نيگەريانىڭ وڭتۇستىك-باتىسىندا قارۋلى توپتار 39 وقۋشى مەن جەتى مۇعالىمدى ۇرلاپ كەتتى, دەپ حابارلايدى Egemen.kz.
شابۋىل بىردەن ءۇش ءبىلىم بەرۋ مەكەمەسىنە – كوللەدج بەن ەكى باستاۋىش مەكتەپكە جاسالعان. Reuters اگەنتتىگىنىڭ مالىمەتىنشە, قارۋلى شابۋىل كەزىندە قاسكويلەر وقۋ ءىسىنىڭ مەڭگەرۋشىسىن جانە كەزدەيسوق ءوتىپ بارا جاتقان تۇرعىندى اتىپ ولتىرگەن. كەيىن تۇتقىندا بولعان تاعى ءبىر مۇعالىم دە قازا تاپقان.
كەپىلگە الىنعانداردى قۇتقارۋ وپەراتسياسى بارىسىندا ارنايى جاساق قولدان جاسالعان جارىلعىش قۇرىلعىلارعا تاپ بولىپ, بىرنەشە قۇقىق قورعاۋ قىزمەتكەرى جاراقات الدى.
جەرگىلىكتى باق-تىڭ حابارلاۋىنشا, وسى ىسكە قاتىسى بار دەگەن كۇدىكپەن التى ادام ۇستالعان. الايدا ۇرلانعان بالالار ءالى كۇنگە دەيىن بوساتىلعان جوق. ولاردى قۇتقارۋ وپەراتسياسى جالعاسىپ جاتىر.
ايتا كەتەيىك, كولۋمبيادا قارۋلى توپتار اراسىنداعى قاقتىعىستا 30 ادام قازا تاپتى.
بۇعان دەيىن تۇركيانىڭ يزمير قالاسىندا ءبىلىم وشاعىنا قارۋلى شابۋىل جاساماق بولعان سەگىز ادامنان تۇراتىن توپ قولعا ءتۇستى.