بۇگىندە قازاقستاندا 70-تەن استام تەاتر جۇمىس ىستەيدى, ونىڭ 59-ى – مەملەكەتتىك تەاترلار. ولاردىڭ قاتارىندا 11 رەسپۋبليكالىق جانە 48 وڭىرلىك تەاتر بار. بۇل كورسەتكىش تەاتر ونەرىنىڭ وركەندەپ, ساحنا مادەنيەتىنە دەگەن جۇرتشىلىق قىزىعۋشىلىعىنىڭ ارتا تۇسكەنىن كورسەتەدى, دەپ حابارلايدى Egemen.kz
مەملەكەت باسشىسى اتاپ وتكەندەي, تەاتردىڭ دامۋى – ەل مادەنيەتىنىڭ دەڭگەيىن ايقىندايتىن ماڭىزدى كورسەتكىشتەردىڭ ءبىرى. قازاقستاندا دا تەاتر ونەرىنە دەگەن قىزىعۋشىلىق تۇراقتى ساقتالىپ كەلەدى. مۇنى كورەرمەندەر قاتارىنىڭ ارتۋى مەن جاڭا قويىلىمدارعا دەگەن سۇرانىستىڭ جوعارى بولۋى ايقىن اڭعارتادى.
سالاداعى وڭ سەرپىن 2025 جىلدىڭ قورىتىندىسىنان دا بايقالادى. بىلتىر مەملەكەتتىك تەاترلاردا 410 جاڭا قويىلىم كورەرمەنگە جول تارتىپ, 539 گاسترول ۇيىمداستىرىلدى. ونىڭ 495-ءى ەل وڭىرلەرىندە, ال 44-ءى شەتەلدە ءوتتى. ءبىر جىل ىشىندە 16 مىڭعا جۋىق سپەكتاكل ساحنالانىپ, ولاردى 2 832 835 كورەرمەن تاماشالادى.
وتاندىق تەاترلاردىڭ حالىقارالىق فەستيۆالدەر مەن بايقاۋلارعا بەلسەندى قاتىسۋى دا سالانىڭ قارقىندى دامىپ كەلە جاتقانىن كورسەتەدى. 2025 جىلى قازاقستاندىق تەاتر قايراتكەرلەرى 101 حالىقارالىق جانە 90 رەسپۋبليكالىق فەستيۆال مەن بايقاۋدا ءوز ونەرىن پاش ەتتى. ناتيجەسىندە قازاقستاندىق تەاترلاردىڭ 13 قويىلىمى «گران-پري» جانە «ۇزدىك سپەكتاكل» اتالىمدارى بويىنشا جوعارى ماراپاتتارعا يە بولدى.
بيىل دا سالاداعى وڭ ءۇردىس جالعاسىن تاۋىپ وتىر. جىل باسىنان بەرى مەملەكەتتىك تەاترلارعا 611 685 كورەرمەن باردى. وسى ۋاقىت ىشىندە 197 جاڭا سپەكتاكل ساحنالاندى. ونىڭ 146-سى وتاندىق اۆتورلاردىڭ شىعارمالارى نەگىزىندە ۇسىنىلىپ, 47-ءسى شەتەلدىك دراماتۋرگتەردىڭ تۋىندىلارى بويىنشا قويىلدى.
رەپەرتۋاردى بايىتۋ جانە جاڭا قويىلىمداردى كورەرمەنگە ۇسىنۋمەن قاتار, قازاقستاندىق تەاترلار حالىقارالىق مادەني سەرىكتەستىكتى تەرەڭدەتۋگە ءمان بەرەدى. جىل باسىنان بەرى تەاتر ۇجىمدارى 106 گاسترول ۇيىمداستىردى. ونىڭ ىشىندە رەسەي, سينگاپۋر جانە تۇركيا ەلدەرىنە ونەر ساپارى بار. سونىمەن قاتار وتاندىق تەاتر ۇجىمدارى رەسەي, يسپانيا, بەلارۋس جانە تۇركيادا ءوتىپ جاتقان حالىقارالىق فەستيۆالدەر مەن بايقاۋلارعا قاتىسىپ, ەل ونەرىنىڭ مەرەيىن اسىرۋعا ۇلەس قوسىپ كەلەدى.
اتاپ ايتقاندا, ىستامبۇل قالاسىندا وتكەن تۇركسوي حالىقارالىق تەاتر سىيلىعىنىڭ XI ماراپاتتاۋ راسىمىندە «استانا وپەرا» تەاترىنىڭ رەجيسسەرى «ۇزدىك تەاتر رەجيسسەرى» اتالىمى بويىنشا جەڭىمپاز اتاندى. ال قاليبەك قۋانىشباەۆ اتىنداعى قازاق ۇلتتىق مۋزىكالىق دراما تەاترىنىڭ «Romeo and Juliet» سپەكتاكلى سانكت-پەتەربۋرگتە وتكەن XXVII حالىقارالىق جاستار تەاتر فەستيۆالىندە «ۇزدىك سپەكتاكل» اتالىمىنا لايىق دەپ تانىلدى.
تەاتر سالاسىنداعى جەتىستىكتەر مەملەكەت تاراپىنان كورسەتىلىپ وتىرعان جۇيەلى قولداۋمەن دە ساباقتاسىپ جاتىر. بۇل باعىتتاعى جۇمىستار تەاترلاردىڭ شىعارماشىلىق الەۋەتىن ارتتىرۋعا جانە ولاردىڭ كاسىبي دامۋىنا جاڭا سەرپىن بەرۋگە جول اشادى. بيىل مەملەكەت باسشىسى ماكسيم گوركي اتىنداعى مەملەكەتتىك اكادەميالىق ورىس دراما تەاترىنا «ۇلتتىق» مارتەبەسى, ال ءسابيت مۇقانوۆ اتىنداعى قازاق سازدى-دراما تەاترىنا «اكادەميالىق» مارتەبەسى بەرىلەتىنىن ايتتى.