگىزۋشى قالا كوشەلەرىنىڭ بىرىندە دريفت جاساپ, اينالاداعى ادامداردىڭ قاۋىپسىزدىگىنە قاتەر ءتوندىرىپ, قوعامدىق ءتارتىپتى بۇزعان.
قۇقىق قورعاۋ ورگاندارى جۇرگىزۋشىنىڭ جەكە باسىن انىقتاپ, ونى ۇستادى. وعان قاتىستى 6 بىردەي اكىمشىلىك قۇقىق بۇزۋشىلىق بويىنشا حاتتامالار تولتىرىلدى.
كولىك ارنايى ايىپپۇل تۇراعىنا قويىلدى, ال جۇرگىزۋشى سوت شەشىمىمەن اكىمشىلىك قاماۋعا الىندى.
ايتا كەتەيىك, بۇعان دەيىن دە الماتىدا قوعامدىق قاۋىپسىزدىككە قاۋىپ توندىرگەن وسىنداي جاعدايلار تىركەلگەن بولاتىن.
ەسكە سالايىق, استانادا كوپشىلىك سەرۋەندەيتىن ورىنعا كولىكپەن كىرىپ كەتكەن جۇرگىزۋشى جازالاندى.
بۇعان دەيىن ەلوردا كوشەسىندە دە قاۋىپتى دريفت جاساعان شەتەلدىك جۇرگىزۋشى جاۋاپقا تارتىلعان بولاتىن.