قازىر افريكا ەلدەرى ەلىمىزبەن ىنتىماقتاستىق ورناتۋعا دەن قويىپ وتىر. سونىڭ ءبىرى – كونگو رەسپۋبليكاسى. ولار اسىرەسە قازاقستاننىڭ تسيفرلى جۇيەسىنە قىزىعۋشىلىق تانىتىپ, تاجىريبە الماسۋدى كوزدەيدى.
ەلىمىزدىڭ كونگو رەسپۋبليكاسىنداعى توتەنشە جانە وكىلەتتى ەلشىسى جان عاليەۆ كونگودا ەلدىڭ سىرتقى ساياسي ۆەدومستۆوسىنىڭ باسشىسى كونستان-سەرج بۋندامەن, تەلەكوممۋنيكاتسيا جانە تسيفرلىق ەكونوميكا ءمينيسترى نگەما نزەمەن, قارجى جانە بيۋدجەت ءمينيسترى كريستيان يوكامەن, سونداي-اق ۇلتتىق قورعانىس مينيسترلىگىنىڭ ستراتەگيالىق ماسەلەلەر جانە اسكەري ىنتىماقتاستىق جونىندەگى باس ديرەكتورى جان ەمە ينيۋمبامەن كەلىسسوز وتكىزدى.
ەلىمىزدىڭ تسيفرلاندىرۋ جانە جاساندى ينتەللەكت, تەلەكوممۋنيكاتسيا, ەنەرگەتيكا, كولىك-لوگيستيكالىق ينفراقۇرىلىمدى دامىتۋ, قارجىلىق تەحنولوگيالار, بانك ءىسى سالاسىنداعى تاجىريبەسى مەن جەتىستىگى كونگو رەسپۋبليكاسىنىڭ ەرەكشە قىزىعۋشىلىعىن تۋدىرىپ وتىر. قازىر براززاۆيل ورتالىق افريكانىڭ بۇكىل ايماعى ءۇشىن قازاقستاننان استىق پەن تىڭايتقىشتار يمپورتتاۋ مۇمكىندىكتەرىن قاراستىرىپ وتىر. سونداي-اق كونگولەزدىك جاستاردى ەلىمىزدىڭ ءبىلىم مەكەمەلەرىنە وقۋعا جىبەرۋگە نيەتتى.
براززاۆيل پرەزيدەنت قاسىم-جومارت توقاەۆتىڭ بۇۇ قۇرىلىمىندا حالىقارالىق سۋ ۇيىمىن قۇرۋ تۋرالى باستاماسىن قولدايدى. سىرتقى ىستەر ءمينيسترى كونستان-سەرج بۋندا سۋ قاۋىپسىزدىگى تاقىرىبى بارلىق ەل ءۇشىن, اسىرەسە افريكا ءۇشىن وتە ماڭىزدى ماسەلە ەكەنىن اتاپ ءوتتى.
ەلشى كونگوعا ساپارى كەزىندە كونگولەزدىك بيزنەستىڭ جەتەكشى وكىلدەرىنىڭ ءبىرى, كوپسالالى كومپانيانىڭ باس ديرەكتورى سەرج مۋيمەن وتكەن كەزدەسۋدە تۋريزم جانە ساۋدا سالالارىنداعى, اتاپ ايتقاندا مەملەكەتتىك-جەكەمەنشىك سەرىكتەستىگى شەڭبەرىندەگى بيزنەس-ىنتىماقتاستىقتىڭ كەلەشەگىن تالقىلادى.
كونگو بيلىگى ەكى ەلدى ورتا ءدالىز جانە پۋەنت-نۋار تەڭىز پورتى ارقىلى بايلانىستىرۋ ساۋدا-ەكونوميكالىق سەرىكتەستىك مۇمكىندىكتەرىن ايتارلىقتاي كەڭەيتە الاتىنىن ايتادى.