بەلگىلى جۋرناليست قامبار احمەتتىڭ «Egemen Qazaqstan» گازەتىنىڭ 22 مامىر كۇنگى سانىندا جارىق كورگەن «قاجىتقان 45 شاقىرىم نەمەسە ءاليحان بوكەيحان اۋىلىنداعى جولدىڭ جىرى» اتتى وتكىر ماقالاسى حالىقتىڭ مۇڭىن مۇڭداپ, بيلىك پەن بۇقارا اراسىنا التىن كوپىر بولدى.
كوپتەن بەرى تۇيتكىلدىڭ ءتۇيىنى تارقاتىلماي, شابانباي بي اۋىلى جۇرتشىلىعىنىڭ باستى ماسەلەسىنە اينالعان 45 شاقىرىمدىق توزىعى جەتكەن جولدىڭ جىرى ەندى وڭ باعىتقا بۇرىلدى. باسىلىم بەتىندە كوتەرىلگەن بۇل وزەكتى ماسەلە ءتيىستى ورىندار تاراپىنان جەدەل نازارعا الىنىپ, ناتيجەسىن بەرىپ كەلەدى.
اۋدان اكىمى ابىلاي امانجولوۆ اۋىل تۇرعىندارىمەن ارنايى كەزدەسىپ, كوپتەن كۇتكەن قۋانىشتى جاڭالىقتى جەتكىزدى. كەزدەسۋ بارىسىندا اكىم جول ازابىن تارتقان جۇرتشىلىقتىڭ تالاپ-تىلەگى اياقسىز قالمايتىنىن قاداپ ايتىپ, جول قۇرىلىسى وسى جىلدىڭ ىشىندە رەسپۋبليكالىق بيۋدجەت قاراجاتى ەسەبىنەن باستالاتىنىن مالىمدەدى.
بۇل جاڭالىقتى ەستىگەن اۋىلدىڭ بەلسەندى تۇرعىنى تەڭدىك رايىمحان ۇلى باستاعان جەرگىلىكتى جۇرتشىلىق قۋانىشقا كەنەلىپ, ەل گازەتىنە جانە جۋرناليست قامبار جۇماعالي ۇلىنا, سونداي-اق ماسەلەگە نازار اۋدارىپ, وڭ شەشىم شىعارعان اۋدان اكىمدىگىنە شىنايى ريزاشىلىقتارىن ءبىلدىردى.
الاش كوسەمى ءاليحان بوكەيحاننىڭ ماڭگىلىك مەكەنى – تالدىبەيىت قورىمى ورنالاسقان بۇل تاريحي ءوڭىر ءۇشىن جولدىڭ جوندەلۋى ستراتەگيالىق تۇرعىدان وتە ماڭىزدى. جىلدار بويى سارساڭعا سالعان جولدىڭ جاڭارۋى اۋىل حالقىنىڭ قاتىناسىن جاقسارتىپ قانا قويماي, قازاق تاريحىنىڭ التىن دىڭگەگى سانالاتىن كيەلى مەكەنگە اعىلاتىن تۋريستەر اعىنىن ەسەلەي تۇسپەك.
ينفراقۇرىلىمنىڭ رەتكە كەلۋى وسى ايماقتىڭ تۋريستىك الەۋەتىن اشىپ, ساياحاتشىلار ءۇشىن قولايلى ورتا قالىپتاستىرۋعا ۇلكەن سەرپىن بەرەدى.
وسىلايشا, «Egemen Qazaqstan» گازەتىنىڭ سىني ماقالاسىنان كەيىن سەڭ قوزعالىپ, شابانباي بي اۋىلىنداعى جول ماسەلەسىنىڭ وڭ شەشىلۋى ءتورتىنشى بيلىك پەن جەرگىلىكتى اتقارۋشى ورگانداردىڭ بىرلەسكەن ناتيجەلى جۇمىسىنىڭ ايقىن ۇلگىسىنە اينالعالى وتىر.
قاراعاندى وبلىسى