قازاقستان پارلامەنتى ءماجىلىسىنىڭ توراعاسى ورال مۇحامەدجانوۆ چەشەن رەسپۋبليكاسى مەن ينگۋش رەسپۋبليكاسىنىڭ پارلامەنتتىك دەلەگاتسياسىن قابىلدادى, دەپ حابارلادى وسى پالاتانىڭ ءباسپاسوز قىزمەتى.
ءماجىلىس توراعاسى ءسوز باسىندا قازاقستان مەن رەسەي اراسىنداعى قالىپتاسقان ىنتىماقتاستىق بايلانىستىڭ ناتيجەسىن بارلىق سالادان كورىپ وتىرعانىمىزدى ايتتى. 2010 جىلى ەكى مەملەكەت اراسىنداعى ساۋدا اينالىمى 15 ملرد. دوللاردان استى. ءۇستىمىزدەگى جىلدىڭ ءبىرىنشى توقسانىنداعى ناتيجە بويىنشا الىس-بەرىس 1,5 ەسەگە وسكەنىن كورەمىز. ءۇش ەل: قازاقستان, بەلارۋس جانە رەسەي كەدەن وداعىنا بىرىگىپ وتىر. كەلەشەكتە بىرىڭعاي ەكونوميكالىق كەڭىستىك قۇرعالى تۇرمىز. مۇنداي ىقپالداستىق ۇلكەن جەتىستىكتەرگە جول اشاتىنى ءسوزسىز. سونىمەن قاتار, پارلامەنتارالىق بايلانىس تا قارقىن الا تۇسۋدە. قازاقستان پارلامەنتى رەسەي فەدەراتسياسى فەدەرالدى جينالىسى فەدەراتسيا كەڭەسىمەن جانە مەملەكەتتىك دۋمامەن ءوزارا تىعىز بايلانىس ورناتقان. تمد پاا, ەقىۇ پاا, ەۋرازەق پاا, ۇقشۇ پا شەڭبەرىندە وتەتىن ءىس-شارالار نەگىزىندە ىنتىماقتاسا جۇمىس ىستەپ كەلەدى, دەدى و.مۇحامەدجانوۆ.
ءماجىلىس توراعاسى قازاقستاننىڭ ىشكى جانە سىرتقى ساياساتتاعى ۇستانىمدارى تۋرالى, ەلدىڭ ەكونوميكالىق-الەۋمەتتىك دامۋى, ۇدەمەلى يندۋستريالىق-يننوۆاتسيالىق باعدارلاماسىنىڭ جۇزەگە اسۋى جونىندە اڭگىمەلەپ بەردى.
– ۇستىمىزدەگى جىلى 28 اقپاندا چەشەن رەسپۋبليكاسى پرەزيدەنتىن سايلاۋ ءوتىپ, وندا رامزان قادىروۆ جەڭىسكە جەتتى. ءبىز چەشەن حالقىن وسى جەڭىسپەن قۇتتىقتايمىز, – دەدى ءماجىلىس ءتوراعاسى. – ءبىز قازاقستان پرەزيدەنتى نۇرسۇلتان نازارباەۆتىڭ چەشەن ەلىندە ۇلكەن ابىرويعا يە ەكەنىن بىلەمىز. ءبىزدىڭ تاريحي بايلانىستارىمىز تەرەڭدە جاتىر.
ءوز كەزەگىندە چەشەن رەسپۋبليكاسى پارلامەنتىنىڭ توراعاسى, دەلەگاتسيا جەتەكشىسى دۋكۋۆاحا ابدۋراحمانوۆ ءسوزىن قازاق ەلىنە دەگەن ىزگى تىلەگىن بىلدىرۋدەن باستادى. قازاق حالقىنىڭ قيىن كۇندەردە قول سوزىپ, شىنايى قامقورلىق جاساعانىن چەشەن حالقى ەشقاشان ۇمىتپايتىنىن ايتتى. رامزان قادىروۆتىڭ اتىنان قازاق حالقىنا ىستىق سالەمىن جەتكىزدى. ايتا كەتۋ كەرەك, 2007 جىلى گروزنىي قالاسىنىڭ كورىكتى ءبىر كوشەسىنە قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ ەسىمى بەرىلدى. قازاقستان باسشىسىنىڭ باستاماسىمەن گروزنىي قالاسىنىڭ ورتالىق الاڭىندا كوپ قاباتتى تۇرعىن ءۇي سالىندى. ول رەسمي تۇردە «قازاق-چەشەن دوستىعى ءۇيى» دەپ اتالادى. الايدا, دۋكۋۆاحا ابدۋراحمانوۆ ءوز سوزىندە بۇل ءۇيدى جەرگىلىكتى تۇرعىندار «قازاقتار ءۇيى» دەپ قۇرمەتپەن اتايتىنىن جەتكىزدى.
سونىمەن قاتار, چەشەن ەلىنىڭ باستاماسىمەن گروزنىي قالاسىنداعى №1 ليتسەيگە قازاقستان پرەزيدەنتى نۇرسۇلتان نازارباەۆتىڭ ەسىمى بەرىلدى. اتالعان ليتسەي – رەسپۋبليكاداعى تاريحى مول جانە وتە تانىمال ءبىلىم ورداسى. قازاقستان پرەزيدەنتى اتىنان ليتسەيگە «Ford» شاعىن اۆتوبۋسى, قازىرگى زامانعى كومپيۋتەرلىك سىنىپ جابدىقتارى تابىس ەتىلگەن.
ءماجىلىس توراعاسى كەزدەسۋ سوڭىندا گروزنىي قالاسىنداعى قازاقستان پرەزيدەنتى نۇرسۇلتان نازارباەۆ اتىنداعى №1 ليتسەيگە سۋرەتشى ەرمەكوۆتىڭ «ىلە الاتاۋى» اتتى كارتيناسىن, قازاقستان جانە مەملەكەت باسشىسى, ەلدىڭ جەتىستىكتەرى تۋرالى قۇندى كىتاپتاردى تابىس ەتۋدى مەيماندارعا اماناتتادى.