جاڭا نەگىزى قالانعان مەملەكەتتەردىڭ قاي-قايسىنىڭ دا العاشقى ماڭىزدى رەسمي قادامدارىنىڭ ءبىرى – ەلدىڭ مەملەكەتتىك رامىزدەرىن, ياعني تۋىن, ەلتاڭباسىن جانە ءانۇرانىن بەلگىلەۋ. ءويتكەنى, بۇل رامىزدەر ساياسي تاۋەلسىزدىك پەن مەملەكەتتىك ەگەمەندىكتىڭ بىرەگەي بەلگىلەرى بولىپ سانالادى.
– مەملەكەتتىك رامىزدەر – قانداي دا ءبىر ەلدىڭ ءومىر سالتىن, بۇكىل بولمىسىن, ەرەكشەلىگىن, ايرىقشا ارمان-اڭسارىن, باسقالارمەن بايلانىس مۇراتىن بىلدىرەتىن بەلگى.
جاڭا تاريحىمىزداعى ەرەكشە وڭ تاڭبالى وقيعالاردىڭ ءبىرى – قازاقستان رەسپۋبليكاسىنىڭ مەملەكەتتىك رامىزدەرى كۇنىنىڭ بەلگىلەنۋى. ەلباسى جارلىعىمەن 4 ماۋسىم كۇنى مەملەكەتتىك ماڭىزى بار ايتۋلى مەرەكەلى كۇندەر قاتارىنا قوسىلدى. بۇل – مەملەكەتتىك رامىزدەرگە دەگەن شىنايى قۇرمەتتىڭ بەلگىسى, ولاردىڭ قوعام ومىرىندە الاتىن ايرىقشا ورنىنا وراي كورسەتىلگەن مەملەكەتتىك قولداۋ عانا ەمەس, سونىمەن بىرگە, تاريحي سانامىزدا تاۋەلسىزدىك يدەياسىن ورنىقتىرۋ جانە جاستاردى بيىك وتانشىلدىق سەزىمگە باۋلۋ مۇراتتارىن جان-جاقتى ەسكەرە وتىرىپ, جاسالعان ەرەكشە ەلجاندىلىق قادام.
ەل تىرەگى – ەلجاندى ۇرپاق. مەملەكەتتىك رامىزدەرگە دەگەن قۇرمەت – وتانشىلدىق سەزىمنىڭ اسا ءبىر جارقىن كورىنىستەرىنىڭ ءبىرى. ال ەل تاۋەلسىزدىگىنىڭ 20 جىلدىعى مەن قازاقستان رەسپۋبليكاسىنىڭ مەملەكەتتىك رامىزدەرىنە 19 جىل تولۋ قارساڭىندا ولاردى ەلىمىزدىڭ قوعامدىق-ساياسي ءومىرىنىڭ ماڭىزدى بولىگىنە اينالدى دەپ سەنىممەن ايتا الامىز.
ماناربەك ءسادۋوۆ, استانا قالاسى ەسىل اۋدانىنىڭ پروكۋرورى.