ارگەنتينادا ديماش قۇدايبەرگەننىڭ جانكۇيەرلەرى ەرەكشە قايىرىمدىلىق جوباسىن باستادى. بۇل جوبا مەكتەپتەرگە مۋزىكالىق اسپاپتار الىپ بەرۋگە جانە بالالاردىڭ مۋزىكامەن اينالىسۋىنا كومەكتەسۋگە باعىتتالعان, دەپ حابارلايدى Egemen.kz.
العاشقى كومەك ارگەنتيناداعى مار-دەل-پلاتا قالاسىنداعى گەنەرال حوسە دە سان-مارتين اتىنداعى №5 باستاۋىش مەكتەپكە كورسەتىلدى. جانكۇيەرلەر اسپاپتاردى جەتكىزۋ ءۇشىن 400 شاقىرىمنان استام جول جۇرگەن.
مەكتەپتە ارنايى مەرەكەلىك ءىس-شارا ۇيىمداستىرىلدى. وندا وقۋشىلار مەن مۇعالىمدەرگە ديماشتىڭ شىعارماشىلىق جولى تانىستىرىلىپ, قازاقستاننىڭ مادەنيەتى مەن ءداستۇرى تۋرالى ايتىلدى. سونىمەن قاتار ۇلتتىق كيىمدەر مەن اقپاراتتىق ستەندتەردەن تۇراتىن كورمە جاسالدى.
ەڭ ەرەكشە ساتتەردىڭ ءبىرى – مۋزىكالىق كابينەتكە ديماش قۇدايبەرگەننىڭ ەسىمىن بەرۋ بولدى. بۇل ارگەنتينا مەكتەپتەرى ءۇشىن سيرەك جاعداي, ويتكەنى مۇنداي اتاۋ ادەتتە تەك ومىردەن وتكەن تانىمال تۇلعالارعا بەرىلەدى. بىراق بۇل جولى ديماشتىڭ الەمدىك مادەنيەتكە قوسقان ۇلەسى ەسكەرىلگەن.
ۇيىمداستىرۋشىلاردىڭ ايتۋىنشا, بۇل جوبا الداعى ۋاقىتتا ارگەنتينانىڭ باسقا دا مەكتەپتەرىندە جالعاسادى. ولار مۋزىكا بالالاردى بىرىكتىرىپ, شابىت بەرەتىنىن اتاپ ءوتتى.
مەكسيكاداعى قازاقتانۋ: ماعجاننان ديماشقا دەيىن
ءىس-شارا سوڭىندا مەكتەپ وكىلدەرى ۇيىمداستىرۋشىلارعا العىس حاتتار مەن ەستەلىك سىيلىقتار تابىس ەتتى.