اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ ەلورداداعى گاسترولدىك ساپارى تەاتر رەپەرتۋارىنداعى وپەرا جانە بالەتتەردىڭ ەڭ ۇزدىك كورىنىستەرىنەن قۇرالعان گالا-كونتسەرتپەن قورىتىندىلاندى.
ەل تاۋەلسىزدىگىنىڭ 20 جىلدىق مەرەكەسى ءتۇرلى مادەني شارالارمەن اسپەتتەلىپ, قۇندى تارتۋلارمەن اتاپ وتىلۋدە. سونىڭ ىشىندە وزىندىك ورنەكتەرىمەن وزگەشە بولىپ كورىنگەنى – باس قالاعا اباي اتىنداعى وپەرا جانە بالەت تەاترىنىڭ گاسترولدىك ساپارمەن كەلۋى. تورقالى تويعا شاشۋ رەتىندە ۇسىنىلعان وپەرالار مەن بالەتتەردىڭ قاي-قايسىسى دا كورەرمەن تاراپىنان ىستىق ىقىلاسقا يە بولدى. تاعى ءبىر ەستە قالاتىن تۇسى – مۇندا ەلىمىزگە بەلگىلى ساحنا تارلاندارى ونەر كورسەتىپ, كوركەم بەينەلەر اسقان شابىتپەن ءورىلدى. ۇلتتىق وپەرادان ا.جۇبانوۆ پەن ل.ءحاميديدىڭ «اباي» وپەراسىنان باستى پارتيالار شىرقالىپ, الەمنىڭ كلاسسيكالىق قويىلىمدارىنان دج.ۆەرديدىڭ «تراۆياتا», ر.ۆاگنەردىڭ «تانگەيزەر», گ.دونيتسەتتيدىڭ «ماحاببات شىرىنى» سپەكتاكلدەرىنىڭ اسەرلى ساتتەرى ادەمى جەتكىزىلدى. ا.ءحاچاتۋرياننىڭ «سپارتاك», س.پروكوفەۆتىڭ «رومەو مەن دجۋلەتتا» بالەتتەرىنەن ۇزىندىلەر باس تەاتر مەكتەبىنە ءتان بوياۋمەن تارتىمدى وينالدى. جالپى ابايلىقتاردىڭ ەلورداداعى كۇندەرى جارقىن ۇنمەن جان دۇنيەنى باۋراعان ايشىقتى بەتتەرگە تولى بولدى. جۇرتشىلىق وزدەرى ۇناتىپ تىڭدايتىن تانىمال ءارتىستەرىمەن ەمەن-جارقىن قاۋىشقان تاماشا ساتتەردى باستان كەشتى. قازاقستاننىڭ حالىق ءارتىسى نۇرجامال ۇسەنباەۆانىڭ سومداعان اجارىنا ريزا بولعان كورەرمەن ىقىلاسىنان زال ءىشى ءدۇر سىلكىندى. قر ەڭبەك سىڭىرگەن قايراتكەرلەرى ءجاميلا باسپاقوۆا مەن شاحيماردان ءابىلوۆ ونەرىمەن كەستەلى ورىلگەن بەينەلەر ۇمىتىلماستاي اسەر قالدىردى. ءار وپەرا مەن بالەت جايىندا ۇزاق اڭگىمە قوزعاۋعا بولار ەدى. مۇنىڭ ءبارى وزگە تەاترلاردىڭ ساحناسىندا دا كورەرمەنىن ءۇيىرىپ, ۇزدىك ۇلگىگە اينالعان تۋىندىلار دەسەك تە, اباي اتىنداعى وپەرا جانە بالەت تەاترىنىڭ ءار كەيىپكەردى, بولمىستى تۇيىندەۋى باسقالاردىڭ سالعان سوقپاعىنا, جاتتاندى جولعا ءتۇسىپ كەتپەيدى. شەبەرلىك مەكتەبى قالىپتاسقان ورتادا تىڭنان جاڭالىقتاردىڭ شىعىپ جاتۋى زاڭدىلىق بولاتىنى سياقتى, مۇنداعى سومدالعان بەينەلەر دە كەزىندە تەاتر سىنشىلارىنان باعاسىن الىپ, باعىتىن ايقىنداعان تاعدىرلار بولىپ سانالادى. ولاردىڭ كيىم ۇلگىلەرىنەن باستاپ, ءۇن, ءىس-قيمىل, ارەكەتتەرىنە دەيىن قايتالانباس ورنەكتە بەدەرلەنۋى سول ۇزىلمەي كەلە جاتقان ەجەلگى مەكتەپتىڭ ارقاسى ەكەنى بەلگىلى. تورقالى تويعا توعىز تارتۋ ۇسىنعان ونەر ۇجىمىنىڭ گاسترولدىك ساپارى مەملەكەت مەرەكەسىنىڭ اجارىن كىرگىزگەن شارالاردىڭ ءبىرى بولىپ قالعانىندا داۋ جوق.
اجار وسپانوۆا.