پارلامەنت «قازاقستان رەسپۋبليكاسىنىڭ قۇرىلتايى جانە ونىڭ دەپۋتاتتارىنىڭ مارتەبەسى تۋرالى» كونستيتۋتسيالىق زاڭدى ەكىنشى وقىلىمدا قابىلدادى. قۇجات 2026 جىلعى 15 ناۋرىزدا رەسپۋبليكالىق رەفەرەندۋمدا قابىلدانعان جاڭا كونستيتۋتسيانىڭ ەرەجەلەرىن ىسكە اسىرۋ ماقساتىمەن ازىرلەنگەن, دەپ حابارلايدى Egemen.kz.
زاڭ ءبىر پالاتالى پارلامەنت – قۇرىلتايدىڭ كونستيتۋتسيالىق-قۇقىقتىق نەگىزدەرىن بەكىتىپ, ونىڭ مەملەكەتتىك بيلىك ورگاندارى جۇيەسىندەگى ورنىن, قىزمەت پرينتسيپتەرىن, قۇرىلىمىن, قۇرىلۋ ءتارتىبىن جانە وكىلەتتىكتەرىن جۇزەگە اسىرۋ فورمالارىن ايقىندايدى.
جاڭا زاڭ شىعارۋشى ورگان بەس جىل مەرزىمگە سايلاناتىن 145 دەپۋتاتتان تۇرادى. ولاردىڭ مارتەبەسى, قۇقىقتارى مەن مىندەتتەرى, سونىڭ ىشىندە دەپۋتاتتىق بىرلەستىكتەردى, پارلامەنتتىك كوپشىلىك پەن وپپوزيتسيانى قۇرۋ ماسەلەلەرى, سونداي-اق دەپۋتاتتىق ادەپ قاعيدالارى بەكىتىلەدى.
سونىمەن قاتار زاڭ شىعارۋ باستاماسى قۇقىعىنا يە سۋبەكتىلەر قاتارى كەڭەيتىلىپ, وعان قازاقستان حالىق كەڭەسى ەنگىزىلدى, بۇل قۇقىق قۇرىلتايعا ءتيىستى شەشىم ەنگىزۋ ارقىلى جۇزەگە اسىرىلادى.
پارلامەنت «پرەزيدەنت تۋرالى» كونستيتۋتسيالىق زاڭدى ەكىنشى وقىلىمدا قابىلدادى
قابىلدانعان كونستيتۋتسيالىق زاڭ قۇرىلتايدىڭ ۇكىمەتپەن ءوزارا ءىس-ارەكەت جاساۋ ءتارتىبىن, سونىڭ ىشىندە ۇكىمەت مۇشەلەرى لاۋازىمىنا تاعايىنداۋ ءۇشىن كانديداتتارعا قاتىستى كونسۋلتاتسيالار وتكىزۋدى, ولاردىڭ ەسەپتەرىن تىڭداۋدى جانە تاعى باسقالارىن بەلگىلەيدى. سونداي-اق مەملەكەتتىك بيۋدجەت شىعىستارىن قاراستىراتىن دەپۋتاتتىق باستامالار بويىنشا ۇكىمەتتىڭ قورىتىندىلارىن ءۇش ايلىق مەرزىمدە ۇسىنۋ ءتارتىبى بەلگىلەنەدى.
اتالعان زاڭ اياسىندا قۇرىلتايدىڭ قازاقستان پرەزيدەنتىنە ۆيتسە-پرەزيدەنت, پرەمەر-مينيستر, كونستيتۋتسيالىق سوتتىڭ سۋديالارى, ورتالىق سايلاۋ كوميسسياسى مەن جوعارى اۋديتورلىق پالاتانىڭ مۇشەلەرى لاۋازىمىنا تاعايىنداۋعا كەلىسىم بەرۋى بەلگىلەنەدى.
سونداي-اق پرەزيدەنتتىڭ ۇسىنۋى بويىنشا قۇرىلتاي دەپۋتاتتارىنا قازاقستان رەسپۋبليكاسى جوعارعى سوتىنىڭ سۋديالارىن سايلاۋ وكىلەتتىگىن بەرۋ ۇسىنىلدى. بۇدان بولەك, زاڭدا قۇرىلتايدىڭ كونستيتۋتسيالىق سوت پەن جوعارعى سوت سۋديالارىن قول سۇعىلماۋشىلىق قۇقىعىنان ايىرۋ تەتىگى تۋرالى نورمالار كورىنىس تاپقان.