تاتارستان رەسپۋبليكاسى عىلىم اكادەمياسىندا اعارتۋشى, قوعام قايراتكەرى اباي قۇنانباي ۇلىنىڭ تۋعانىنا 175 جىل تولۋىنا وراي «تۇركى حالىقتارى اراسىنداعى اعارتۋ قوزعالىسى جانە اباي شىعارماشىلىعى» اتتى حالىقارالىق عىلىمي-تاجىريبەلىك ونلاين-كونفەرەنتسيا ءوتتى.
كونفەرەنتسياعا تاتارستان مەن قازاقستان رەسپۋبليكاسى قوعامدىق ۇيىمدارىنىڭ وكىلدەرى مەن ازەربايجان, قازاقستان, وزبەكستان, قىرعىزستان, تاتارستان, باشقۇرتستان, موردوۆيا, ۋدمۋرتيا, چۋۆاشيا ەلدەرىنىڭ عىلىمي جانە ءبىلىم بەرۋ سالاسىنداعى جەتەكشى عالىمدار مەن ماماندار قاتىستى.
«قازاقستان مەن تاتارستاننىڭ ۇزاق تاريحي بايلانىسى بار. عاسىرلار بويى ءبىز دوستىعىمىزدىڭ ءجىبىن جوعالتقان ەمەسپىز. بۇل كونفەرەنتسيا عالىمدار مەن مەملەكەت قايراتكەرلەرىن ءبىر ۇستەلگە جينادى. قازاقتىڭ ۇلى كوسەمى ابايدىڭ تۋعانىنا 175 جىل تولىپ وتىر. ونىڭ رۋحاني مۇراسى – بۇكىل تۇركى الەمىنىڭ جانە بارشا ادامزاتتىڭ مەنشىگى», دەدى تاتارستان عىلىم اكادەمياسىنىڭ پرەزيدەنتى مياكزيۋم سالاحوۆ.
كەلەلى جيىندى وتكىزۋگە تاتارستان رەسپۋبليكاسى عىلىم اكادەمياسى, گ.يبراگيموۆ اتىنداعى ءتىل, ادەبيەت جانە ونەر ينستيتۋتى, قازاقستاننىڭ قازان قالاسىنداعى باس كونسۋلدىعى جانە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى ۇيىتقى بولدى.