باس پروكۋروردىڭ ءبىرىنشى ورىنباسارى يوگانن مەركەلدىڭ توراعالىعىمەن وتكەن ءوڭىرارالىق كەڭەستە اقبوكەندەردى زاڭسىز اۋلاۋ جانە ونى ساتۋمەن اينالىساتىندارعا قىلمىستىق جاۋاپكەرشىلىكتى قاتايتۋ كەرەكتىگى ايتىلدى. بوكەن اتىپ, ءمۇيىزىن شەتكە ساتاتىندار زاڭنىڭ جۇمساقتىعىنان تايراڭداپ, باسقا شىعۋعا اينالدى. قازىر قوستاناي قالاسىنداعى كەز كەلگەن ايالدامادا «اقبوكەن ءمۇيىزىن ساتىپ الامىن» دەگەن حابارلامالار ءىلۋلى تۇر. بوكەننىڭ ىزىنە تۇسكەندەردىڭ بەرگەن ازىن-اۋلاق تيىن-تەبەنىنە قىزىققان اۋىل تۇرعىندارى تابيعاتتى قورعاۋ ىسىندە تۇرلاۋسىزدىق تانىتادى. ولار براكونەرلەرگە كيىك جايىلاتىن ايماقتىڭ جولىن كورسەتەدى. مىنە, تەك قولىنا مىلتىق ۇستاعان براكونەرلەردى عانا ەمەس, ولاردىڭ پايداسىنا جانامالاي ورتاقتاسىپ, كيىكتىڭ قىرىلۋىنا وسىلاي «ۇلەس» قوساتىنداردى دا جاۋاپكەرشىلىككە تارتۋدى قاتايتپاسا, كەيىنگى ۇرپاق كيىكتى سۋرەتتەن قاراپ قالارى ابدەن ءمۇمكىن. دالا سۇلۋىن قورعاپ, ونىڭ سانىن قالپىنا كەلتىرۋدە ىنتىماقتاسا جۇمىس ىستەۋ تۋرالى قازاقستانمەن كەلىسىمگە كەلگەن كورشى رەسەي مەن وزبەكستان اقبوكەندى وزدەرىنىڭ «قىزىل كىتابىنا» ەنگىزدى. ولاردا سوعان سايكەس كيىكتىڭ باعزى ءتۇرىن ساقتاۋدىڭ ءتۇرلى شارالارى جاسالۋدا. ال ماماندار قازاقستاندا اقبوكەندى «قىزىل كىتاپقا» ەنگىزۋگە ازىرگە سونشالىقتى ماجبۇرلىك جوق ەكەنىن ايتادى.
براكونەرلەر قىرىپ كەتكەن اقبوكەن ولەكسەسى تابىلعان سايىن ول بويىنشا قىلمىستىق ءىس قوزعالادى. بىراق كىنالى ادامنىڭ ناقتى انىقتالماۋىنا بايلانىستى ول ءىس قىسقارتىلادى.
باس پروكۋروردان ءبىرىنشى ورىنباسارى يوگانن مەركەل ىشكى ىستەر مينيسترلىگىنەن براكونەرلىك فاكتىلەرىن دەر كەزىندە انىقتاۋ جانە ولادىڭ جولىن كەسۋ, وسى ساناتتاعى قىلمىستىق ىستەردى اشۋ, تەرگەۋ ساپاسىن ارتتىرۋ ءۇشىن پارمەندى شارالار قابىلداۋدى تاپسىردى. تابيعاتتى قورعاۋ, اڭداردى زاڭسىز اۋلاۋعا, براكونەرلىك جولمەن قۇرتۋعا قارسى كۇرەستى رەتتەيتىن بارلىق زاڭنامالار جۇمىس ىستەۋى, قاتايتىلۋى كەرەك. مەملەكەتتىك ورگاندار براكونەرلىككە قارسى كۇرەستى كۇشەيتۋگە باعىتتالعان قىزمەتتەرىن ۇيلەستىرىلگەندە عانا ورتاق ىستە ناتيجە بولماق.
ءنازيرا جارىمبەتوۆا, قوستاناي.