بايلانىس جانە اقپارات مينيسترلىگى اقپارات جانە مۇراعات كوميتەتىنىڭ ۇيىتقى بولۋىمەن ۇلتتىق اكادەميالىق كىتاپحانادا ەلىمىزدىڭ جەتەكشى كىتاپحانا باسشىلارىمەن كەزدەسۋ ءوتتى.
كەزدەسۋدە «ادەبيەتتىڭ الەۋمەتتىك ماڭىزدى تۇرلەرىن باسىپ شىعارۋ» رەسپۋبليكالىق بيۋدجەتتىك باعدارلاماسى, ونىڭ ىشىندە «ءمادەني مۇرا» باعدارلاماسى اياسىندا شىعارىلاتىن كىتاپتاردى تاراتۋ مەن پايدالانۋ ماسەلەلەرى ءسوز بولدى.
اقپارات جانە مۇراعات كوميتەتى توراعاسىنىڭ ورىنباسارى ەربول شايمەردەن قاتىسۋشىلارعا «ادەبيەتتىڭ الەۋمەتتىك ماڭىزدى ءتۇرلەرىن باسىپ شىعارۋ» باعدارلاماسىنىڭ ءجۇزەگە اسىرىلۋى تۋرالى, سونداي-اق جىل سايىن وسى باعدارلاما اياسىندا ورتا ەسەپپەن 400-گە جۋىق اتالىممەن, جالپى تارالىمى 1 ميلليون دانا كىتاپ شىعارىلاتىنىن ءسوز ەتتى.
«بىلىمدىك, مادەني ماڭىزى زور بۇل باعدارلاما ەلىمىزدەگى كىتاپحانا قورىنىڭ تولىعۋىنا, كىتاپتاردىڭ تەگىن تاراتىلۋى ارقىلى قالىڭ وقىرماننىڭ ادەبيەتتەرگە قولجەتىمدىلىگىن قامتاماسىز ەتۋگە جول اشادى», دەپ اتاپ ءوتتى ول. سونداي-اق, ە.شايمەردەن «مادەني مۇرا» باعدارلاماسى جۇزەگە اسىرىلعاننان بەرى شامامەن 500 اتالىم بويىنشا تاريح, ارحەولوگيا, ەتنوگرافيا, قازاقستان مادەنيەتى, انىقتامالىق-ەنتسيكلوپەديالىق, كوركەم اۋدارما, مۋزىكالىق ادەبيەت, فوتوالبوم سىندى كىتاپتاردىڭ 1,5 ملن. دانامەن جارىق كورگەندىگىن ايتىپ ءوتتى.
ەلىمىزدىڭ جەتەكشى كىتاپحانا باسشىلارى كىتاپ شىعارۋ مەن تاراتۋدىڭ وزەكتى ماسەلەلەرىن ءسوز ەتكەن كەزدەسۋ سوڭىندا بايلانىس جانە اقپارات مينيسترلىگىنىڭ اقپارات ءجانە مۇراعات كوميتەتى مەن ەلىمىزدىڭ جەتەكشى كىتاپحانالارى اراسىندا ءوزارا ءارىپتەستىك مەموراندۋمىنا قول قويىلدى.
«ەگەمەن-اقپارات».