1 ماۋسىم – بالالاردى قورعاۋدىڭ حالىقارالىق كۇنىنە وراي, ENRC كومەك قايىرىمدىلىق قورى استاناداعى «SOS بالالار اۋىلىنا» توسىن سىي جاسادى. سىي – جاڭا زامانعى فۋتبول الاڭى. 10 جىلدان بەرى ەلورداداعى «بالالار اۋىلىنىڭ» 100-گە تارتا ءبۇلدىرشىندەرى سپورتتىق كەشەن جايلى ارمانداپ, ونىڭ ورىندالاتىنىنا دا سەنىپ كەلگەن ەدى. جازدىڭ العاشقى كۇنى ولاردىڭ سول ارماندارى ورىندالدى. قوردىڭ تىكەلەي باستاماسىمەن فۋتبول الاڭىن جاساپ شىعارۋعا نەبارى ءبىر اي عانا ۋاقىت كەتتى.
بەلگىلى مەتاللۋرگيالىق كومپانيانىڭ «بالالار اۋىلدارىمەن» اراداعى ىنتىماقتاستىعىنىڭ ىزگى ءداستۇرگە اينالعانىنا دا ءبىراز جىلدىڭ ءجۇزى بولعان. ENRC-ءنىڭ كورپوراتيۆتىك الەۋمەتتىك جاۋاپكەرشىلىك ستراتەگياسىندا بالالارعا جانە بىلىمگە ارنالعان جوبالارعا ايرىقشا باسىمدىق بەرىلگەن. ماسەلەن, اتالعان قور 2007 جىلدان بەرى استانا, الماتى جانە تەمىرتاۋ قالالارىنداعى 3 «بالالار اۋىلىنا» قارجىلاي قولداۋ كورسەتىپ كەلەدى.
ال بيىلعى جىلعى فۋتبول الاڭىنىڭ اشىلۋ سالتاناتىنا جانە بالالار اراسىنداعى العاشقى فۋتبول ويىندارىن تاماشالاۋعا «SOS قازاقستاننىڭ بالالار اۋىلى» كورپوراتيۆتىك قورىنىڭ ديرەكتورى باتىرحان جيەناليەۆ پەن ENRC كومەك قايىرىمدىلىق قورىنىڭ ديرەكتورى ماران وماروۆ قاتىستى.
سالتاناتتى شارا كەزىندە باتىرحان جيەناليەۆ بالالاردىڭ جۇزىنە كۇلكى, كوڭىلدەرىنە قۋانىش سىيلاعان قايىرىمدىلىق كورپوراتسياسىنا العىسىن بىلدىرە كەلە, «ءبىزدىڭ بىرنەشە جىلدان بەرى ۇزىلمەي كەلە جاتقان دوستىق بايلانىسىمىز بولاشاقتا دا ءوزىنىڭ جالعاسىن تاپقانىن قالايمىز. سەبەبى, سىزدەردىڭ قايىرىمدىلىق شارالارىڭىز «بالالار اۋىلىن» قاشان دا شاتتىققا بولەيدى», – دەپ شىنايى ىقىلاسىن جەتكىزدى.
«ەگەمەن-اقپارات».