بۇكىل الەمدە كوروناۆيرۋستىڭ تارالۋى سالدارىنان ازىق-ت ۇلىك تاۋارلارىنا دەگەن سۇرانىستىڭ ءوسۋى اياسىندا قازاقستان باستاپقىدا قىرىققابات, پياز جانە ءسابىز سياقتى كوكونىستەردى ەكسپورتتاۋعا تىيىم سالدى. بۇل تۋرالى اشم ءباسپاسوز قىزمەتى حابارلادى.
تىيىم ەلدىڭ ازىق-ت ۇلىك قاۋىپسىزدىگى جانە ءوز حالقىمىزدى جەتكىلىكتى مولشەردە ازىق-ت ۇلىك ونىمدەرىمەن قامتاماسىز ەتۋ ماقساتىندا ەنگىزىلگەن. بۇل شەشىم ەسكى داقىل قورىنىڭ از بولۋىنا بايلانىستى شىعارىلدى. قالاي بولعاندا دا, بىلتىردان قالعان قوردى جاڭا ءونىم الۋ كەزەڭىنە دەيىن جەتكىزۋ قاجەت بولدى.
تىيىم سالۋ تۋرالى بۇيرىق 22 ناۋرىز كۇنى ىشكى ونىمدەردى شەتەلدەرگە جاپپاي شىعارۋعا بايلانىستى قابىلداندى. سونداي-اق, بۇيرىق 11 كۇن عانا ارەكەت ەتتى. 2 ساۋىردەن باستاپ تىيىم الىنىپ تاستالىپ, شارۋالار بەلگىلەنگەن كۆوتالار شەڭبەرىندە قىرىققابات, پياز جانە ءسابىزدى ەكسپورتتاۋعا مۇمكىندىك الدى. وسى ۋاقىت ىشىندە 4 مىڭ تونناعا جۋىق قىرىققابات ەكسپورتتالدى. فيتوسانيتارلىق سەرتيفيكاتتار ۋاقىتىلى بەرىلدى, ءوتىنىم بەرگەندەرگە ەشقانداي كەدەرگى بولعان جوق.
وڭىرلىك تۇراقتاندىرۋ قورلارى ىشكى تۇتىنۋعا قاجەتتى كولەمدى ساتىپ العاننان كەيىن, 14 ساۋىردە شەكتەۋلەر تولىعىمەن الىنىپ تاستالدى. تىيىم الىنىپ تاستالعاننان سوڭ, 20 مىڭ تونناداي قىرىققاباتتىڭ 971 ەكسپورتتىق سەرتيفيكاتى بەرىلدى.
بيىلعى جىلى قىرىققاباتتى جاپپاي جيناۋ 10 ساۋىردە باستالدى. وسىلايشا, ەلدىڭ وڭتۇستىگى جاڭا ونىمگە قول جەتكىزگەن سوڭ, اۋىل شارۋاشىلىعى مينيسترلىگى بارلىق تىيىم سالۋلار تۋرالى بۇيرىقتىڭ كۇشىن جويدى.
وسىرىلگەن قىرىققابات كوبىنە رەسەي فەدەراتسياسىنا, ۋكراينا مەن بەلارۋسسياعا شىعارۋعا ارنالدى. الايدا, كارانتيننىڭ كەڭىنەن ەنگىزىلۋىنە جانە ەكسپورتتىق-يمپورتتىق قاتىناستاردىڭ شەكتەلۋىنە, سونداي-اق سۋپەرماركەتتەردىڭ, دۇكەندەردىڭ, بازارلاردىڭ, مەيرامحانالاردىڭ جانە باسقا دا ساۋدا ورىندارىنىڭ جابىلۋىنا بايلانىستى قازاقستاندىق قىرىققاباتقا دەگەن سۇرانىس ىشكى نارىقتا دا, شەتەلدە دە كۇرت تومەندەدى.