كەز كەلگەن مەملەكەتتىڭ كوركەيىپ گۇلدەنۋى سول مەملەكەتتىڭ ءتول رامىزدەرىنە قۇرمەت سەزىمىنەن ءوربيتىنى بەلگىلى. تاۋەلسىز قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازارباەۆ ءوزىنىڭ ءبىر سوزىندە: «مەملەكەتتىك رامىزدەر – حالقىمىزدىڭ رۋحىن, ۇلتتىڭ سالت-ساناسىن, قاھارماندىعى مەن دانالىعىن, بولاشاققا ءۇمىتىن, ارمان-تىلەگىن جەتكىزەتىن ەرەكشە قۇندى بەلگىلەر», – دەگەن ەدى.
ولاي بولسا, مەملەكەتتىك رامىزدەر – بۇل ءبىزدىڭ مەملەكەتىمىزدىڭ بەت-بەينەسى عانا ەمەس, ونىڭ تاريحى جانە ءاربىر ادامنىڭ ءوز ەلىنە دەگەن سۇيىسپەنشىلىگىنىڭ بەلگىسى. سوندىقتان ءبىزدىڭ مەملەكەتتىك رامىزدەرىمىز تاريحتىڭ تىلسىم تەرەڭىنەن سىر تارتىپ, ءبۇگىنگى ازات ەلدىڭ اسقاق كەلبەتىن ايشىقتايدى. ءبىر جاعىنان تاۋەلسىز قازاقستاننىڭ مەملەكەتتىك رامىزدەرى جالپىۇلتتىق سيپاتتى يەلەنگەنى دە ەش جاسىرىن ەمەس. نەگە دەسەڭىز, مۇنداي نىشاندار ەستەتيكالىق تالاپتارعا جاۋاپ بەرىپ قانا قويمايدى, ەلدىڭ تاريحى, ساياسي, ەكونوميكالىق ارنالارىنان باستاۋ الادى. وسى ارقىلى جاس ەلدىڭ ءوز تاۋەلسىزدىگىن نىعايتۋداعى بولاشاققا باسقان نىق قادامىن دا كورسەتەدى.
ءبىزدىڭ ەلىمىزدە جىل سايىن 4 ماۋسىم مەملەكەتتىك رامىزدەر كۇنى رەتىندە اتاپ وتىلەدى. سوناۋ 1992 جىلدىڭ 4 ماۋسىمىندا ەل پرەزيدەنتى نۇرسۇلتان نازارباەۆ «مەملەكەتتىك رامىزدەر تۋرالى» زاڭعا قول قويعان ەدى. ال, 2007 جىلدىڭ 4 ماۋسىمىندا قازاقستان رەسپۋبليكاسىنداعى كاسىبي جانە وزگە دە مەرەكەلەر تۋرالى جارلىققا وزگەرىستەر ەنگىزىلىپ, بۇل كۇن مەملەكەتتىك مەرەكە رەتىندە اتالا باستادى.
مەنىڭشە, مەملەكەتتىك رامىزدەر ءوزىنىڭ كوركەمدىك كەيپىمەن عانا ايشىقتالماي, ەل تاۋەلسىزدىگىنىڭ يدەيالىق قىرلارىن دا اشا تۇسەدى. بۇل وسى ەلدى مەكەن ەتىپ وتىرعان بارشا حالىقتىڭ بەيبىتشىلىككە دەگەن ىنتا-ىقىلاسىن عانا ءبىلدىرىپ قويماي, ءوتانسۇيگىشتىككە تاربيەلەيتىن قۇندىلىقتاردىڭ ءبىرى رەتىندە دە باعالانادى.
قاراپ وتىرساق, ءبىزدىڭ اشىق كوك ءتۇستى تۋىمىز ادامداردىڭ ءبىر-بىرىنە دەگەن سەنىمى مەن قۇرمەتىن دە كورسەتەدى. تازا بوياۋمەن بەزەندىرىلگەن ءرامىز ەل مەن حالىقتىڭ ءبىرلىگىنىڭ دە نىشانى. ەڭ باستىسى – كەشەگى كوشپەلى بابالارىمىزدىڭ بۇگىنگى ازاتتىققا دەيىنگى ۇرپاق جالعاستىعىنىڭ اراسىنداعى بايلانىسى دا ايشىقتالىپ بەرىلەدى. تۋداعى قىراننىڭ بەينەسى ەركىندىكتى, تاۋەلسىزدىكتى جانە بيىككە قول سوزعان ەلدىكتى اڭعارتادى.
ال ەلتاڭباداعى شاڭىراق ورتاق ءۇيىمىز – قازاقستاننىڭ ىنتىماق پەن بىرلىكتىڭ وشاعى ەكەندىگىن بەينەلەيدى. ويتكەنى, تىلەگى ءبىر, نيەتى ورتاق قازاقستاندىقتار قاشاندا وزدەرىنىڭ ورتاق مۇددەگە قۇلشىنىستارىمەن تانىلىپ كەلەدى. شاڭىراق بەرىك بولسا, ەلدىڭ ىرگەسى دە نىق بولاتىنى انىق.
ءبىزدىڭ مەملەكەتتىك رامىزدەرىمىز تاۋەلسىزدىكتىڭ 20 جىلى ىشىندە قازاق ەلىن الەمدىك قوعامداستىققا لايىقتى ۇسىنىپ قانا قويماي, ونداعى ابىروي تۇعىرىنا تورلەتە ءبىلدى. بۇل – بارشامىزدىڭ ەڭسەمىزدى بيىكتەتكەن قۋانىش. سوندىقتان دا مەملەكەت باسشىسى ن.ا.نازارباەۆ ەلدىك ىستەردىڭ ەڭ باستى قىرلارى وتانسۇيگىشتىك قۇندىلىقتار ەكەنىن باسا اتاپ كورسەتۋدە. ويتكەنى, ءبىز قاشاندا بەيبىتسۇيگىش ەل رەتىندە الەمگە تانىلىپ كەلەمىز. كوپۇلتتى ەلىمىزدە بىرلىك پەن ىنتىماق جاراسىم تاۋىپ, ساياسي تۇراقتىلىقتىڭ دا ساقتالىپ وتىرعاندىعى جاقسىلىقتىڭ نىشانى دەۋىمىز كەرەك. وسى سەبەپتى دە ءبىزدىڭ وتانداستارىمىز مۇنداي قۇندىلىقتاردى ەڭ اسىل دۇنيەسى رەتىندە اسپەتتەپ, تەڭدەسسىز قۇرمەتپەن باعالايدى. نەگە دەسەڭىز, مەملەكەتتىك رامىزدەر ارقىلى ءبىز جاس ۇرپاقتى پاتريوتتىق سەزىمدە تاربيەلەي الامىز. ءوز ەلىن شىنايى سۇيگەن ادام وتان ءۇشىن وتقا دا, سۋعا دا تۇسەتىنى, ونىڭ تىنىشتىعىن قورعايتىنى, ۇستانعان ساياساتى مەن ىزگى ىستەرىن جالعاستىراتىنى داۋسىز.
مەن وسى ارادا ەلباسى ن.ا.نازارباەۆتىڭ تاعى ءبىر دانالىق سوزىنە جۇگىنگىم كەلىپ وتىر. وندا: «ءبىز تاۋەلسىزدىككە اڭساپ, زارىعىپ جەتتىك. ەندى سول تاۋەلسىزدىكتىڭ قاسيەتتى بەلگىلەرىن دە ەرەكشە قادىرلەۋىمىز, قاستەرلەۋىمىز كەرەك. ءاربىر ازامات قازاقستاننىڭ تۋىن, ەلتاڭباسىن, ءانۇرانىن تۇمارداي قاسيەت تۇتۋى قاجەت. ەلدىگىمىزدىڭ سىنالاتىن ءبىر تۇسى وسى», – دەگەن ەدى.
دەمەك, الەمدىك قوعامداستىقتا ءوزىنىڭ جاڭا بەت-بەينەسىمەن كورىنىپ, جاڭا تاۋەلسىز مەملەكەت رەتىندە تانىلعان قازاقستان ءوزىنىڭ ەڭ العاشقى قادامىن كوك تۋىن, التىن پىراقتى ەلتاڭباسىن جانە ەلدىككە ۇندەگەن ءانۇرانىن قابىلداپ الۋدان باستاۋى ءبىزدىڭ ەلىمىزدىڭ بولاشاققا شىنايى قادام جاساۋى ارقىلى كورىنۋىمەن ەرەكشەلەندى. ويتكەنى, تۋعان ەلىنىڭ رامىزدەرىنە قۇرمەتپەن قاراۋ – ەلدىكتىڭ, وتانسۇيگىشتىكتىڭ, تۇتاستاي العاندا, ءپاتريوتيزمنىڭ شىنايى ءبىر بەلگىسى. ولاي بولسا, ءاربىر مەملەكەتتىك مەكەمە ەل ءرامىزدەرىن ورنالاستىرۋدىڭ زاڭدى تالاپتارىن قاتاڭ ساقتاۋى قاجەت. ويتكەنى, كەيبىر مەكەمەلەردە مەملەكەتتىك تالاپتارعا ساي كەلمەيتىن ەلتاڭبالاردىڭ ىلىنەتىنىن دە كورىپ ءجۇرمىز. بۇل – ءوز ەلىنە دەگەن نەمقۇرايلى كوزقاراستىڭ بەلگىسى. ءبىزدىڭ ەگەمەندىگىمىز دە ەلدىڭ مەملەكەتتىك رامىزدەرىنەن باستاۋ الماۋشى ما ەدى. سوندىقتان, مەملەكەتتىك مەكەمە باسشىلارى مۇنداي ەلدىك رامىزدەردى ارنايى ليتسەنزياسى بار كاسىپورىندارعا جاساتىپ الۋى – بۇگىنگى كۇننىڭ باستى ءبىر تالابى.
وبلىس اكىمدىگى جانىنداعى مەملەكەتتىك رامىزدەر جونىندەگى كوميسسيا بيىلعى جىلدىڭ العاشقى توقسانىندا بۇل باعىتتا مەملەكەتتىك ساياساتتى جۇزەگە اسىرۋ بويىنشا جۇيەلى جۇمىستارىن جالعاستىردى. بۇل رەتتە, باستى نازار مەملەكەت باسشىسىنىڭ بيىلعى «بولاشاقتىڭ ىرگەسىن بىرگە قالايمىز!» اتتى جولداۋىن ءتۇسىندىرۋ مەن ناسيحاتتاۋ ماسەلەسىنە دە اۋدارىلدى.
ۇرپاققا جول اشقان,
كەڭ بايتاق جەرىم بار.
بىرلىگى جاراسقان,
تاۋەلسىز ەلىم بار, – دەلىنەدى ءبىزدىڭ ءانۇرانىمىزدا.
بۇل – ەلدىك پەن ەرلىكتىڭ جىرى. بىرلىككە باستاعان ماڭگىلىك جاراسىمدىلىقتىڭ نىشانى. قازاق ەلىن مەكەن ەتكەن ءاربىر ۇلت وسى سوزدەردەن ءنار الىپ, ەلىن ءسۇيۋدىڭ شىنايى سەزىمىنە بولەنسە دەيمىز. ويتكەنى, ءبىزدىڭ ورتاق وتانىمىز – قازاقستان جۇزدەگەن ەتنوس وكىلدەرى مەن ۇلىستاردىڭ ىنتىماعى جاراسقان وشاعى بولىپ وتىر. ال, مەملەكەتتىك رامىزدەر سول ەلدىكتىڭ ىرىسى مەن ىنتىماعىن جاراستىرادى دەپ سەنەمىز.
گۇلجانار شوكەەۆا, اقمولا وبلىستىق ىشكى ساياسات باسقارماسىنىڭ باستىعى.
اقمولا وبلىسى.