تۇرمىستا ءجيى پايدالاتىن 30 بۇيىمنىڭ اتاۋى قازاقشالاندى. احمەت بايتۇرسىن ۇلى اتىنداعى ءتىل ءبىلىمى ينستيتۋتى «تۇرمىستىق زات اتاۋلارى شەبەرحاناسى» رەسپۋبليكالىق بايقاۋىنىڭ قورىتىندىسىن جاريالادى. بايقاۋ اياسىندا قازاقستاندىقتار تۇرمىستا ءجيى قولدانىلاتىن 30 زاتتىڭ قازاقشا بالامالارىن ۇسىندى, دەپ جازادى Egemen.kz.
بايقاۋ ناتيجەسى بويىنشا ءى ورىندى اقمارال سەرىكباەۆا يەلەندى, ال ەكىنشى ورىندى اقسۇڭقار الماعان مەن ابدۋللا ريزابەك ۇلى بولىسكەن. ءۇشىنشى ورىن مىنبەرىنەن ءۇش جۇلدەگەر كورىندى, ولار – اقبوتا شاريبەكوۆا, كوكبورى مۇباراك جانە سانجار قاسكەەۆ.
بايقاۋ جەڭىمپازدارى مەن جۇلدەگەرلەرى ۇسىنعان ۇزدىك بالاما اتاۋلار تومەندەگىدەي:
كرەسلو – ارقاجاي, وتىرعى. جاليۋزي – كۇنۇزىك, كۇنقاعار, كۇنپەردە, شاپاق, ايقارا. كومود – تولاپشا, سۋىرما, كەبەجە, قارشى. پروستىنيا – جابىن. پودودەيالنيك – كورپەقاپ, كورپەتىس, سەيسەپ. ودەيالو – كۇربىك, كورپە, جامشى. تۋمبوچكا – جاندىقشا, قوبدي, تارتپا. راكوۆينا – قولجۋعىش, شۇڭعىلتاس, شۇڭعىلشا. ۋدلينيتەل – توقسىم, ۇزارتوق. ميكسەر – شايقاۋىش, بۇلعاۋىش, ارالاستىرعى. سوكوۆىجيمالكا – سىعىن, شىرىنسىققىش, شىرىنسىققى. گريلنيتسا – قاقتاق, قاقتاعىش, تورتابا. تەرموكرۋجكا – تەرموقۇتى, كۇيساقتار. وتپاريۆاتەل – بۋۇتىك, بۋساپ. مۋلتيۆاركا – توققازان, پىسقازان. مانتوۆاركا – بۋقازان, قاسقان. پلەد – وراش, جامىلعى. ۆىتياجكا – اۋالىق, اۋاسورعى. شلاگباۋم – توسسىرىق, الاسىرىق, توسپا, جولتوسار. فولگا – ءۇلدىر, جۇقالتىر. دۋرشلاگ – سۇزگىش. تەركا – ۇگىتەك, ۇككىش. كوسياك – جاقتاۋ. كارنيز – سىرىق. پلينتۋس – جيەك. گاردينا – جەلپىشە. كونتەينەر – اسقوراپ, اسساۋىت. روزەتكا – توقۇيا. دوموفون – ۇنقاقپا, شاقىراۋىق, ەسىك قوڭىراۋى, ۇيسىڭعىر, ءۇندى, ۇنقات. كونديتسيونەر – سامالداتقىش, اۋا باپتاعىش, اۋاباپ, اۋالەپ.ايتا كەتەيىك, ەلىمىزدە «اليسامەن» قازاقشا سويلەسەتىن قولدانۋشىلار سانى 30%-عا ارتتى.