كەشە ماجىلىستە “مەملەكەتتىك ءتىل – ەل بىرلىگىنىڭ كەپىلى” اتتى عىلىمي-پراكتيكالىق كونفەرەنتسياعا كەلگەن قوناقتاردىڭ قاتىسۋىمەن ناۋرىز مەيرامىنا وراي سالتاناتتى شارا ۇيىمداستىرىلدى. پارلامەنت ءماجىلىسىنىڭ توراعاسى ورال مۇحامەدجانوۆ قۇتتىقتاۋ ءسوز سويلەدى, دەپ حابارلادى وسى پالاتانىڭ ءباسپاسوز قىزمەتى.
ارمىسىزدار, ارداقتى اعايىن, قۇرمەتتى ارىپتەستەر, قادىرلى قوناقتار! مىنە, ءاز-ناۋرىز دا كەلىپ قالدى. بۇكىل تابيعات جاڭارىپ, جەر-انا ۇزاق ۇيقىسىنان ويانىپ, بۋسانىپ, كوكتەم تىنىسى سەزىلۋدە. ناۋرىز ەلىمىزگە ۇلكەن قۋانىش اكەلۋدە. ناۋرىز – جىل باسى. ءوتكەن جىل ەلىمىز ءۇشىن تابىسسىز بولعان جوق. الەمدىك قارجى داعدارىسىنىڭ كەيبىر اسەرىن سەزىنسەك تە, قازاقستاننىڭ ەكونوميكاسى, الەۋمەتتىك سالاسى ەل پرەزيدەنتىنىڭ كورەگەندىك ساياساتىمەن, جەدەل قولعا العان شەشىمدەرىنىڭ ارقاسىندا قينالماي ءوتىپ كەلەدى, دەدى توراعا.
ءماجىلىس توراعاسى ءسوزىنىڭ سوڭىندا بىلاي دەدى: ناۋرىز قۇتتى بولسىن! ءار شاڭىراقتا ىرىزدىق, بەرەكە بولسىن. ەڭ باستىسى, ەلىمىزدى ىنتىماعىنان ايىرماسىن! ناۋرىزدا ايتىلار ىزگى تىلەكتەر قابىل بولسىن! ەلىمىز ورلەي بەرسىن!”
حالىقارالىق “قازاق ءتىلى” قوعامىنىڭ پرەزيدەنتى ومىرزاق ايتباەۆ جينالعانداردى ناۋرىز مەيرامىمەن قۇتتىقتاپ: “ەلىمىزدەن بەرەكە, حالقىمىزدىڭ ماڭدايىنان باق كەتپەسىن! مەملەكەتتىك ءتىل دەپ, ەل دەپ جۇرگەن كەرەمەت جاندارسىزدار. ءبارىڭىز دە باقىتتى بولىڭىزدار! جاندارىڭىزدى ەشقاشان مۇڭ باسپاسىن!” دەپ تىلەگىن جەتكىزە كەلىپ, حالىقتىڭ “ەكى جيرەن” ءانىن ورىنداپ بەردى.
مەرەكەگە جينالعان قاۋىمعا پرەزيدەنتتىك مادەنيەت ورتالىعى ۇلتتىق داستۇرلەر تەاترىنىڭ انسامبلى كۇيدەن شاشۋ شاشتى. وسى ۇجىمنىڭ انشىلەرى گۇلميرا سارينا, پەريزات تۇراروۆا جانە گۇلزيرا بوكەيحانقىزى اۋەلەتە ءان شىرقادى.
ناۋرىز مەيرامىنا وراي قوناقتارعا ناۋرىز كوجە بەرىلىپ, ۇلتتىق تاعامداردان ءدام ۇسىنىلدى.