ماجىلىستە «پەداگوگ مارتەبەسى جانە ءبىلىم بەرۋ» ماسەلەلەرى بويىنشا زاڭ جوباسى ءبىرىنشى وقىلىمدا قارالىپ جاتىر. ەندى ءبىلىم مەكەمەلەرىندە وقۋشىلارعا سمارتفون قولدانۋعا تىيىم سالىنۋى مۇمكىن, دەپ حابارلايدى Egemen.kz.
دەپۋتات اسحات ايماعامبەتوۆتىڭ ايتۋىنشا, قازىرگى تاڭدا ءار مەكتەپ سمارتفونداردى پايدالانۋ ءتارتىبىن ءوزى انىقتايدى. سول سەبەپتى دەپۋتاتتار بارلىق وقۋ ورىندارى ءۇشىن ورتاق ەرەجە ەنگىزۋدى جانە ءموبيلدى قۇرىلعىلاردى قولدانۋ جونىندەگى شەشىمدى وقۋ-اعارتۋ مينيسترلىگىنە بەرۋدى ۇسىندى.
«مەكتەپتەردە بىرىڭعاي ەرەجە جوق. بۇل تاجىريبە كوپتەگەن مەكتەپ ديرەكتورلارىنىڭ اتا-انالارمەن پىكىرتالاس پەن شاعىمداردان قورقىپ, شەشىم قابىلداۋدان قاشۋىنا اكەلەدى. سونىڭ سالدارىنان ءبىر مەكتەپتە تەلەفونعا تىيىم سالىنسا, ەكىنشىسىندە رۇقسات ەتىلەدى. ءبىز بۇل وكىلەتتىكتى وقۋ-اعارتۋ مينيسترلىگىنە بەرۋدى ۇسىنامىز. مينيسترلىك بارلىق مەكتەپتەرگە ورتاق, تۇسىنىكتى ساياساتتى انىقتايدى», دەدى دەپۋتات اسحات ايماعامبەتوۆ.
اسكەردە تەلەفون قولدانۋ ءتارتىبى جەڭىلدەيدى
سونىمەن قاتار, زاڭ جوباسىندا:
مۇعالىمدەردىڭ وقۋشىلارعا تەك وقۋ پروتسەسى كەزىندە عانا جاۋاپتى بولۋى; پەداگوگتەردىڭ ءبىر مەزەتتە قاعاز جانە ەلەكتروندى ەسەپتى قاتار جۇرگىزبەۋى; اتا-انالاردىڭ بالا ءومىرى, دەنساۋلىعى جانە قاۋىپسىزدىگى ءۇشىن جاۋاپكەرشىلىگىن كەڭەيتۋ قاراستىرىلعان.ءبىلىم بەرۋ جانە پەداگوگ مارتەبەسى تۋرالى زاڭ جوباسى قازىر ءبىرىنشى وقىلىمدا قارالىپ جاتىر. الدا ءماجىلىستىڭ ەكىنشى وقىلىمى, سەناتتىڭ قاراۋى جانە پرەزيدەنتتىڭ قول قويۋى كۇتىلەدى.