استاناداعى كەيبىر تانىمال مەيرامحانالاردا كەلۋشىلەرگە ۇسىنىلعان تاعامدارداعى تارتىلعان فارش قۇرامىنا يت ەتى قوسىلعانى تۋرالى مالىمدەمە جاسالدى. بۇل تۋرالى ەكولوگتار مەن جانۋارلاردى قورعاۋشىلار «چەستنو گوۆوريا» پودكاستى بارىسىندا ايتتى. ولاردىڭ سوزىنشە, بۇل دەرەك ەكى جىل بۇرىن سوتتا دالەلدەنگەن, دەپ حابارلايدى Egemen.kz.
قوعام بەلسەندىسى سەرگەي سنەگيرەۆ قازاقستاندا قوعامدىق تاماقتانۋ ورىندارىنا ارنالعان يت ەتىن جاسىرىن دايىندايتىن كولەڭكەلى بيزنەس جىلدار بويى جۇمىس ىستەپ كەلگەنىن مالىمدەدى. ونىڭ ايتۋىنشا, استاناداعى بىرقاتار تانىمال فرانشيزالار قۇرامىنا يت ەتى ارالاستىرىلعان فارشتى ساتىپ العان.
بەلسەندىنىڭ سوزىنشە, بۇل ءىس بويىنشا جۇرگىزىلگەن باقىلاۋ ساتىپ الۋ كەزىندە ساتۋشى ەڭ از پارتيا رەتىندە 100 كەلى ەت ۇسىنعان. كەيىن ونىڭ ۇيىندە جۇرگىزىلگەن ءتىنتۋ بارىسىندا 750 كەلى يت ەتى تاركىلەنگەنى ايتىلدى. تەرگەۋ نۇسقاسىنا سايكەس, ول ەت باسقا ونىمدەرگە ارالاستىرۋ ءۇشىن دايىندالعان.
سونىمەن قاتار زووبەلسەندى تەمىرلان توسپاەۆ ورال قالاسىندا قاڭعىباس جانۋارلاردى اۋلاۋ تەندەرىن جەرگىلىكتى ەت وڭدەۋ كاسىپورنى جەڭىپ العانىن ايتتى. قالا اكىمدىگى مۇنى مەملەكەتتىك ساتىپ الۋ تۋرالى زاڭ تالاپتارىمەن تۇسىندىرگەن. رەسمي مالىمەتكە سايكەس, يت اۋلاۋمەن اينالىسۋعا نيەت بىلدىرگەن جالعىز مەكەمە وسى بولعان.
پودكاست قاتىسۋشىلارى بىرنەشە جىل بۇرىن الماتى وبلىسى اۋماعىندا بولعان وقيعانى دا ەسكە الدى. ول كەزدە ەرىكتىلەر يتتەردى جاپپاي ولتىرگەن ورىندى انىقتاعان. وندا قاڭعىباس جانە ءۇي جانۋارلارى ارالاس ۇستالعان, كەيبىرىنىڭ موينىندا قارعىباۋى دا بولعان. ايەلدەردىڭ ءبىرى سول جەردەن ءوز يتىنە ۇقساس جانۋاردى تانىعانى ايتىلدى.
سنەگيرەۆ سونداي-اق قاڭعىباس جانۋارلاردى ەۆتانازيالاۋدى بەلسەندى تۇردە قولداعان دەپۋتات ەدىل جاڭبىرشين تۋرالى پىكىر ءبىلدىردى. ول دەپۋتاتتىڭ ادام ءومىرى يتتەن ماڭىزدىراق ەكەنىن جانە قاڭعىباس جانۋارلار كوبىنەسە ايەلدەر مەن بالالارعا شابۋىل جاسايتىنىن بىرنەشە رەت ايتقانىن تىلگە تيەك ەتتى.
بەلسەندى دەپۋتاتتىڭ جانۋارلارعا جاۋاپكەرشىلىكپەن قاراۋ تۋرالى زاڭعا وزگەرىستەر ەنگىزۋ جۇمىسىن باسقارۋىنا كۇمان كەلتىرىپ, ونى بۇل سالادا قۇزىرەتتى ەمەس دەپ ەسەپتەيتىنىن جەتكىزدى.
ەسكە سالايىق, الماتىدا تانىمال ءدامحانانىڭ بىرىندە سامسانىڭ ىشىنەن ۆەتەرينارلىق چيپ تابىلعان بولاتىن.