تانىمال جۋرناليست, بلوگەر ءارى دەرەكتى فيلمدەردىڭ اۆتورى ءاليا ءاشىم ۇلى اقىن اباي قۇنانباي ۇلى تۋرالى پىكىرى ءۇشىن تاعى دا سىنعا ۇشىرادى, دەپ حابارلايدى Egemen.kz.
بۇعان دەيىن دە ابايدىڭ جاتىن بولمەسى تۋرالى ايتىپ قوعامدا داۋ تۋدىرعان تانىمال جۋرناليست بۇل جولى اقىننىڭ توسەگىن جيناماعانى جونىندە بەينەجازبا جاريالاپ, باسى داۋعا قالدى.
بلوگەر ۇلى تۇلعالاردىڭ مۇنداي ارەكەتتەرىن قابىلداي الماۋ «پوستكولونيالدى قوعامدا يمپەريالىق تەپەرىش كورگەن ۇلتتاردىڭ قورعانىش مەحانيزمىنەن تۋىنداعان» دەپ ءتۇسىندىردى. سونداي-اق جۋرناليست قوعامدا قانداي دا ءبىر تۇلعانى كيەلى ەتىپ كورسەتۋ ۇلتتىڭ ىشكى كومپلەكسىنەن تۋىنداعان فاكتور ەكەندىگىن اتاپ ءوتتى.
ءاليا ءاشىمنىڭ بۇل ءسوزىن جەلى قولدانۋشىلارى سىنعا الىپ, جازبا استىنا ءتۇرلى پىكىر قالدىرعان.
«ابايدى ءسوز ەتىپ كەرەگى جوق, ءومىر سۇرگەن زامانى سونداي. ەر ادام ءۇي ءىشىنىڭ تىرلىگىنە ارالاسپاعان. بۇل تۇسىنگەنگە ابايدىڭ كەمشىلىگى ەمەس», دەپ جازدى ز.زاۋربەكوۆا.
سونداي-اق قوعام قايراتكەرى ساۋلە مەشىتبايقىزى «سىيىڭ كەتىپ قالادى, بۇرىنعىلارىڭ ساباق بولماعان ەكەن» دەپ جازسا, اقىن كوكبورى مۇباراك «كۇيەۋىنە كورپە سالدىرعان قىز ەكەن» دەپ جازدى.
ەسكە سالا كەتەيىك, بۇعان دەيىن دە اباي مەن ءدىلدانىڭ جاتىن بولمەسى تۋرالى پىكىر ءبىلدىرىپ باسى داۋعا قالعان بلوگەر ءاليا ءاشىم حالىق الدىندا كەشىرىم سۇراعان بولاتىن.