ەنەرگەتيكا ۆيتسە-ءمينيسترى سۇڭعات ەسىمحانوۆ شىعىس قازاقستان وبلىسىنىڭ تۇرعىندارىمەن ەسەپتىك كەزدەسۋ وتكىزىپ, ءوڭىردىڭ ەنەرگەتيكا سالاسىنداعى احۋال مەن جۇزەگە اسىپ جاتقان ينفراقۇرىلىمدىق جوبالار تۋرالى باياندادى, دەپ حابارلايدى Egemen.kz
كەزدەسۋ بارىسىندا ەلەكترمەن جانە جىلۋمەن جابدىقتاۋ جۇيەلەرىنىڭ سەنىمدىلىگىن ارتتىرۋ, ەنەرگەتيكالىق ينفراقۇرىلىمدى جاڭعىرتۋ ماسەلەلەرىنە ەرەكشە نازار اۋدارىلدى.
ۆيتسە-ءمينيستردىڭ ايتۋىنشا, 2023–2025 جىلدارى ريددەر جىلۋ ەلەكتر ورتالىعىن جاڭعىرتۋعا 20,2 ملرد تەڭگە ينۆەستيتسيا سالىنعان. سونىڭ ناتيجەسىندە جابدىقتاردىڭ توزۋ دەڭگەيى 75 پايىزدان 43 پايىزعا دەيىن تومەندەپ, قالانى جىلۋمەن قامتاماسىز ەتۋ جاعدايى تۇراقتاندىرىلدى. ال 2026 جىلى ستانسانى جاڭعىرتۋعا قوسىمشا 2,6 ملرد تەڭگە ءبولىنىپ, ەكى قازاندىق پەن 3,3 شاقىرىم جىلۋ جەلىسىنە جوندەۋ جۇمىستارى جۇرگىزىلەدى.
كەزدەسۋدە وسكەمەن قالاسىندا جاڭا جىلۋ ەلەكتر ورتالىعىن سالۋ جوباسى دا تانىستىرىلدى. «سامۇرىق-ەنەرگو» اق جۇزەگە اسىرىپ جاتقان جوبا اياسىندا قۋاتى 360 مۆت ەلەكتر ەنەرگياسىن جانە ساعاتىنا 1000 گكال جىلۋ وندىرەتىن جاڭا ستانسا بوي كوتەرمەك. بۇل نىسان وسكەمەندەگى قازىرگى جىلۋ ەنەرگياسى تاپشىلىعىن تولىق وتەۋگە مۇمكىندىك بەرەدى.
جاڭا جەو قۇرىلىسى ءۇشىن قالانىڭ سول جاعالاۋىنان ارنايى جەر تەلىمى بولىنگەن. جوبا زاماناۋي تازا كومىر تەحنولوگيالارىن پايدالانۋدى كوزدەيدى. قازىرگى ۋاقىتتا قۇرىلىس الاڭىن دايىنداۋ جۇمىستارى جۇرگىزىلىپ جاتىر. نىساندى 2029 جىلدىڭ سوڭىنا دەيىن اياقتاۋ جوسپارلانعان.
جۇمىس ساپارى اياسىندا سۇڭعات ەسىمحانوۆ ريددەر جەو-داعى جوندەۋ ناۋقانىنىڭ بارىسىمەن تانىسىپ, الداعى جىلىتۋ ماۋسىمىنا دايىندىق جۇمىستارىن تەكسەردى.