پارلامەنت ەكىنشى وقىلىمدا كونستيتۋتسيا نورمالارىن ىسكە اسىرۋ ءۇشىن ازىرلەنگەن «قازاقستان حالىق كەڭەسى تۋرالى» كونستيتۋتسيالىق زاڭدى قابىلدادى. قۇجات حالىقتىڭ مۇددەلەرىن ءبىلدىرۋدى قامتاماسىز ەتۋگە, مەملەكەتتىك ساياساتتى قالىپتاستىرۋعا جانە ىسكە اسىرۋعا قوعامنىڭ قاتىسۋ تەتىكتەرىن دامىتۋعا باعىتتالعان جاڭا ينستيتۋتتى بەكىتەدى, دەپ حابارلايدى Egemen.kz ءماجىلىستىڭ ءباسپاسوز قىزمەتىنە سىلتەمە جاساپ.
زاڭ قازاقستان حالىق كەڭەسىنىڭ جوعارى كونستيتۋتسيالىق كونسۋلتاتيۆتىك ورگان رەتىندەگى قۇقىقتىق مارتەبەسىن ايقىندايدى. ۇسىنىلعان ينستيتۋت كەلىسىلگەن ۇسىنىستار مەن ۇسىنىمدار ازىرلەۋ الاڭى رەتىندە ارەكەت ەتەدى.
قازاقستان حالىق كەڭەسىنە ىشكى ساياساتتىڭ نەگىزگى باعىتتارى بويىنشا ۇسىنىستار ازىرلەۋ, قۇرىلتايعا زاڭ جوبالارىن ەنگىزۋ, جالپىحالىقتىق رەفەرەندۋم وتكىزۋ تۋرالى باستاما كوتەرۋ, سونداي-اق مەملەكەت پەن ازاماتتىق قوعام اراسىنداعى ديالوگتى قامتاماسىز ەتۋ وكىلەتتىكتەرى بەرىلەدى. سونىمەن قاتار, وعان الەمدىك جانە ءداستۇرلى دىندەر كوشباسشىلارىنىڭ سەزىن ۇيىمداستىرۋ جانە وتكىزۋ فۋنكتسياسى جۇكتەلىپ وتىر.
پارلامەنت «قازاقستان حالىق كەڭەسى» تۋرالى زاڭدى ماقۇلدادى
قوعامنىڭ نەگىزگى توپتارى – ەتنومادەني بىرلەستىكتەردىڭ, قوعامدىق ۇيىمداردىڭ جانە كوممەرتسيالىق ەمەس سەكتوردىڭ, سونداي-اق ءماسليحاتتار مەن قوعامدىق كەڭەستەردىڭ تەڭگەرىمدى وكىلدىگى كوزدەلەدى, ارقايسىنان 42 ادامنان بولادى. ولارعا قويىلاتىن تالاپتار, قۇقىقتارى مەن مىندەتتەرى بولەك رەتتەلەدى.
سونىمەن قاتار زاڭ بويىنشا قازاقستان حالىق كەڭەسىنىڭ ناقتى ۇيىمداستىرۋشىلىق مودەلى قالىپتاسادى. نەگىزگى ماسەلەلەر بويىنشا شەشىم قابىلدايتىن سەسسيا ونىڭ جوعارعى ورگانى بولادى. جەكەلەگەن ناقتى باعىتتاردى پىسىقتاۋ ءۇشىن تۇراقتى جانە ۋاقىتشا كوميتەتتەر, سالالىق كوميسسيالار مەن جۇمىس توپتارىن قۇرۋ كوزدەلىپ وتىر. ال جۇمىستى ۇيىمداستىرۋشىلىق جانە تالدامالىق تۇرعىدا قولداۋدى مەملەكەتتىك ورگان رەتىندە قۇرىلاتىن قازاقستان حالىق كەڭەسىنىڭ حاتشىلىعى قامتاماسىز ەتەدى.
«قازاقستان حالىق كەڭەسى» مۇشەلەرىنىڭ وكىلەتتىك مەرزىمى 4 جىل بولادى