پريمورسكي كانالىنىڭ جايىق وزەنىنە قۇياتىن ساعاسىندا بالىقتىڭ قىرىلعانى تۋرالى تۇرعىنداردىڭ ءبىرى ۆيدەوعا ءتۇسىرىپ, الەۋمەتتىك جەلىگە جۇكتەگەن. وندا ۆيدەو بۇگىن, 21 ساۋىردە تاڭەرتەڭگى ساعات 7:00 شاماسىندا جايىق وزەنىنىڭ پريمورسك كانالىندا تۇسىرىلگەنىن ايتقان. ۆيدەودا ء ولى بالىقتىڭ كانال سۋىندا قالقىپ جۇرگەنى كورسەتىلگەن. 2020 جىلعى 21 ساۋىردە ساعات 07:00-دەن 10:00-گە دەيىن تەڭىز ارقىلى جايىق وزەنىنە قاراي پريمورسكي كانالىنا ولگەن بالىقتار اعىلىپ كەلدى.
«اعىلىپ كەلگەن بالىقتاردىڭ ىشىندە ءىرى اقتابان جانە جەتىلگەن تورتا بالىقتارى انىقتالدى. لابوراتوريالىق زەرتتەۋلەر ءۇشىن بىرنەشە جەردەن سۋدىڭ سىناماسى الىندى.
ەكسپرەسس-تالداۋ ءادىسى ارقىلى سۋداعى وتتەگىنىڭ كونتسەنتراتسياسى انىقتالدى: جايىق وزەنىندە 9,7 مگ/ل, جايىق وزەنى مەن پريمورسكي كانالىنىڭ توعىساتىن جەرىندە 3,5 مگ/ل جانە پريمورسكي كانالىنىڭ ورتاسىندا 1,5 مگ/ل.
جايىق وزەنىنە اعىپ كەلگەن ءولى بالىقتىڭ كوبىسى قايتا ءتىرىلىپ, سۋدا ءجۇزىپ كەتتى. ولگەن بالىقتار جينالىپ, قازىرگى تاڭدا كولەمى انىقتالۋدا.
ولگەن بالىقتاردىڭ سىنامالارى الىنىپ, بالىقتاردىڭ قىرىلۋىن انىقتاۋ ءۇشىن ۆەتەرينارلىق ينسپەكتسياعا زەرتتەۋگە جولداندى. قىرىلعان بالىقتار انىقتالعان جەردە اقتابان جانە تورتا بالىقتارىنىڭ بىرنەشە داناسى الىنىپ, ىشەك-قۇرىلىسى زەرتتەلدى. زەرتتەۋ ناتيجەسى كورسەتكەندەي, تورتا بالىعىنىڭ كوبىسى ۋىلدىرىق شاشۋ كەزەڭىنەن كەيىن, ال اقتابان بالىقتارى جىنىستىق جەتىلۋدىڭ 4 ساتىسىندا بولىپ شىقتى» دەپ حابارلادى وسىعان وراي ورمان شارۋاشىلىعى جانە جانۋارلار دۇنيەسى كوميتەتىنىڭ ءباسپاسوز حاتشىسى ساكەن ديلداحمەت.
ونىڭ مالىمەتىنشە, بالىقتاردىڭ قىرىلۋ سەبەبى لابوراتوريالىق زەرتتەۋلەردىڭ قورىتىندىسىنان كەيىن بەلگىلى بولادى.
جۇماسات عازيز