بيىل اتىراۋ وبلىسىندا «نۇرلى جول» باعدارلاماسى اياسىندا 422 شاقىرىم جولدى قايتا جاڭعىرتۋعا 34 ملرد تەڭگە ءبولىنىپ وتىر.
وبلىس اكىمى ماحامبەت دوسمۇحامبەتوۆتىڭ ايتۋىنشا, قايتا جاڭعىرتىلاتىن جوبالار قاتارىنا «قاندىاعاش-ماقات» جانە «اتىراۋ-استراحان» باعىتىنداعى جول قۇرىلىسى كىرەدى. قۇرىلىس جۇمىستارى 2018 جىلى باستالعان «قاندىاعاش-ماقات» تاسجولىنىڭ 145 شاقىرىمىندا قوزعالىستى جىل سوڭىندا اشۋ جوسپارلانۋدا.
ال ۇزىندىعى 277 شاقىرىم بولاتىن «اتىراۋ-استراحان» (رەسەي فەدەراتسياسى شەكاراسىنا دەيىنگى) جول ۋچاسكەسىندە اۋقىمدى جۇمىستار جاسالىپ جاتىر. بۇگىنگە دەيىن جوبانىڭ 217 شاقىرىم ۋچاسكەسىنە قاتىستى مەردىگەرلىك ۇيىمدارمەن كەلىسىم شارتتارعا قول قويىلىپ, دايىندىق جۇمىستارى جاسالۋدا. حالىقارالىق اۆتوماگيسترالدىڭ قالعان 60 شاقىرىمىن جوندەۋ رەسپۋبليكالىق بيۋدجەتتەن بولىنەتىن قارجىمەن جۇزەگە اسىرىلادى. ونى جىل سوڭىندا پايدالانۋعا بەرۋ كوزدەلىپ وتىر. ەكى باعىتتاعى جول قۇرىلىسى جۇمىستارىنا 600 ادام, 382 ارنايى تەحنيكا تارتىلعان. سونداي-اق, جول قۇرىلىسىنا قاجەتتى 300 كاسىبي ماماندى دايىنداۋ جوسپارلانۋدا.
– وتكەن جىلى جەرگىلىكتى 37 ەلدى مەكەندە 230 شاقىرىم جول جوندەلدى. بۇل ماقساتتا رەسپۋبليكالىق بيۋدجەتتەن 9 ملرد, ال, جەرگىلىكتى بيۋدجەتتەن 30,2 ملرد, بارلىعى 39,2 ملرد تەڭگە ءبولىندى. ناتيجەسىندە وبلىستاعى جاقسى جانە قاناعاتتانارلىق كۇيدەگى جولداردىڭ جاعدايى 57 پايىزعا جەتتى. ال, 2018 جىلى بۇل كورسەتكىش 54% بولاتىن.
ال «نۇرلى جول» مەملەكەتتىك باعدارلاماسى اياسىندا ۇزىندىعى 87 شاقىرىمدى قۇرايتىن «يندەر-قاراباۋ» جولىن قايتا جاڭعىرتۋ, سونداي-اق, «گانيۋشكينو-پريمورە-ۋتەرى» جولىنىڭ 26 شاقىرىمىنا كۇردەلى جوندەۋ جۇمىستارى جالعاسۋدا. جالپى 2020 جىلعا جول قۇرىلىس جۇمىستارىنا 41,1 ملرد. تەڭگە بولىنگەن. ونىڭ رەسپۋبليكالىق بيۋدجەت - 26,4 ملرد تەڭگەسى –رەسپۋبليكالىق بيۋدجەتتەن, ال, 14,7 ملرد تەڭگە جەرگىلىكتى بيۋدجەتتەن قاراستىرىلدى. وعان 180 شاقىرىمعا جۋىق جەرگىلىكتى ماڭىزى بار قالا جانە اۋىلىشىلىك جولداردى جوندەۋ جوسپارلانىپ وتىر. اتالعان جۇمىستارعا 4500 ادامدى تارتۋ كوزدەلۋدە, -دەدى اتىراۋ وبلىسىنىڭ اكىمى ماحامبەت دوسمۇحامبەتوۆ.
وبلىس اكىمى ءباسپاسوز قىزمەتىنىڭ مالىمەتىنە سۇيەنسەك, كولىك ينفراقۇرىلىمى باعىتىنداعى اتالعان جوبالاردى جۇزەگە اسىرۋ ءۇشىن بەكىتىلگەن مەموراندۋم بار. سوعان سايكەس, جىلدىڭ سوڭىندا جەرگىلىكتى ماڭىزداعى جولداردىڭ جاقسى جانە قاناعاتتانارلىق جاعدايىن 61%-عا جەتكىزۋ جوسپارلانىپ وتىر
جولداسبەك كوشەرباي ۇلى