تاۋەلسىز قازاقستان جەتىنشى رەت راقىمشىلىق جاساۋ تۋرالى زاڭ قابىلداعالى تۇر. بۇل جونىندە ماجىلىستە وتكەن جۇمىس توبىنىڭ وتىرىسىندا ايتىلدى. ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ ۇيىمداستىرۋىمەن «قازاقستان رەسپۋبليكاسى تاۋەلسىزدىگىنىڭ 20 جىلدىعىنا بايلانىستى راقىمشىلىق جاساۋ تۋرالى» زاڭ جوباسىنىڭ تانىستىرىلىمى ءوتتى.
وتىرىستى زاڭ جوباسى بويىنشا قۇرىلعان جۇمىس توبىنىڭ جەتەكشىسى, ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ مۇشەسى سەرىك تەمىربولاتوۆ جۇرگىزدى. زاڭ جوباسىنىڭ ماقساتى جونىندە ادىلەت مينيسترىنىڭ ورىنباسارى ءامىرحان امانباەۆ بايانداما جاسادى. بۇل زاڭ جوباسى قاۋىپسىزدىك كەڭەسىنىڭ 2011 جىلعى 15 ناۋرىزداعى حاتتامالىق شەشىمىن ورىنداۋ ماقساتىندا ازىرلەنگەن. اتاۋلى وقيعالارعا بايلانىستى راقىمشىلىق جاساۋ الەمنىڭ كوپتەگەن ەلدەرىندە قولدانىلادى.
بايانداماشى اتالعان زاڭ جوباسىندا راقىمشىلىق جاساۋ, تۇتاستاي العاندا, الەۋمەتتىك تۇرعىدان از قامتىلعان ساناتتاعى ازاماتتارعا, اۋىرلىعى ورتاشا, ونشا اۋىر ەمەس قىلمىس جاساپ سوتتالعان ادامدارعا, ونىڭ ىشىندە كامەلەتكە تولماعاندارعا, جۇكتى ايەلدەرگە جانە كامەلەتكە تولماعان بالالارى بار ايەلدەرگە, ءى, ءىى جانە ءىىى توپتاعى مۇگەدەكتەرگە قاتىستى جۇرگىزۋ ۇسىنىلىپ وتىرعانىن جەتكىزدى. بۇل زاڭ اكتىسى قابىلدانعاننان كەيىن التى اي مەرزىمگە قولدانىلاتىنىن ايتتى. سونداي-اق وسى زاڭ قولدانىسقا ەنگىزىلگەنگە دەيىن ونشا اۋىر ەمەس جانە اۋىرلىعى ورتاشا قىلمىس جاساعانى ءۇشىن قىلمىستىق جاۋاپكەرشىلىككە تارتىلاتىن بارلىق قىلمىستىق ىستەردى جانە قىلمىستار تۋرالى سوتتا قارالماعان ىستەردى توقتاتۋ كوزدەلەدى.
سەرىك تەمىربولاتوۆ قازاقستان ەگەمەندىگىن جاريالاعاننان بەرى ءتۇرلى مەرەكەلىك داتالارعا وراي راقىمشىلىق جاساۋ تۋرالى 6 رەت زاڭ قابىلدانعانىن ءمالىم ەتتى. اتاپ ايتقاندا, 1994 جىلى 5 قازاندا, 1996 جىلى 15 ماۋسىمدا, 1999 جىلى 13 شىلدەدە, 2000 جىلى 29 جەلتوقساندا, 2002 جىلى 19 اقپاندا جانە 2006 جىلى 9 قاڭتاردا راقىمشىلىق جاساۋ تۋرالى زاڭدار قابىلداندى.
زاڭ جوباسى قابىلدانعان جاعدايدا ونى ىسكە اسىرۋ قوسىمشا قاراجاتتى تالاپ ەتپەيدى, سەبەبى, قارجىلىق شىعىندار بولىنگەن قاراجات شەگىندە جۇزەگە اسىرىلادى.
ايباتىر سەيتاق, جۋرناليست.