قازاقستاندىق سپورتتىق سكالولازۋ وكىلى ريشات حايبۋللين 2026 جىلى قىتايدىڭ سانيا قالاسىندا وتكەن ازيا جاعاجاي ويىندارىندا قولا جۇلدەگەر اتاندى, دەپ حابارلايدى Egemen.kz.
ريشات جارىستىڭ جەكە سايىسىندا ەل نامىسىن قورعاپ, جاقسى ناتيجە كورسەتتى.
1/8 فينالدا ول ءوز كوماندالاسى دامير توقتاروۆتى جەڭدى. كەيىن قىتاي سپورتشىسى تسزيان گونى دا باسىپ وزدى.
جارتىلاي فينالدا حايبۋللين يندونەزيا وكىلى روببي ال حيلميدەن جەڭىلىپ قالدى. ال قولا مەدال ءۇشىن وتكەن سايىستا قىتاي سپورتشىسى شوۋحۋن چۋدى 4.81 سەكۋند ناتيجەمەن جەڭىپ, ءۇشىنشى ورىندى يەلەندى.
ايەلدەر اراسىنداعى قازاقستان چەمپيوناتى: 19 كوماندا باستى جۇلدەگە تالاسادى
سپورتشى Olympic.kz سايتىنا بەرگەن سۇحباتىندا ءوز ناتيجەسىنە ريزا ەكەنىن ايتقان.
«شىنىمدى ايتسام, وتە ريزامىن. ماۋسىمنىڭ باسى ءساتتى بولمادى, فورمادا بولعان جوقپىن. بىراق ازيا ويىندارىنا دەيىن ءوزىمدى قالىپقا كەلتىرىپ, جاقسى دەڭگەيگە شىعارا الدىم. قازىرگى دايىندىعىممەن ەسەپتەگەندە, وتە جاقسى ونەر كورسەتتىم. قازاقستان رەكوردىن دا, جەكە رەكوردىمدى دا جاڭارتتىم, ءارى قولا مەدال جەڭىپ الدىم.
بۇگىنگى جارىستاردىڭ كوبىن جاقسى وتكىزدىم دەپ ويلايمىن. فينالعا شىعۋعا مۇمكىندىك بولدى, بىراق بۇل سپورتتا ءبارى بولجامسىز. جارتىلاي فينالدا قولىم سىرعىپ كەتتى. سوعان قاراماستان, جالپى ناتيجەمدى جاقسى دەپ باعالايمىن.
ماعان قارسىلاس كىم ەكەنى اسا ماڭىزدى ەمەس, مەن وزىممەن ءوزىم باسەكەلەسەمىن, ەڭ جاقسى ناتيجەمدى كورسەتكىم كەلەدى. ەندى دەمالىپ, كۇش جيناۋ كەرەك. ەرتەڭ ەستافەتا جارىسى بار, ودان ءارى كۇرەسەمىن», دەدى حايبۋللين.
وسىلايشا قازاقستان قۇراماسىنىڭ قورجىنىندا مەدال سانى التىعا جەتتى. بۇعان دەيىن نۇرجان باتىربەكوۆ التىن مەدال, ايەلدەر قۇراماسى سۋ دوبى بويىنشا كۇمىس, ال باتىر تەڭىزباي, سەيىلحان بولاتبەك جانە ءالينۇر قۋات ۇلى دجيۋ-دجيتسۋدان قولا مەدال العان بولاتىن.
ايتا كەتەيىك, ەرلەر مەن ايەلدەر اراسىنداعى ەستافەتا جارىستارى 29 ساۋىردە وتەدى. ىرىكتەۋ كەزەڭى استانا ۋاقىتىمەن 05:30-دا باستالادى.