ازوۆ تەڭىزىندە جۇك كەمەلەرىنە جاسالعان ۇشقىشسىز ۇشۋ اپپاراتتارىنىڭ شابۋىلى سالدارىنان بەس ازەربايجان ازاماتى قازا تاۋىپ, تاعى ءۇش ادام جاراقات الدى. بۇل تۋرالى ازەربايجان سىرتقى ىستەر مينيسترلىگى حابارلادى, دەپ جازادى Egemen.kz
وقيعا 5 ماۋسىمعا قاراعان ءتۇنى ازوۆ تەڭىزىندەگى تاگانروگ شىعاناعىندا بولعان. شابۋىل تۇركيادان روستوۆ-نا-دونۋ پورتىنا باعىت العان «ناترا» جانە «زيركون» جۇك كەمەلەرىنە جاسالعان. كەمەلەر تيىسىنشە بەليز جانە پالاۋ مەملەكەتتەرىنىڭ تۋى استىندا ءجۇزىپ بارا جاتقان.
ۋكراينا دروندارى سانكت-پەتەربۋرگكە شابۋىل جاسادى
ازەربايجان ءسىم ءباسپاسوز قىزمەتىنىڭ جەتەكشىسى ايحان حادجيزادە وقيعاعا قاتىستى مالىمدەمە جاسادى.
«ۇشقىشسىز ۇشۋ اپپاراتتارى بورتىندا جالپى سانى 25 ازەربايجان ازاماتى بولعان ەكى شەتەلدىك جۇك كەمەسىنە سوققى جاسادى. اتالعان كەمەلەر ازەربايجان مەملەكەتىنە تيەسىلى ەمەس. رەسەي تاراپى شابۋىل سالدارىنان بەس ازاماتىمىزدىڭ قازا تاۋىپ, تاعى ۇشەۋىنىڭ جارالانعانى تۋرالى اقپارات بەردى. زارداپ شەككەندەر ەيسك قالالىق اۋرۋحاناسىنا جەتكىزىلدى», دەدى ازەربايجان ءسىم ءباسپاسوز قىزمەتىنىڭ جەتەكشىسى ايحان حادجيزادە.
ازەربايجان سىرتقى ىستەر مينيسترلىگى قازا تاپقانداردىڭ وتباسىلارى مەن جاقىندارىنا كوڭىل ايتتى. سونىمەن قاتار ۆەدومستۆونىڭ بىرنەشە قىزمەتكەرى وقيعا ورنىنا اتتانعان.
مينيسترلىكتىڭ مالىمەتىنشە, زارداپ شەككەن ازاماتتاردىڭ جاعدايى, ولاردىڭ ەلگە قايتارىلۋى جانە قاجەتتى كونسۋلدىق كومەك كورسەتۋ ماسەلەلەرى ەرەكشە باقىلاۋدا تۇر.
رەسەيلىك اقپارات قۇرالدارىنىڭ حابارلاۋىنشا, جارالانعانداردىڭ جاعدايى تۇراقتى. ولار ەسىن بىلەدى جانە كراسنودار ولكەسىندەگى ەيسك ورتالىق اۋداندىق اۋرۋحاناسىنىڭ تراۆماتولوگيا بولىمىندە ەم قابىلداپ جاتىر.