قىزىلوردادا جاڭا تۋعان ءسابيىن ساتپاق بولعان انا ۇستالدى. بۇل تۋرالى ىشكى ىستەر مينيسترلىگى مالىمدەدى, دەپ حابارلايدى Egemen.kz.
ىشكى ىستەر مينيسترلىگى رەسپۋبليكا اۋماعىندا «STOP ترافيك» اتتى كەزەكتى اۋقىمدى جەدەل-پروفيلاكتيكالىق ءىس-شارا ۇيىمداستىرىپ, ادام ساۋداسىنا قاتىستى 41 قىلمىس تىركەدى. ونىڭ ىشىندە كامەلەتكە تولماعاندارعا قاتىستى 9 دەرەك بار.
«قىزىلوردا وبلىسىندا جاڭا تۋعان ءسابيدى ساتۋ سحەماسى انىقتالدى. بەلگىلى بولعانداي, 25 جاستاعى ايەل بالا تۋعانعا دەيىن دە, تۋعاننان كەيىن دە ارنايى قوعامدىق قوردا تۇرعان. ونىڭ بالادان باس تارتۋىنا بايلانىستى قور جەتەكشىسى دەلدال رەتىندە ءسابيدى وبلىستىڭ 50 جاستاعى تۇرعىنىنا 1 ميلليون تەڭگەگە اسىراپ الۋ ءۇشىن ساتۋدى ۇسىنعان. قازىرگى ۋاقىتتا ۇشەۋى دە ۋاقىتشا ۇستاۋ يزولياتورىنا قامالدى», دەپ مالىمدەدى ءىىم-ءنىڭ ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.
پاۆلوداردا جاڭا تۋعان ءسابيىن 800 مىڭ تەڭگەگە ساتپاق بولعان ايەل ۇستالدى
سونىمەن قاتار, تەكسەرۋ جۇمىستارى ناتيجەسىندە الماتى قالاسىندا ادامداردى قىلمىستىق ماقساتتا پايدالانۋمەن اينالىسقان ۇيىمداسقان توپ اشكەرەلەنگەن. ولار تۇراقتى مەكەنجايى جوق ادامداردى تاۋىپ, ولاردى ءتۇرلى جولمەن پايدالانۋ ءۇشىن تارتقان. سونىمەن قاتار, ولاردىڭ اتىنا قىمبات اۆتوكولىكتەر راسىمدەپ, كەيىن باسقا قالالاردا ساتۋمەن اينالىسقان. قازىرگى ۋاقىتتا نەگىزگى ۇيىمداستىرۋشىلار ۇستالدى, تەرگەۋ جالعاسىپ جاتىر.