ەلىمىز تاۋەلسىزدىك العاننان كەيىن ىشتەي تولعانىسقا ءتۇسىپ, جاس مەملەكەتىمىزدىڭ نەگىزگى رامىزدەرىنىڭ ءبىرى سانالاتىن گەرب تۋرالى ويلانا باستادىم. قازاق ەلىنىڭ ەلتاڭباسى بۇرىن قايتالانباعان تىڭ ويلارمەن بەينەلەنۋى كەرەك دەپ ەسەپتەدىم.
شىنىندا دا وسىناۋ رامىزدەن ۇلىسىمىزدىڭ قازىرگى جاعدايى كورىنىس تاۋىپ, كەلەشەكتە قانداي بولاتىنى پاش ەتىلۋى ءتيىس-ءتىن. ودان ەڭ الدىمەن حالقىمىزدىڭ قابىرعالى قاسيەتتەرى كورىنۋى كەرەك-ءتىن. اتا-بابالارىمىز عاسىرلار بويى بوستاندىق ءۇشىن كۇرەستى. كەنەسارى حان, امانگەلدى باتىر, الاش ارىستارى, باسقا دا قانشاما بوزداقتار وسى جولدا باستارىن قۇرباندىققا تىكتى. ولاي بولسا, حالقىمىزدىڭ ەركىندىككە, ەركىن ەل بولۋعا دەگەن ۇمتىلىسى گەربىمىزدەن ۇعىلىپ تۇرعانى ماقۇل ەمەس پە. سونىمەن بىرگە ول ەلدىڭ تاۋەلسىزدىگىنە, ودان ءارى گۇلدەنۋىنە قىزمەت ەتۋى ءتيىس ەدى.
مىنە, ەلتاڭبا جوباسى مەن نوبايىن جاساۋ بارىسىندا وسى جايلارعا كوڭىل ءبولدىم. ءبىز جاساعان ەلتاڭبا جوباسىنىڭ يدەياسى مەن مازمۇنى ايقىن. زەڭگىر كوك اسپان اياسىندا شاڭىراق ورنالاسقان. ول تۋعان ۇيامىزدىڭ نىشانى. جالپى كوشپەلى حالىقتاردىڭ ءداستۇرلى ۇعىمىندا بۇكىل عالام كۇمبەز تۇرىندە كەيىپتەلگەن عوي. «شاڭىراعىڭ بيىك بولسىن!» دەگەن تەرەڭ ماعىنالى اق تىلەك, مىنە, وسىدان شىققان. كەيبىر اعايىنعا قازاق: «شاڭىراققا قارا!» دەر ەدى.
بۇل – ەسكەرتۋ. تورىمە شىعارسام دا, توبەمدە سەكىرتپەيمىن دەگەن ءسوز. نەگىزىنەن العاندا شاڭىراق: «ۇيىڭە, وتباسىڭا بەيبىتشىلىك, امان-ساۋلىق تىلەيمىن. وسى كەڭ الەم سياقتى ءوسىپ, وركەن جاي», دەگەن نيەتتى دە اڭعارتىپ تۇرعان ءتارىزدى. ەلتاڭبادا بەسبۇرىشتى جۇلدىز, اڭىزعا اينالعان اي ءمۇيىزدى پىراق جانە «قازاقستان» دەگەن جازۋ الىنعان. ءداستۇرلى قاناتتى تۇلپار – پىراق بەينەسى بيىك سامعاۋدى, بولاشاق تۋرالى ارماندى بىلدىرگەندەي. تۇلپاردىڭ كوككە سەرمەگەن قاناتتارى ورتاق وتاۋىمىز – شاڭىراعىمىزدى قورعاپ تۇر. پىراقتىڭ اڭىزداعى شيراتىلعان اي ءمۇيىزى قايسارلىقتى, قايراتتىلىقتى كورسەتكەندەي ءارى كونە تاريحىمىزدان دا حابار بەرگەندەي.
مىنە, ەسكيز تۇرىندەگى وسى جوبانى جۋىردا عانا باقيلىق بولعان اياۋلى ابىز اعامىز, اكادەميك سالىق زيمانوۆ باسقارعان ۇكىمەتتىڭ ارنايى كونكۋرستىق كوميسسياسى ماقۇلداپ, مەنىڭ جۇمىسىما ءبىرىنشى ورىن بەرگەن ەدى. ءسويتىپ ول قازاقستان رەسپۋبليكاسى جوعارعى كەڭەسىنىڭ ءVىىى سەسسياسىنىڭ قاراۋىنا ۇسىنىلعان بولاتىن. ەلدىگىمىزدى بەينەلەگەن ەلتاڭبامىز ومىرگە وسىلاي كەلىپ ەدى.
شوت-امان ءۋاليحان,
مەملەكەتتىك سىيلىقتىڭ لاۋرەاتى.