الماتى قالاسىندا «STOP بۇزۋشىلىق» اۋقىمدى جەدەل الدىن الۋ ءىس-شاراسى اياسىندا جولداردا جاسىرىن پاترۋلدەۋ فورماتى ەنگىزىلگەن بولاتىن. وسى جۇيە قوعامدا قىزۋ تالقىلانىپ جاتىر. ءبىرى مۇنى جولداعى ءتارتىپتى كۇشەيتۋدىڭ ءتيىمدى ءتاسىلى دەسە, ەندى ءبىرى جۇرگىزۋشىلەرگە باقىلاۋدىڭ ارتۋى رەتىندە قابىلدايدى. وسىعان بايلانىستى Egemen.kz رەداكتسياسى ىشكى ىستەر مينيسترلىگىنە رەسمي ساۋال جولداپ, جاڭا جۇيەنىڭ ماقساتى مەن تيىمدىلىگىن زەردەلەپ كوردى.
ىشكى ىستەر مينيسترلىگىنىڭ مالىمەتىنشە, الماتى قالاسىندا جاسىرىن پاترۋلدەۋ جۇيەسىن ەنگىزۋدەگى باستى ماقسات – جول قوزعالىسى قاۋىپسىزدىگىن كۇشەيتىپ, قوعامدىق ءتارتىپتى باقىلاۋدىڭ تيىمدىلىگىن ارتتىرۋ. بۇل ءتاسىل اسىرەسە كوزگە بىردەن بايقالا بەرمەيتىن قاۋىپتى قۇقىقبۇزۋشىلىقتاردى انىقتاۋعا باعىتتالعان.
«جاسىرىن پاترۋلدەۋ اگرەسسيۆتى جۇرگىزۋدى ازايتۋعا, جول-كولىك وقيعالارىنىڭ الدىن الۋعا, قاۋىپتى مانەۆرلەر مەن جىلدامدىقتى شامادان تىس اسىرۋ فاكتىلەرىن انىقتاۋعا مۇمكىندىك بەرەدى. جۇيەنىڭ نەگىزگى ەرەكشەلىگى – جۇرگىزۋشىلەردىڭ شىنايى مىنەز-قۇلقىن باقىلاۋ», دەپ ءتۇسىندىردى مينيسترلىك.
مينيسترلىك وكىلدەرىنىڭ سوزىنشە, اشىق پاترۋلدىك كولىكتەردى كورگەن جۇرگىزۋشىلەر ۋاقىتشا ءتارتىپ ساقتاۋعا تىرىسقانىمەن, جاسىرىن باقىلاۋ كەزىندە ولاردىڭ كۇندەلىكتى جۇرگىزۋ مادەنيەتى ناقتى كورىنەدى.
باقىلاۋ ما الدە قىسىم با؟قوعامدا جاڭا جۇيەگە قاتىستى كۇمان دە جوق ەمەس. اسىرەسە جۇرگىزۋشىلەر اراسىندا «جاسىرىن پاترۋل قىسىم كورسەتۋ قۇرالىنا اينالماي ما؟» دەگەن پىكىر ءجيى ايتىلادى.
الايدا مينيسترلىك مۇنداي پىكىرمەن كەلىسپەيدى.
«جاسىرىن پاترۋل جۇرگىزۋشىلەردىڭ قۇقىقتارىن شەكتەۋگە ەمەس, قۇقىقبۇزۋشىلىقتاردى وبەكتيۆتى تىركەۋگە باعىتتالعان باقىلاۋ مەحانيزمى. بارلىق قۇقىقبۇزۋشىلىق بەينەتىركەۋ قۇرىلعىلارى ارقىلى جازىلادى. ۆيدەودا ۋاقىت, ورىن, كولىك ءنومىرى جانە قۇقىقبۇزۋشىلىق انىق كورىنۋى ءتيىس», دەلىنگەن مينيسترلىكتىڭ جاۋابىندا.
سونداي-اق قۇقىقبۇزۋشىلىقتى تىركەۋ كەزىندە راسىمدىك تالاپتاردىڭ تولىق ساقتالاتىنى ايتىلدى. ەگەر بەينەجازبا ساپاسىز بولىپ, كولىك ءنومىرى انىق كورىنبەسە, ونىڭ زاڭدىق كۇشى بولمايدى.
مينيسترلىك جۇرگىزۋشىگە بەينەدالەلدەردى كورسەتۋ اكىمشىلىك پروتسەستىڭ مىندەتتى بولىگى ەكەنىن اتاپ ءوتتى. بۇل ازاماتتىڭ ءوز قۇقىعىن قورعاۋىنا مۇمكىندىك بەرەدى.
دەرەكتەر قالاي قورعالادى؟جاسىرىن پاترۋل جۇيەسىندە جينالاتىن بەينەماتەريالدار مەن ازاماتتاردىڭ جەكە دەرەكتەرى ارنايى قورعاۋدا بولادى.
«ازاماتتاردىڭ جەكە دەرەكتەرى زاڭنامالىق, تەحنيكالىق جانە ۇيىمداستىرۋشىلىق شارالار كەشەنى ارقىلى قورعالادى», دەپ مالىمدەدى ءىىم.
ۆەدومستۆونىڭ حابارلاۋىنشا, جۇيەنى ەنگىزۋ تۋرالى شەشىم جول-كولىك وقيعالارىنىڭ ستاتيستيكالىق تالداۋى, پيلوتتىق جوبالاردىڭ ناتيجەلەرى جانە قاۋىپ-قاتەردى باعالاۋ زەرتتەۋلەرىنىڭ نەگىزىندە قابىلدانعان.
جۇيە باسقا وڭىرلەرگە دە ەنگىزىلە مە؟مينيسترلىك الداعى ۋاقىتتا جاسىرىن پاترۋلدەۋ تاجىريبەسىن ەلىمىزدىڭ بارلىق وبلىستارى مەن قالالارىندا كەزەڭ-كەزەڭىمەن ەنگىزۋ جوسپارلانىپ وتىرعانىن جەتكىزدى.
سونىمەن قاتار قوعام تاراپىنان تۋىنداعان نارازىلىقتار مەن سىن-پىكىرلەردى ازايتۋ ءۇشىن الەۋمەتتىك جەلىلەردە جانە بۇقارالىق اقپارات قۇرالدارىندا ءتۇسىندىرۋ جۇمىستارى جۇرگىزىلىپ جاتقانى ايتىلدى.
ءىىم مالىمەتىنشە, جۇيەنىڭ تيىمدىلىگى تەك ايىپپۇل سانىنىڭ ارتۋىمەن ەمەس, اۋىر جول اپاتتارىنا اكەلەتىن قۇقىقبۇزۋشىلىقتاردىڭ ازايۋىمەن باعالانباق.
تۇرعىندار نە دەيدى؟الماتىلىق جۇرگىزۋشى نۇرجان ءابىلوۆ جاسىرىن پاترۋلدەۋ جۇيەسىن قولدايتىنىن ايتادى.
«كەي جۇرگىزۋشىلەر پوليتسيانى كورمەسە, ەرەجەنى ورەسكەل بۇزادى. اسىرەسە اۆتوبۋس جولاعىنا شىعىپ كەتۋ, قاۋىپتى مانەۆر جاساۋ جيىلەپ كەتتى. ەگەر جاسىرىن باقىلاۋ ءتارتىپتى كۇشەيتسە, ونىڭ پايداسى بار دەپ ويلايمىن», دەيدى ول.
ال قالا تۇرعىنى ايدانا سەرىكقىزى كەرىسىنشە, جۇيەنىڭ اشىقتىعىنا قاتىستى كۇمان بارىن جاسىرمايدى.
«جۇرگىزۋشى ءاردايىم باقىلاۋدا جۇرگەندەي سەزىنەدى. مۇنداي جۇيە ەنگىزىلسە, ونىڭ جۇمىسى بارىنشا اشىق ءارى تۇسىنىكتى بولۋى كەرەك. ايتپەسە قوعامدا سەنىم ازايادى», دەيدى تۇرعىن.
قالاي بولعاندا دا, جاسىرىن پاترۋلدەۋ جۇيەسى قوعامدا ەكىۇشتى پىكىر قالىپتاستىردى. ءبىر تاراپ ونى جول قاۋىپسىزدىگىن ارتتىرۋدىڭ ءتيىمدى قۇرالى دەپ ەسەپتەسە, ەكىنشى تاراپ ازاماتتاردىڭ قۇقىعى مەن اشىقتىق ماسەلەسىنە الاڭدايدى. ال جۇيەنىڭ ناقتى ناتيجەسى ۋاقىت وتە جول-كولىك وقيعالارى ستاتيستيكاسىنان كورىنبەك.