پايداسى كول-كوسىر كومىر ك ۇلى

ميكروسفەرا – ديامەترى جۇزدەگەن ميكرومەتر بولاتىن شار ءتارىزدى ەلەمەنت. ەلىمىزدە وتكەن عاسىردىڭ 90-جىلدارىنان قۇرىلىس پەن مۇناي-گاز سالاسىندا تانىمال بولا باستاعان. تسەمەنت, بەتون, جىلۋ وقشاۋلاعىش ماتەريالدار مەن قۇرعاق قوسپالاردىڭ سالماعىن جەڭىلدەتىپ, بەرىكتىگىن ارتتىرۋعا قوسىلادى. ولار ۋلتراكۇلگىن جانە ينفراقىزىل ساۋلەلەردى قايتارا الادى. مۇناي-گاز ونەركاسىبىندە ۇڭعىمالاردى بۇرعىلاۋ كەزىندە قولدانىلاتىن ەرىتىندىلەردىڭ تىعىزدىعىن ازايتۋ ءۇشىن قاجەت. ول ءتىپتى مەديتسينا مەن اسكەري وندىرىستە, اۆتوكولىك جاساۋ سالاسىندا دا پايدالانىلادى. سىرتىنان قاراعاندا جاي عانا ۇساق, اقشىل ءتۇستى سىرعىمالى ۇنتاق سياقتى كورىنگەنىمەن, ءىشى گازعا تولى بوس كامەرالاردان تۇراتىن تۇيىرشىكتەر.

– ءبىزدىڭ شيكىزاتىمىز – جەرگىلىكتى جىلۋ-ەلەكتر ستانسالارىندا قولدانىلاتىن كادىمگى كومىردىڭ ك ۇلى. جەو-لاردىڭ كۇل رەزەرۆۋارلارىنا تولتىرىلعان سۋدا اۋىر ەلەمەنتتەر تۇبىنە شوگەدى دە جەڭىلدەرى بەتىنە قالقىپ شىعادى. ميكروسفەرا دەگەنىمىز – سول جەڭىل فراكتسيالار. ونى ءسۇزىپ جيناپ, زاۋىتقا وتكىزەدى. وتە جەڭىل ەلەمەنت بولعاندىقتان تۇيىرشىكتەردىڭ كولەمى دە وتە ۇساق كەلەدى. ونسىز دا وتتان شىققان ماتەريال وتقا وتە ءتوزىمدى. سوندىقتان ونى وتقا ءتوزىمدى بوياۋ وندىرىسىندە كوپ پايدالانادى. سىلاققا ارنالعان قوسپالار وندىرىسىندە دە تانىمال. شيكىزات قازىرگى ۋاقىتتا اقسۋ جىلۋ-ەلەكتر ستانساسى مەن ەكىباستۇزداعى قوس گرەس-تەن الىنىپ وتىر, – دەپ اتاپ ءوتتى زاۋىتتىڭ ديرەكتورى اسفەنديار كەنجەباەۆ.

الەمگە تانىمال ءىرى مۇناي-سەرۆيستىك «شليۋمبەرجە» كومپانياسى مەن امەريكالىق ترانسۇلتتىق مۇناي-سەرۆيستىك «Halliburton» كومپانياسى – پاۆلودارلىق زاۋىتتىڭ تۇراقتى تۇتىنۋشىلارى. ولار ءوز ۇڭعىمالارىن بەكىتۋ كەزىندە قوسپالاردى جەڭىلدەتۋ ءۇشىن پايدالانىپ وتىر. جىلىنا 12 مىڭ توننا ميكروسفەرا شىعاراتىن كاسىپورىننىڭ ونىمدەرى نەگىزىنەن شەتەلگە, اتاپ ايتقاندا, بىرىككەن اراب امىرلىكتەرى مەن اقش, پاناما ەلدەرىنە, ەۋروپاعا جول تارتادى. ءونىمنىڭ 98 پايىزىن سولار السا, قالعان بولىگىن وتاندىق كاسىپورىندار تۇتىنىپ كەلەدى.

«زاۋىتىمىز زامانعا ساي تەحنولوگيا­مەن جابدىقتالعان. قولمەن كوپ جۇمىس اتقارىلمايدى. جۇمىسكەرلەرىمىزدەن جوعارى ءبىلىم تالاپ ەتپەيمىز. باستىسى, ەڭبەككە دەگەن ىنتاسى بولسا بولعانى. قازىرگى ۋاقىتتا 35 ادام جۇمىس ىستەيدى, ورتاشا ەڭبەكاقى مولشەرى 350 مىڭ تەڭگە. ءبىزدىڭ ءوندىرىس قالدىقسىز جۇمىس ىستەيدى. ميكروسفەراعا ەشقانداي قوسپا قوسپايمىز, سەبەبى تۇتىنۋشىلارىمىز ونىڭ تازا بولۋىن تالاپ ەتەدى. تەك جيناپ, قۇرعاتۋ, تازالاۋ پروتسەستەرىنەن وتكىزەمىز جانە ەڭ سوڭعىسى ءوزىمىزدىڭ نوۋ-حوۋ تەحنولوگيامىز بو­يىنشا سۇرىپتايمىز. كاسىپورىن 2023 جىلدان اشىلعالى بەرى ءوڭىر ەكونوميكاسىنا 2,3 ملرد تەڭگە ينۆەستيتسيا سالدى» دەپ قوستى ءوندىرىس باسشىسى.

اسفەنديار – نازارباەۆ ۋنيۆەرسيتەتىنىڭ تۇلەگى, بىرنەشە ءتىلدى مەڭگەرگەن مامان. 2017 جىلدان بەرى ستەپنوگور, حرومتاۋ قالالارىنداعى وندىرىستەردە, كەيىنگى جەتى جىل جىتىقاراداعى تاۋ-كەن بايىتۋ كومبيناتىندا ەڭبەك ەتكەن. ايتۋىنشا, ميكروسفەرا ءوندىرىسىنىڭ بولاشاعى زور. ونىڭ اسا پايدالى ەلەمەنت ەكەنىن تۇسىنە باستاعان قۇرىلىس ماتەريالدارىنىڭ وندىرۋشىلەرى بۇل ەلەمەنتكە دەن قويۋدا. ەگەر كەلەشەكتە سۇرانىس ارتاتىن بولسا, كاسىپورىن ءوزىنىڭ وندىرىستىك كورسەتكىشتەرىن ەسەلەۋگە بەيىل. ول ءۇشىن الەۋەت تە, رەسۋرس تا جەتكىلىكتى. زاۋىت ەۋروپا مەن ازيانىڭ جاڭا نارىقتارىنا شىعۋدى جوسپارلاپ وتىر. بۇل ءۇشىن حالىقارالىق سەرتيفيكاتتاۋ كەزەڭدەرىنەن ءوتىپ جاتىر.

پاۆلودار وبلىسى