«قازاقستان تەمىر جولى» ۇك» اق ەل تاۋەلسىزدىگىنىڭ 20 جىلدىق مەرەيتويى قارساڭىندا استانا مەن اتىراۋ قالالارىن بايلانىستىراتىن جاڭا باعىت اشتى. بيىلعى جىلدىڭ 31 مامىرىنان باستاپ اتالعان باعىت بويىنشا №47/48 «كاسپي» جاڭا جولاۋشىلار پويىزى جول تارتتى.
كومپانيا حالىقتىڭ تەمىر جول كولىگىندەگى جولاۋشىلار تاسىمالىنا دەگەن سۇرانىسىن قاناعاتتاندىرۋ ماقساتىندا تۆەر ۆاگون جاساۋ زاۋىتى شىعارعان 22 ۆاگوندى ساتىپ العان. جىلجىمالى قۇرام پاركى زامان تالابىنا ساي 12 كۋپەلىك, 8 پلاتسكارت, سونىمەن قاتار مۇمكىندىگى شەكتەۋلى جاندار مەن ولاردى الىپ جۇرەتىن ادامدارعا ارنالعان ارنايى ورىندارمەن قامتىلعان 2 كۋپەلىك شتاب ۆاگونىمەن تولىقتىرىلعان.
جاڭا ۆاگوندار تەحنيكالىق جانە پايدالانۋ جاعىنان ءوزىنىڭ تۇپنۇسقاسىنان ارتىق. جىلجىمالى قۇرامدى شىعارۋ بارىسىندا جولاۋشىلاردىڭ پويىزداعى ساپارى ساپالى ءارى جايلى بولۋى ءۇشىن يننوۆاتسيالىق تەحنولوگيا, زاماناۋي ماتەريالدار مەن قۇرالدار پايدالانىلعان, دەيدى ماماندار. سونداي-اق, ۆاگوندار باقىلاۋ جۇيەسى, كولىك قۇرالىن باسقارۋ جانە دياگنوستيكا جاساۋ, GPRS قۇرىلعىسى مەن سپۋتنيكتىك بايلانىس سىندى وزگە دە بىرقاتار قاجەتتىلىكتەرمەن جابدىقتالعان.
تاعى ءبىر ەرەكشەلىك ۆاگون قۇرىلىمى دەۋگە بولادى. جاڭا نۇسقاسىندا سالوننىڭ ىشكى بولىكتەرى وزگەرتىلگەن. دارەتحانالار قولدانىلمايتىن تامبۋر جاقتا ورنالاسسا, قاسىندا جولسەرىكتىڭ كۋپەسى مەن قاجەتتى زاتتاردى ساقتايتىن ورىن بار. ىشكى جانە سىرتقى ەسىكتەر اۆتوماتتى تۇردە اشىلسا, ۆاگون تومەنگى پلاتفورمالاردان ءتۇسىپ كوتەرىلۋ ءۇشىن باسقىشپەن قامتىلعان. ۆاگونداردىڭ قىزمەتكە جارامدى ۋاقىتى 40 جىل, ال كونسترۋكتسيالىق جىلدامدىعى ساعاتىنا 160 شاقىرىمدى قۇرايدى.
پويىزدىڭ تاعى ءبىر ەرەكشەلىگى, شتاب ۆاگونىندا مۇمكىندىگى شەكتەۋلى جاندار مەن ولاردى الىپ جۇرەتىن ادامدارعا ارنالعان ارنايى كۋپە بار. جىلجىمالى قۇرام جارىمجان جانداردىڭ ارباسىن كوتەرىپ-ءتۇسىرەتىن قۇرىلعىلارمەن قامتىلسا, ولارعا ارنالعان كۋپەدە ارباسىن قوياتىن ورىن مەن قوزعالۋعا ارنالعان ۇستايتىن تۇتقا جانە اقپارات تابلوسى ورىن تەپكەن. «كۋپەدەگى جاتىن ورىندار داۋىستى ەلەكتروندى رەتتەپ وتىراتىن جەكە اۋديوپانەلدەرمەن رەتتەلسە, پلاتسكارت ۆاگوندار دا زاماناۋي تالاپقا تولىق جاۋاپ بەرەدى. ولار اۋانى جەلدەتەتىن جۇيەمەن, بيودارەتحانالارمەن جانە جۇمساق جاتىن ورىندارمەن جابدىقتالعان. جوعارى ورىنداردا جولاۋشىنى توسەكتەن قۇلاپ كەتۋدەن ساقتايتىن جينالاتىن قورعاۋىش ورناتىلعان», دەيدى تانىستىرۋشىلار.
جولاۋشىلارعا بارلىق جاعدايدى جاساۋدى وزدەرىنە باستى ماقسات تۇتقان كومپانيا ۇجىمىنىڭ بۇل ەڭبەكتەرى باعالاۋعا تۇرارلىق. وسىنداي ەل يگىلىگى ءۇشىن جاسالىپ جاتقان جۇمىستار ۇزاعىنان بولعاي.
ءابدىراحمان قىدىربەك.