«قازاقستان رەسپۋبليكاسىنىڭ مەملەكەتتىك رامىزدەرى تۋرالى» كونستيتۋتسيالىق زاڭىن, 2007 جىلعى 2 قازانداعى «قازاقستان رەسپۋبليكاسىنىڭ مەملەكەتتىك تۋىن, ەلتاڭباسىن, ءانۇرانىن ورنالاستىرۋ ەرەجەلەرىن بەكىتۋ تۋرالى» ۇكىمەت قاۋلىسىن جۇزەگە اسىرۋ ماقساتىندا اۋداندا مەملەكەتتىك رامىزدەردى ناسيحاتتاۋ جۇمىستارى جۇيەلى ءجۇرگىزىلۋدە. حالىق اراسىندا مەملەكەتتىك رامىزدەردى ناسيحاتتاۋ بويىنشا ءىس-شارالار اۋدان اكىمدىگى, ءبىلىم بەرۋ مەكەمەلەرى, قۇقىق قورعاۋ ورگاندارى, شەكارا ءاسكەرلەرى بولىمدەرى جانە بارلىق مەملەكەتتىك مەكەمەلەر مەن كاسىپورىندار ارقىلى جۇزەگە اسادى. اۋدان اكىمدىگى جانىنان «مەملەكەتتىك رامىزدەر جونىندەگى اۋداندىق كوميسسيا» قۇرىلىپ, اۋداندىق ىشكى ساياسات ءبولىمى رەسمي عيماراتتاردا, مەكەمەلەر مەن ۇيىمداردا مەملەكەتتىك تۋ مەن ەلتاڭبانىڭ ۋاقتىلى جاڭارتىلىپ, تالاپقا ساي مازمۇندا بولۋىن ۇدايى قاداعالاپ وتىرادى.
اۋدان كولەمىندە مەملەكەتتىك رامىزدەردى ۋاقىتىندا اۋىستىرۋعا بايلانىستى بىرنەشە مارتە قاتىناس حاتتار جىبەرىلىپ, ءتۇسىنىكتەمە جۇمىستارى جۇرگىزىلدى. مەملەكەتتىك رامىزدەر دايىندايتىن ليتسەنزيالى كاسىپورىندار تۋرالى باعاسى كورسەتىلگەن ماعلۇماتتار قوسىمشا تاراتىلدى.
بۇگىنگى تاڭدا اۋداندا مەملەكەتتىك رامىزدەر ورنالاسۋى ءتيىس 107 مەكەمە بار بولسا, ونىڭ 27-ءسى اۋىلدىق اكىمدىكتەر, 59-ى ءبىلىم وردالارى, قالعاندارىن مەملەكەتتىك مەكەمەلەر قۇرايدى.
مەملەكەتتىك رامىزدەرىمىزگە ءار ءبىلىم مەكەمەسىنىڭ دالىزىنەن, تاريح, العاشقى اسكەري دايىندىق, ءپان كابينەتتەرى مەن كىتاپحانالاردان ورىن بەرىلگەن. جاس ۇرپاقتى پاتريوتيزمگە باۋلۋ جولىندا قازاقستان رەسپۋبليكاسى مەملەكەتتىك رامىزدەرىنىڭ ماعىناسىن, ماڭىزدىلىعىن وقۋشى بويىنا ءسىڭىرۋ تاربيە باستاۋى بولىپ تابىلادى. مەكتەپتەردە (59 مەكتەپ بار) ءار اپتانىڭ ءدۇيسەنبىسى كۇندەرى تاڭەرتەڭ وقۋشىلار لينەيكاعا تۇرعىزىلىپ, مەملەكەتتىك ءانۇران ورىندالىپ, سوڭىنان ساياسي حابارلامالار ءوتىپ تۇرادى. وتكەن وقۋ جىلىندا اۋدان مەكتەپتەرىندە مەملەكەتتىك رامىزدەرگە بايلانىستى 120 تاقىرىپتىق تاربيە ساعاتتارى ءوتكىزىلسە, 30-دان اسا دوڭگەلەك ءۇستەلدەر ۇيىمداستىرىلعان. مەكتەپىشىلىك ماڭىزدى ءىس-شارالار مىندەتتى تۇردە ءانۇراننىڭ ورىندالۋىمەن اشىلادى. مەملەكەتتىك رامىزدەردىڭ زاڭعا سايكەس ورنالاسىپ, تۇرعىندار اراسىندا قۇرمەت قالىپتاستىرۋ ماقساتىندا اۋداندىق ىشكى ساياسات ءبولىمىنىڭ ماماندارى مەن اۋدان اكىمى جانىنداعى مەملەكەتتىك ءرامىزدەر جونىندەگى كوميسسيا مۇشەلەرىنەن قۇرىلعان توپ اۋدانداعى بارلىق مەملەكەتتىك مەكەمەلەرگە, بيۋدجەتتىك ۇيىمدارعا جانە اۋىلدىق اكىمدىكتەرگە مەملەكەتتىك رامىزدەردىڭ قازاقستان رەسپۋبليكاسىنىڭ زاڭىنا سايكەستىگىن تەكسەرۋ ءۇشىن بىرنەشە رەت رەيدتەر جۇرگىزىپ شىقتى.
اۋدان كولەمىندە اتقارىلىپ وتىرعان ءىس-شارالاردىڭ باستى ماقساتى – اۋدان تۇرعىندارى, ءاسىرەسە, وسكەلەڭ ۇرپاق بويىندا وتانعا, تۋعان ەلگە, وسكەن جەرگە دەگەن سۇيىسپەنشىلىكتى نىعايتۋ. وسى ماقساتتا ەڭ ءبىرىنشى كەزەكتەگى جۇمىستار تاۋەلسىز ەلىمىزدىڭ باستى بەلگىلەرى – مەملەكەتتىك رامىزدەرىمىز – مەملەكەتتىك تۋ, ءانۇران, ەلتاڭبامىزدى قۇرمەتتەۋگە, قادىرلەۋگە, قاستەرلەۋگە باعىتتالعان. «بۇل – ءبىزدىڭ ءانۇران!», «بۇل – ءبىزدىڭ تۋىمىز!», «بۇل – ءبىزدىڭ ەلتاڭبامىز!», «ءبىزدىڭ وتانىمىز – قازاقستان!» جانە «ايبىندى, ايدىندى, ايشىقتى اتا زاڭ» اتتى جاستار اكتسياسىن وتكىزۋ جىل سايىنعى داستۇرگە اينالعان.
سونىمەن قاتار, جۋىردا جاستاردى سالاماتتى ءومىر سالتىنا تاربيەلەۋ ماقساتىندا ءارى مەملەكەتتىك رامىزدەردى تەرەڭىرەك ءتۇسىندىرۋ ءۇشىن تاسكەسكەن اۋىلىندا بايقاۋ وتكىزىلدى. وعان قاتىسقان مەكتەپتەردىڭ ىشىنەن ءبىرىنشى ورىندى اقتامبەردى اتىنداعى, ەكىنشى ورىندى تۇرسابەكوۆ اتىنداعى ورتا مەكتەپتەر جەڭىپ السا, ءۇشىنشى ورىندى №18 كاسىپتىك مەكتەپ وقۋشىلارى يەلەندى.
مىنە, وسىنداي يگى ىستەر الداعى ۋاقىتتا دا جالعاسىن تابا بەرمەك.
بەيسەنعازى ۇلىقبەك.
شىعىس قازاقستان وبلىسى,
ءۇرجار اۋدانى.